Read south west gbaya Kolose 3 Bible Online

Kolose 3 - south west gbaya bible

Kolose 3

¹Sɔ guo ɛnɛ hinɛ Christ gbesi ha soko hio fiowi. Mɛgi, ɛnɛ ki wal mɛ kpa hio mɔ ka dung ha ngɔn, ha bhandi ka Christ dungnu ang ha wekɔ Sɔ.

²Ɛnɛ agde sila ɛnɛ ha hio mɔ ngɔn, bo ha hio mɔ nu na.

³Hazu ɛnɛ fea kari, nɛ tunɔ pɛ ɛnɛ ha wuso tɛ hinɛ Christ hapɛtɛ Sɔ.

⁴Ey, tunɔ pɛ ɛnɛ, yo nê Christ. Mɛgi, ha ngimɔ ka wɛnɛ begbasi nɛ tɛ wa, ɛnɛ fin bedung hinɛ wɛnɛ ha zang *lɛkɛ-lɛkɛmɔ pɛa.

⁵Hazu ɛngi, ɛnɛ aku mɔ nzan fɛt ka dung ha sila ɛnɛ gde ha fio. Mɔ nzan ndɔng nde: Dea wanza, dea mɔ nyɛl, golamɔ multɛ, dea wɔ gdangamɔ, nɛ dea hɛl kpaamɔ. Kpasawen, hɛl kpaamɔ, yo gbesi tuka dea tom gbele sɔ.

⁶Yo nê hazu mɔ nzan ndɔng, ka Sɔ bede bin ngambi [sungiri nɛ wi ndɔng ka ze nu wa na].

⁷Ɛnɛ fin, ɛnɛ badung se ha dea hio mɔ nzan ndɔng, ha ngimɔ ka mɔ ndɔng badon sila ɛnɛ.

⁸Ma, sising, ɛnɛ alak dea mɔ ndɔng fɛt gde: Ngambi, yimsila, dea gdangamɔ ha tɛ wi, yaa dala. Nɛ ka ma wen gɔnali agbo ha nu ɛnɛ na.

⁹Ka ɛnɛ atɔ dalo ha soko may na. Hazu ɛnɛ kpɔsa mɔa tɛ wi hinɛ ndɔki deamɔ pɛa gde kari.

¹⁰Nɛ ɛnɛ yola mbombe tɛ wi. Sɔ ka dea mbombe wi ɛngɛ, wɛnɛ ha dea nde, yo aba may hinɛ wɛnɛ nɛnɛ sɔngsi tuka nde, ɛnɛ aing wɛnɛ nɛkpasa.

¹¹Mɛgi, kandɔ *zuife, hio olo kandɔ, hio wan-gɔn sɔru, hio wan-sɔru, hio wi mɔ bebe le, hio tombɔ, hio bala nɛ hio bele, mbwa fɛt bo fin nɛtɛ-nɛtɛ na. Gasa mɔ, yo ka nê Christ, ka dung ang ha tɛ mbwa fɛt.

¹²Sɔ ngoya ɛnɛ nɛ wɛnɛ weka ɛnɛ tuka nzɔy kandɔ pɛa. Mɛgi, dea nde, ɛnɛ ayol mbombe tɛ wi, ka de kobhe tɛ wi, ka de dedemɔ, ka hil nɛ mɛndi, ka dung nɛ gaa sila nɛ yikosila.

¹³Ɛnɛ aba sila nɛ may, nɛ ɛnɛ abisi *sɛmbɔ pɛ may ngimɔ fɛt ka ɛnɛ nɛ ma wen sungiri nɛ may, gbesi tuka ka *Kongawan biso nɛ sɛmbɔ pɛ ɛnɛ fin.

¹⁴Nɛ gasa mɔ pen mɔ fɛt, yo nde, ɛnɛ angoy may. Hazu ngoy dung tuka pɛl ka hɛl wi fɛt gde ha may nɛkpasa.

¹⁵Dea nde, gaamɔ pɛ Christ angbɔsi sila ɛnɛ. Hazu Sɔ saa ɛnɛ ha gaamɔ ɛngɛ tuka nde, ɛnɛ adung tɛ ndang. Ɛnɛ aha oeba ha Sɔ ha wena.

¹⁶Wen pɛ Christ ade le ha soko ɛnɛ hebhe. Ɛnɛ aosi mɔ ha may, nɛ ɛnɛ ambo may nɛ mbaramɔ fɛt. Ɛnɛ abe hio *gima pɛ David, hio gima lukisi Sɔ, hio gima ka tɛ nɛ wal *Nzɔy-Sɔtɛ nɛ sila ɛnɛ fɛt hazu ha oeba ha Sɔ.

¹⁷Nɛ mɔ fɛt ka ɛnɛ de, nɛ ka ɛnɛ wol, ɛnɛ ade yo nɛ ling Kongawan Jésus, nɛ ɛnɛ aha oeba ha Sɔ, Bafa, nɛ wal wɛnɛ.

¹⁸Hio bhoko, ɛnɛ ahil nɛ mɛndi ha si wei pɛ ɛnɛ tuka yo lɛma ha li *Kongawan.

¹⁹Hio wei, ɛnɛ angoy ko pɛ ɛnɛ. Ka ɛnɛ adung nɛ yimsila sungiri nɛ mbwa na.

²⁰Hio bem, ɛnɛ aze nu bafa nɛ nana ɛnɛ ha mɔ fɛt. Hazu ɛngi ha totɛ ha Kongawan.

²¹Hio gdibafa, ka ɛnɛ ayimsi sila hio bem pɛ ɛnɛ na, yu nde, ɛnɛ betɛ ku da ha sila mbwa yunɛ.

²²Hio bala, ɛnɛ aze nu hio wan pɛ ɛnɛ mɔ nzan ha mɔ fɛt. Ɛnɛ aki mɛ ha totɛ ha mbwa ngimɔ fɛt, bo sɔna ka ɛnɛ ha li mbwa na. Ma, ɛnɛ aze nu mbwa nɛ *dede sila hazu ɛnɛ ha yuo ke Kongawan.

²³Ngase nge tom, ɛnɛ ade yo nɛ sila ɛnɛ fɛt tuka wi ka de tom ha Kongawan, bo ha hio wi na.

²⁴Ɛnɛ aing nde, Kongawan bekɛ ɛnɛ. A beha ɛnɛ mɔ ka wɛnɛ bhɔngara keri nɛ hio wi pɛa. Kpasa wan ka ɛnɛ de tom ha wɛnɛ, yo nê Christ.

²⁵Ma, wi ka de kpandele, Sɔ bekɛ wɛnɛ lɛm nɛ kpandele ka wɛnɛ dea, hazu Sɔ gba soko wi na.