Read south west gbaya Kolose 2 Bible Online

Kolose 2 - south west gbaya bible

Kolose 2

¹Mi ngoya nde, ɛnɛ aing nga bulo ka mi ha bioa hazu ɛnɛ, hazu hio wi mɛ Laodise, nɛ hazu hio dɔka mbing wi ka tɛ zɔk ka li mi na.

²Mi de mɛgi tuka nde, sila mbwa adon nɛ da, mbwa andari may ha zang ngoy, nɛ mbwa adon nɛ ingɔmɔ lɛtɛtɛ. Mɛgi, mbwa being mɔ ka Sɔ babhɔngiri nɛ wuso, yo nde, mbwa being Christ,

³ka Sɔ gdea mbaramɔ nɛ ingɔmɔ fɛt mburr ha tɛ wa.

⁴Mi tɔ wen mɔ ndɔng ha ɛnɛ yu nde, ma wi betɛ osili ɛnɛ nɛ dede gɛl.

⁵Ngase ka mi bo ha soko ɛnɛ na, mi ha soko ɛnɛ nɛ wal takaramɔ pɔm. Nɛ mi nɛ totɛ ha zɔka nde, ɛnɛ ha dea mɔ nɛ wala, nɛ ɛnɛ bhɔna ka nɛ nɔa nging ha mɛkara Christ.

⁶Ɛnɛ mɛkara kari nde, Jésus-Christ nê *Kongawan pɛ ɛnɛ. Mɛgi dea nde, ɛnɛ ade mɔ tuka wi ka de sɔy hinɛ wɛnɛ.

⁷Ɛnɛ abhɔn ka ha tɛ wa tuka gunkute ka lea nu ngi-ngi-ngi. Ɛnɛ azati ha mɛkara wɛnɛ nɛ nɔa nging tuka ɛ osa ha ɛnɛ. Nɛ ɛnɛ aha oeba ha wɛnɛ nɛdɔka.

⁸Ɛnɛ pangay yu nde, hio wi betɛ osili ɛnɛ nɛ gombo mbaramɔ pɛ mbwa hazu ba ɛnɛ nɛ bala. Mbaramɔ ɛngɛ tɛ nɛ wal hio ngbabafa mbwa mana nɛ wal hio sɔtɛ mɔ nzan. Yo tɛ nɛ wal Christ na.

⁹Hazu Sɔ nɛ pɛa tɛ fɛt mburr ha dea le ha tɛ Christ.

¹⁰Nɛ ɛnɛ kpaa tɛ kpasa tunɔ nɛ wal sɔy ka ɛnɛ de hinɛ Christ, ka dung nê wan hazu hio sɔtɛ gan zu mɔ nɛ hio nga sɔtɛ fɛt.

¹¹Nɛ wal dea sɔy hinɛ Christ, Sɔ gɔna sɔru ɛnɛ kari. Gɔna sɔru ɛngɛ tɛ nɛ wal wi na, ma, yo tɛ nɛ wal Christ, nɛ yo guo gdanga ndɔkitɛ ɛnɛ yunɛ.

¹²Ha ngimɔ ka ɛ bagdumsi ɛnɛ ha li, ɛ gunɔ ɛnɛ hinɛ Christ gbesi. Nɛ ka ɛnɛ gboa ha si li, Sɔ guo ɛnɛ gbesi hinɛ wɛnɛ, hazu ɛnɛ gdea tazu ɛnɛ ha ngatɛ pɛ Sɔ ka guo Christ ha soko hio fiowi.

¹³Ɛnɛ badung sɔngsi nê hio fiowi ha li Sɔ hazu hio *sɛmbɔ pɛ ɛnɛ, nɛ hazu Sɔ tɛ gɔn ka sɔru ɛnɛ na. Ma, sising Sɔ tunso ɛnɛ fin nɛ mbinga hinɛ Christ, nɛ a biso sɛmbɔ pɛ ɔ hinɛ ɛnɛ fɛt.

¹⁴Takarata ka fundi ɔ hazu hio sɛmbɔ ka ɔ de sungiri nɛ *mbonga, Sɔ ngbaa yo ha getakate. Mɛgi, wɛnɛ lɛm zɔk yo fin na.

¹⁵Nɛ wal dea mɛgi, Sɔ guo mɔ-bibulo pɛ hio sɔtɛ gan zu mɔ nɛ hio nga sɔtɛ fɛt yunɛ. Nɛ a gdea mbwa tuka bala ha zang nzɔng ka nak pata Christ, wan-gan zu mbwa. Mɛgi, foy baa mbwa ha li hio wi fɛt.

¹⁶Hazu ɛngi, ka ma wi ngoy gɔn kita ha zu ɛnɛ ha wen mɔ ka ɛnɛ yɔng nɛ ka ɛnɛ nɔ, mana ha wen hio ma yenga mɔ bɛlɛ, mana mɔ mbombe ze, mana mɔ *swe ɔmtɛ, ka ɛnɛ agde wal ha wɛnɛ ndang na.

¹⁷Mɔ ndɔng ki fɛt dung sɔna tuka zizi hio mɔ ka behɔ bin. Ma, ngbak mɔ, yo nê Christ.

¹⁸Hio ma wi ha dea tom Sɔ nɛ wal zimɔ hio ma mɔ. Mbwa lukisi hio *telenge, nɛ mbwa ba hio lisɔ pɛ mbwa nɛ zioa. Ka ɛnɛ agde mbwa agɔn kita ha zu ɛnɛ na, hazu takaramɔ pɛ mbwa tɛ nɛ ndɔkitɛ mbwa, nɛ mbwa ha suotɛ nɛgbelea.

¹⁹Mbwa dol fin tɛ ha Christ na, ngase wɛnɛ nê zu *giliwi mɔ eglize. Wɛnɛ wesiri hio gbakɔtɛ wa gde ha may nɛ wal hio dokaratɛ wa, nɛ wɛnɛ day kilitɛ wa fɛt tuka nde, yo akpɔtɛ nɛ wala tuka Sɔ ngoya.

²⁰Ɛnɛ fea hinɛ Christ gbesi. Ɛnɛ bo fin ha si ziomɔ pɛ hio sɔtɛ mɔ nzan ɛngɛ na. Ma, ɛ dea mɛng, ka ɛnɛ ha dea mɔ tuka wi mɔ nzan ɛngɛ, ge nde? Hazu ge ɛnɛ mɛkara hio haanu tuka ɛngɛ, ka tɔ nde,

²¹ka mɛ aba na, ka mɛ atoti na, nɛ ka mɛ andɔ na, ge nde?

²²Hio tili haanu ndɔng tɛ nɛ wal osamɔ pɛ wi, nɛ yo zɔk hio mɔ ka bepen hapata ngimɔ tom pɛ mbwa.

²³Kpasawen, dea tom Sɔ nɛ wal takaramɔ pɛ wi, zimɔ hio ma mɔ, yeksa tɛ nɛ pɛa tɛ, deamɔ mɛgi dung tuka mbaramɔ ha li hio wi. Ma, mɔ ndɔng fɛt nê gbelemɔ. Yo lɛm gdɔki wal ha hio gdanga hɛl ndɔkitɛ wi na.