Read south west gbaya 2 Tesalonike 1 Bible Online

2 Tesalonike 1 - south west gbaya bible

2 Tesalonike 1

¹Yo nê mi, Paul, hinɛ Silas nɛ Timothée ha ngɛriki takarata ɛngɛ tomsi ha ɛnɛ, *giliwi mɔ eglize ha le Tesalonike. Ɛnɛ nê hio wi pɛ Sɔ, Bafa ɔ, nɛ pɛ *Kongawan Jésus-Christ.

²Sɔ, Bafa, hinɛ Kongawan Jésus-Christ ade *dede sila ha tɛ ɛnɛ, nɛ mbwa aha gaamɔ ha ɛnɛ.

³Hio ya ɔ, lɛma nde, ɔ aha oeba ha Sɔ swe fɛt hazu ɛnɛ. Dea mɛgi, yo nɛ wala hazu mɛkaramɔ pɛ ɛnɛ ha kpɔatɛ nɛnɛ sɔngsi, nɛ ngoy ka ɛnɛ ndang ndang fɛt ngoy nɛ may ha yɛbha fin.

⁴Yo nê ɛngi, ɔ ha lukoso tɛ hazu ɛnɛ ha soko hio *giliwi mɔ eglize pɛ Sɔ. Ɔ ha dea mɛgi hazu ha zang hio namalamɔ nɛ yeksamɔ fɛt ka ɛnɛ zɔk, ɛnɛ bhɔna ka ha yɔnga yini nɛ ha mɛkara Christ.

⁵Hio mɔ ndɔng gbasa nde, Sɔ begɔn kita nzeng, hazu wɛnɛ begde ɛnɛ nɛ zioa ha li wa mɛ le Kongakandɔ pɛa, ka ɛnɛ kpa yeksamɔ ha wena.

⁶Sɔ bede mɔ ka dung nzeng ha li wa: Hio wi ka yeksi ɛnɛ, a bekɛ mbwa nɛ yeksamɔ fin,

⁷nɛ a beha ɛnɛ ka kpa yeksamɔ sising, ngimɔ ɔmtɛ gbesi hinɛ ɔ. A bede mɛgi ha ngimɔ ka Kongawan Jésus begu nɛ tɛ ha ngɔn mɛ pe nɛ hinɛ hio nga *telenge pɛa.

⁸A bepe ha zang gasa lembe we hazu ndulsi wi ndɔng ka ing Sɔ na, nɛ ka kafi mɛ de mɔ lɛm nɛ *Dede Wen tɛ Kongawan pɛ ɔ, Jésus.

⁹Tuka ndulsomɔ pɛ mbwa, mbwa bedung ha zang bhondasa mɔ kpoo nɛ kpoo. Mbwa bedung nɛ yɛa ha li Kongawan nɛ ha lɛkɛ-lɛkɛ ngatɛ pɛa.

¹⁰Mɔ ndɔng behɔ ha swe ka wɛnɛ bepe nɛ hazu nde, hio nzɔy wi pɛa alukisi wɛnɛ, nɛ hio wan-mɛkiri wɛnɛ fɛt awolsi wɛnɛ. Ɛnɛ fin bedung ha soko wi ndɔng, hazu ɛnɛ mɛkara wen ka ɔ bulo ha ɛnɛ.

¹¹Yo nê ɛngi, ka ɔ gɔ Sɔ swe fɛt hazu ɛnɛ tuka nde, wɛnɛ agde ɛnɛ nɛ zioa ha li wa mɛ kpa *tunɔ kpoo ka wɛnɛ saa ɛnɛ ang. Ɔ gɔ Sɔ fin nde, wɛnɛ alɛmsiri nɛ wal ngatɛ pɛa hio tili dedemɔ fɛt ka ɛnɛ ngoy mɛ de, nɛ hio mɔ ka ɛnɛ de nɛ wal mɛkaramɔ.

¹²Mɛgi ling Kongawan pɛ ɔ Jésus bekpa lukosomɔ ha wen zu ɛnɛ, nɛ ɛnɛ bekpa fin lukosomɔ ha wen zu wa. Yo nê Sɔ pɛ ɔ hinɛ Kongawan Jésus-Christ ka bede mɔ mɛgi nɛ wal *dede sila pɛ mbwa.