Read south west gbaya Efeze 3 Bible Online

Efeze 3 - south west gbaya bible

Efeze 3

¹Mi, Paul, dung ha twa zɔbhɔ hazu mi ha bulo *Dede Wen hazu Jésus-Christ ha ɛnɛ, hio wi ka bo nê zuife na.

²Ɛnɛ zea kari nde, Sɔ haa mi tom mɛ tɔ ha ɛnɛ wen *dede sila pɛa, ka wɛnɛ de ha tɛ ɛnɛ.

³Sɔ gbasa ha mi hio mɔ ka wɛnɛ babhɔngiri nɛ wuso. Mi ngɛraka hio ma bebe wen hazua sɔngsi ha zang takarata ɛngɛ kari.

⁴Ha tɔla wen ndɔng ki, tazu ɛnɛ begba nɛhasa nde, mi ingɔ goto mɔ ka Sɔ babhɔngiri nɛ wuso hazu Christ.

⁵Ha hio ngimɔ sɔngsi, Sɔ tɛ gbasi mɔ ɛngɛ ha hio wi na. Ma, sising, a tomsa *Nzɔy-Sɔtɛ pɛa hazu gbasi mɔ ɛngɛ fɛt long ha hio nzɔy *wan-nɛtom nɛ hio *wan-tɔkuliwen pɛa.

⁶Mɔ ɛngɛ, yo nde: Nɛ wal Dede Wen, hio wi ndɔng ka bo nê zuife na, Sɔ beha mbwa ndangtɛ likɔ hinɛ hio zuife gbesi. Mbwa tɛ bo nê kilitɛ ndang hinɛ hio zuife gbesi. Mɛgi, mbwa bwa fɛt gbesi bekpa mɔ ka Sɔ gɔna nua nɛ wal Jésus-Christ.

⁷Sɔ dea dede sila ha tɛ mi, nɛ a baa mi nɛ wal ziomɔ pɛa tuka wan-tom pɛa nde, mi abul Dede Wen ha hio wi.

⁸Pɔm, mi nê bebe wi pen fɛt ha soko hio olo wi pɛ Sɔ. Ma, ngase ɛngi Sɔ dea dede sila ha tɛ mi nde, mi abul Dede Wen ha hio wi ka bo nê zuife na. Dede Wen ɛngɛ nde, mbwa lɛma kpa yɛbhɛ-yɛbhɛ kpaamɔ nɛ wal Christ.

⁹Sɔ ka dea mɔ fɛt, babhɔngiri mɔ ka wɛnɛ bede, sɔngsi bhee gde nɛ wuso. Nɛ wɛnɛ haa mi tom nde, mi agbasi ha wi fɛt wal ka wɛnɛ belɛmsiri yo.

¹⁰Mɛgi, angiri ha ngimɔ sising, hio sɔtɛ gan zu mɔ nɛ hio nga sɔtɛ ka dung ha ngɔn, lɛma ing dɔka mbaramɔ pɛ Sɔ nɛ wal *giliwi mɔ eglize.

¹¹Sɔ dea mɛgi tuka wɛnɛ babheki sɔngsi bhee. A dea yo nɛ wal tom ka Jésus-Christ, *Kongawan pɛ ɔ, dea.

¹²Ɔ ha dea sɔy hinɛ Jésus-Christ, nɛ ɔ mɛkara wɛnɛ kari. Yo nê ɛngi, ka ɔ dung sɛɛ, nɛ ka ɔ ba da mɛ tiki nɛ hapɛtɛ Sɔ.

¹³Mɛgi mi mbo ɛnɛ nde, ngase ka mi ha kpaa yeksamɔ hazu ɛnɛ, ka ɛnɛ adung nɛ ngɔtɛ na. Hazu yeksamɔ ɛngɛ kpaa may hinɛ mi nde, ɛnɛ akpa lɛkɛ-lɛkɛ dedemɔ ha kɔ Sɔ.

¹⁴Hazu ɛngi, mi ha ngbio zigolo ha nu ha li Sɔ, Bafa ɔ, nɛ mi gɔ wɛnɛ ha zu ɛnɛ.

¹⁵Yo nê wɛnɛ ka dea nɛ pam hio mɔ fɛt ka dung nɛ tunɔ ha zang ngɔn nɛ ha zu nu.

¹⁶Mi gɔ wɛnɛ mɛ ku lɛkɛ-lɛkɛ kpaamɔ pɛa hazu ha nɛ ngatɛ ha sila ɛnɛ nɛ wal *Nzɔy-Sɔtɛ pɛa.

¹⁷Mi gɔ Sɔ nde, Christ ade le ha zang sila ɛnɛ hazu ɛnɛ mɛkara wɛnɛ. Mi gɔ fin nde, ɛnɛ adung nɛ nɔa ngi-ngi-ngi ha zang ngoy.

¹⁸Mɛgi, ɛnɛ hinɛ hio olo wi pɛ Sɔ fɛt, ɛnɛ lɛma mɛ ing nde, ngoy ka Christ ngoya nɛ ɔ, nɛ pɛsaa, nɛ bɔyaa, nɛ kusoa, nɛ gdukoa pentɛ pet.

¹⁹Ey, ɛnɛ aing ngoy pɛ Christ, ngase ka ma wi ndang lɛm ing yo hɛrr na. Mɛgi, tunɔ pɛ ɛnɛ bedon lɛtɛtɛ nɛ mɔ pɛ Sɔ fɛt mburr.

²⁰Sɔ lɛma mɛ de mɔ fɛt nɛ wal ngatɛ pɛa ka de tom ha tɛ ɔ. A lɛma de mɔ nɛdɔka pen ɛngɛ ka ɔ ani nɛ wɛnɛ, nɛ fin nɛdɔka pen ɛngɛ ka ɔ takiri mɔ hazua.

²¹Ɔ, giliwi mɔ eglize, ka de sɔy hinɛ Jésus-Christ, ɔ alukisi Sɔ ha ngimɔ fɛt kpoo nɛ kpoo! Amen.