Read south west gbaya 1 Tesalonike 2 Bible Online

1 Tesalonike 2 - south west gbaya bible

1 Tesalonike 2

¹Hio ya ɔ, ɛnɛ nɛ tɛ ɛnɛ ingɔ nɛdedea nde, ɔ tɛ hɔ ha soko ɛnɛ nɛgbelea na.

²Ɛnɛ ingɔ fin nde, sɔngsi mɛ hɔ ha pɛ ɛnɛ, hio wi ha le Filipe dea ngamɔ ha tɛ ɔ, nɛ mbwa yaa ɔ. Ma, ngase ka dɔka wi sungoro ɔ, Sɔ haa ɔ da mɛ bul *Dede Wen pɛa ha ɛnɛ.

³Kpasawen, ɔ bulo wen bo nɛ dalo mana gdanga sila mana likisi ha zanga na.

⁴Hazu Sɔ wea ɔ nɛ a kpaa nde, ɔ lɛma ha li wa ka wɛnɛ agde tom bulo Dede Wen ha kɔ ɔ. Mɛgi ɔ ha wolamɔ bo hazu ha totɛ ha wi na, ma, hazu ha totɛ ha Sɔ ka we takaramɔ sila pɛ ɔ.

⁵Ɛnɛ ingɔ nde, ɔ tɛ wolmɔ ha ɛnɛ nɛ mbɔlɛ na, nɛ ɔ tɛ ndɔmbili ɛnɛ hazu kpa ma mɔ ha kɔ ɛnɛ na. Sɔ nê wan-kɛwen pɛ ɔ.

⁶Ɔ tɛ ki lukosomɔ ngase ha kɔ ɛnɛ, ngase ha kɔ ma mbing wi na.

⁷Tangere, ɔ nɛ ziomɔ mɛ nɔsisi ɛnɛ nde, ɛnɛ aha mɔ ha ɔ hazu ɔ nê hio *wan-nɛtom pɛ Christ. Ma, ɔ badung nɛ gaa sila ha soko ɛnɛ gbesi tuka gdinana ka pam nɛ hio bem pɛa.

⁸Ey, ɔ ngoya ɛnɛ pentɛ. Mɛgi ɔ zɔka nɛ dedea nde, ɔ aha ɛnɛ bo sɔna nɛ Dede Wen na, ma, ɔ aha ɛnɛ tɛ ɔ nɛ pɛ ɔ tɛ hazu ɛnɛ tɛ bo nê hio ndɔngsila ɔ.

⁹Hio ya ɔ, tazu ɛnɛ gbaa nɛ ngatom pɛ ɔ nɛ kata tɛ pɛ ɔ. Ha ngimɔ ka ɔ bulo Dede Wen pɛ Sɔ ha ɛnɛ, ɔ dungɔ ha dea tom swe nɛ zɛ yu nde, ɔ betɛ dung nê zio toy ha zu ma wi ha soko ɛnɛ.

¹⁰Ɛnɛ hinɛ Sɔ fɛt lɛma kɛ wen pɛ ɔ nde, mɔ ka ɔ dea ha tɛ ɛnɛ, hio wan-mɛkiri Christ, yo dungɔ nɛ nzɔya, nzeng, ma wen bo na.

¹¹Ɛnɛ ingɔ fin nde, ɔ dea mɔ ha tɛ ɛnɛ ndang ndang fɛt gbesi tuka ka gdibafa de nɛ ha tɛ hio bem pɛa.

¹²Ɔ dungɔ mɛ mbo ɛnɛ, mɛ ha da ha ɛnɛ, nɛ mɛ alnu ha ɛnɛ nde, ɛnɛ ade mɔ ka lɛma nɛ mɔ ka Sɔ ngoya. Wɛnɛ saa ɛnɛ mɛ le ha Kongakandɔ pɛa nɛ ha *lɛkɛ-lɛkɛmɔ pɛa.

¹³Ɔ bhɔna ha tɔa oeba ha Sɔ kpoo, hazu ha ngimɔ ka ɛnɛ zea wen ka ɔ bulo, ɛnɛ baa yo bo tuka wen pɛ wi na, ma, tuka wen pɛ Sɔ. Ey, wen ka ɔ bul, yo nê tɛwen. Nɛ wen pɛ Sɔ ha dea tom ha sila ɛnɛ, hio wan-mɛkiri Christ.

¹⁴Hio ya ɔ, ɛnɛ tɛ bo gbesi tuka hio *giliwi mɔ eglize pɛ Sɔ ha Judée. Mbwa ha dea sɔy hinɛ Jésus-Christ, mɛgi mbwa kpaa yeksamɔ ha kɔ hio bele pɛ mbwa, hio *zuife, gbesi tuka ka ɛnɛ kpaa nɛ yo ha kɔ hio bele pɛ ɛnɛ.

¹⁵Hio zuife gbɛa *Kongawan Jésus nɛ hio *wan-tɔkuliwen, nɛ mbwa namala ɔ fin. Deamɔ pɛ mbwa ha totɛ ha Sɔ na, nɛ mbwa tɛ bo nê ngana pɛ wi fɛt.

¹⁶Ɔ ha bulo wen ha hio kandɔ ka bo nê zuife na, tuka nde, mbwa akpasi. Nɛ hio zuife ngoy mɛ dol ɔ. Mɛgi, mbwa bhɔna ka swe fɛt ha yɛbhasa gdangamɔ pɛ mbwa. Ma, sising, Sɔ ha dea ngambi sungiri mbwa.

¹⁷Ka bo nê pɛ ɔ, hio ya ɔ, ɔ nɛ tɛ hɛl mɛ zɔk ɛnɛ fin nɛ mbinga, ngase yo nê ma bengimɔ sɔna ka ɔ kɛatɛ hinɛ ɛnɛ. Ɔ nɛ yɛa hinɛ ɛnɛ nɛ wal tɛ, ma, bo nɛ wal sila na. Mɛgi, ɔ ha kio wal mɛ zɔk ɛnɛ fin nɛngaya pen mɔ sɔngsi.

¹⁸Ɔ ngoya mɛ kifiri nɛ ha pɛ ɛnɛ. Mi, Paul, mi kimbolo ze nɛdɔka mɛ nɛ ha pɛ ɛnɛ. Ma, *Satan gdɔka wal ha ɔ.

¹⁹Kpasawen, yo nê hazu ɛnɛ fin ka ɔ gde tazu ɔ ha tɛ Sɔ, nɛ ka ɔ de totɛ, nɛ ka *Kongawan pɛ ɔ, Jésus, beha ɔ lɛkɛ-lɛkɛ kɛamɔ ha ngimɔ ka wɛnɛ bepe nɛ.

²⁰Ey, yo nê hazu ɛnɛ ka ɔ sutɛ, nɛ ka ɔ dung nɛ totɛ.