Read south west gbaya Filipe 4 Bible Online

Filipe 4 - south west gbaya bible

Filipe 4

¹Hio ya mi, ka mi ngoya gdang, mi nɛ hɛl mɛ zɔk ɛnɛ. Ɛnɛ nê totɛ pɔm, nɛ ɛnɛ dung tuka kɛamɔ hazu tom pɔm. Hazu ɛngi, hio ndɔngsila mi, ɛnɛ bhɔn nɛ mboazu ha dea sɔy hinɛ *Kongawan.

²Evodie hinɛ Sentish, mi mbo ɛnɛ nɛkpasa nde, ɛnɛ aze nu may tuka hio ya ha Kongawan.

³Pɛ mɛ, kpasa sɔy-tom pɔm, mi ani mɛ nde, mɛ agbakiri hio bhoko ndɔng bwa mɛ ze nu may. Hazu ɔ hinɛ mbwa, ɔ dea tom bulo *Dede Wen nɛdɔka pentɛ, tɛ ba nɛ Klement nɛ hio olo sɔy-tom pɔm, ka Sɔ ngɛraka ling mbwa fɛt ha zang Takarata Tunɔ.

⁴Ɛnɛ de totɛ ha Kongawan swe fɛt! Mi putiri yo fin nde, ɛnɛ de totɛ!

⁵Lɛma nde, hio wi fɛt aing nde, deamɔ pɛ ɛnɛ nɛ gaa. Kongawan tɛ bo sanga mɛ kifiri pe.

⁶Ka ɛnɛ adung nɛ nɔzang hazu ma mɔ na. Ma, ha zang mɔ fɛt, ɛnɛ gɔ Sɔ, nɛ ɛnɛ ani mɔ ka kɔpi ɛnɛ ha kɔ wa. Ɛnɛ tɔ oeba ha wɛnɛ hazu mɔ fɛt ka wɛnɛ de.

⁷Mɛgi, Sɔ beha ɛnɛ gaamɔ pɛa ka pena zu ingɔmɔ pɛ wi fɛt. Nɛ gaamɔ ɛngɛ bepam sila ɛnɛ nɛ takaramɔ pɛ ɛnɛ ha dea sɔy hinɛ Jésus-Christ.

⁸Olo wen pɔm fin, hio ya mi, ɛnɛ gde sila ɛnɛ ha mɔ ndɔng fɛt ka dung nɛ kpasa, ka dung nɛ zioa ha li wi fɛt, ka dung nzeng, ka dung nɛ saa, ka ha totɛ, ka dung nɛ dede ling, ka dung nê dede deamɔ, nɛ ka lɛm nɛ lukosomɔ.

⁹Ɛnɛ de mɔ lɛm nɛ hio mɔ ndɔng ka mi osa ha ɛnɛ, ka ɛnɛ kpaa tuka mbɔla ha kɔ mi, ka ɛnɛ zea ha nu mi, nɛ ka ɛnɛ zɔka mi ha dea. Mɛgi Sɔ, wan-ha gaamɔ, bedung hinɛ ɛnɛ.

¹⁰Mi nɛ totɛ pentɛ, nɛ mi ha lukoso *Kongawan hazu, ha kpogio, ɛnɛ kpaa fin wal mɛ gbakiri mi nɛ mbinga. Ɛnɛ ngoya mɛ de yo swe fɛt, ma, sɔngsi ɛnɛ kio wal gan.

¹¹Mi tɛ tɔ mɛgi hazu mɔ kɔpa mi na. Hazu, mi yamba wal mɛ dung nɛ totɛ hazu mɔ ka dung ha kɔ mi.

¹²Mi ingɔ dungɔa nɛ mɔ tikiring, nɛ mi ingɔ fin dungɔa nɛ mɔ hebhe. Ngase mɔ ahɔ mɛng, mi ingɔ wal mɛ ba sila mi ha ngimɔ dona zang nɛ ha ngimɔ wɔ, ha zang yɛbhɛ-yɛbhɛmɔ nɛ ha zang san.

¹³Mi gan zu mɔ fɛt nɛ wal Christ ka ngasisi mi.

¹⁴Ma, ngase ɛngi, ɛnɛ dea nɛdedea hazu ɛnɛ gbakara mi ha zang ngamɔ pɔm.

¹⁵Ɛnɛ, hio wi pɛ Christ mɔ Filipe, ɛnɛ ingɔ nɛdedea nde, ha ngimɔ ka mi angara bulo *Dede Wen ha kandɔnu Masedoane, nɛ ka mi guotɛ haki pen, yo ka nê ɛnɛ sɔna ka gbakara mi nɛ mbɔli. Ma mbing eglize tɛ de mɛgi na.

¹⁶Ha ngimɔ ka mi badung ha Tesalonike, ɛnɛ batomsi mɔ hazu gbakiri nɛ mi ha gdong may.

¹⁷Mi ngoy kpa mɔ ha kɔ ɛnɛ na, ma, mi ngoya nde, Sɔ akɛ ɛnɛ hebhe hazu hio dedemɔ ka ɛnɛ de.

¹⁸Mi kpaa hio mɔ-kɔ ɛnɛ fɛt ka ɛnɛ tomsa ha mi. Yo lɛma hazu mi pen zua. Mɔ ka ɛnɛ gdea ha kɔ Epafrodite tɛnɛ ha mi, yo lɛma mi nɛkpasa. Hio mɔ-kɔ ɛnɛ ndɔng dung tuka yefa sadaka ka dede pɛla siing danga nɛ ha pɛ Sɔ, nɛ ka ha totɛ ha wɛnɛ.

¹⁹Sɔ pɔm nɛ hio kpaamɔ hebhe. Nɛ wal Jésus-Christ, a beha ɛnɛ hio mɔ fɛt ka kɔpi ɛnɛ.

²⁰*Lɛkɛ-lɛkɛmɔ ha kɔ Sɔ, Bafa ɔ, kpoo nɛ kpoo. Amen.

²¹Ɛnɛ fan hio wi pɛ Jésus-Christ fɛt. Hio ya ɔ ka dung hakɛ hinɛ mi fana fin ɛnɛ.

²²Hio olo wi pɛ Christ ka dung hakɛ, pen fɛt ɛ ndɔng mɔ zang kin pɛ *kongapora Sezar, fana ɛnɛ.

²³*Kongawan Jésus-Christ ade *dede sila ha tɛ ɛnɛ fɛt.