Read south west gbaya 2 Tesalonike 3 Bible Online

2 Tesalonike 3 - south west gbaya bible

2 Tesalonike 3

¹Hazu karsi nɛ wen pɛ ɔ, hio ya ɔ, ɛnɛ agɔ Sɔ hazu ɔ tuka nde, wen pɛ *Kongawan andɛndi nɛhasa, nɛ nde, hio wi aba yo nɛ zioa tuka ka ɛnɛ dea nɛ.

²Ɛnɛ agɔ Sɔ fin nde, wɛnɛ akpasisi ɔ ha kɔ hio gdanga nɛ nzara-nziri wi. Hazu yo bo nê hio wi fɛt ka mɛkara Christ na.

³Ey, Kongawan nɛ mboazu. A beha ɛnɛ ngatɛ, nɛ a bepam ɛnɛ sungiri nɛ gdangamɔ.

⁴Nɛ wal Kongawan, ɔ gdea tazu ɔ ha tɛ ɛnɛ nde, ɛnɛ ade mɔ ka ɔ haa nu ha ɛnɛ mɛ de, sising nɛ ha ngimɔ ka betɛ.

⁵Kongawan angbɔsi sila ɛnɛ ha ngoy ka tɛ nɛ Sɔ, nɛ ha yikosila ka tɛ nɛ Christ.

⁶Hio ya ɔ, ɔ ha nu ha ɛnɛ nɛ ling *Kongawan pɛ ɔ, Jésus-Christ nde, ɛnɛ adak tɛ ha tɛ hio ya ha Christ ndɔng, ka dung nɛ pɔsaa, nɛ ka pam osamɔ ka mbwa zea ha nu ɔ, na.

⁷Ɛnɛ nɛ tɛ ɛnɛ ingɔ dede wal mɛ nak pata deamɔ pɛ ɔ. Hazu, ha ngimɔ ka ɔ badung ha soko ɛnɛ, ɔ bade tom nɛ kɔ ɔ nɛkpasa.

⁸Ɔ tɛ kpa yɔngamɔ ha kɔ ma wi nɛ gangtɛ na, ma, ɔ bade tom nɛ gbɛngamɔ nɛ katatɛ swe nɛ zɛ yu nde, ɔ betɛ dung nê zio toy ha zu ma wi ha soko ɛnɛ.

⁹Kpasawen, ɔ lɛma mɛ nɔsisi ɛnɛ mɛ kpa mɔ ha kɔ ɛnɛ. Ma, ɔ tɛ de mɛgi na, hazu ɔ ngoya nde, ɛnɛ azɔk deamɔ pɛ ɔ de nɛ pɛ ɛnɛ.

¹⁰Ey, ha ngimɔ ka ɔ badung ha soko ɛnɛ, ɔ baha nu ha ɛnɛ nde, wi ka ngoy dea tom na, ka wɛnɛ ayɔng mɔ na.

¹¹Ɔ tɔa wen mɛgi, hazu ɔ zea nde, hio pɔsa wi ang ha soko ɛnɛ ka de tom ndang na, nɛ ka pi nu ha wen pɛ hio wi nɛnɛ.

¹²Pɛ hio tili wi ndɔng, ɔ ha nu ha mbwa, nɛ ɔ mbo mbwa nɛ ling Kongawan Jésus-Christ nde, mbwa ade tom nɛ kɔ sɛm hazu kpa yɔngamɔ pɛ mbwa.

¹³Ka bo nê pɛ ɛnɛ, hio ya ɔ, ka tɛ ɛnɛ akati ha dea dedemɔ na.

¹⁴Ka ma wi kafi mɛ ze wen nu ɔ ha zang takarata ɛngɛ, tazu ɛnɛ agba nɛ wɛnɛ, nɛ ɛnɛ ade fin sɔy hinɛ wɛnɛ na. Mɛgi foy bede wɛnɛ.

¹⁵Tangere, ka ɛnɛ azɔk wɛnɛ tuka ngana pɛ ɛnɛ na. Ma, ɛnɛ mbo wɛnɛ tuka ya ɛnɛ.

¹⁶*Kongawan, wan-ha gaamɔ, aha ɛnɛ gaamɔ nɛ pɛa tɛ ha ngimɔ fɛt, ha zang mɔ fɛt. Kongawan adung hinɛ ɛnɛ fɛt.

¹⁷Yo nê mi Paul, ka ngɛriki fani ɛngɛ nɛ tɛ kɔ mi. Mi dung mɛ ngɛriki fani mɛgi ha hio takarata pɔm ndang ndang fɛt. Ɛngɛ nê tɛ ngɛraka mɔ kɔ mi.

¹⁸Kongawan pɛ ɔ, Jésus-Christ, ade *dede sila ha tɛ ɛnɛ fɛt.