Read south west gbaya 1 Timothée 1 Bible Online

1 Timothée 1 - south west gbaya bible

1 Timothée 1

¹Yo nê mi, Paul, ha ngɛriki takarata ɛngɛ. Sɔ, *Wan-kpasisi ɔ, hinɛ Jésus-Christ, ka ɔ gde tazu ɔ ha tɛ wa, mbwa gdea mi *wan-nɛtom pɛ Jésus-Christ.

²Mi ngɛriki yo ha mɛ, Timothée, ka dung kpasa bem pɔm nɛ wal mɛkara Christ. Sɔ, Bafa ɔ, hinɛ Jésus-Christ, *Kongawan pɛ ɔ, mbwa ade *dede sila ha tɛ mɛ, mbwa ade kobhe tɛ mɛ, nɛ mbwa aha mɛ gaamɔ.

³Mɛ abhɔn ka haki ha le Efeze, tuka mi mboa mɛ ha ngimɔ ka mi guotɛ mɛ nɛ ha kandɔnu Masedoane. Hazu, lɛma nde, mɛ agdɔki nu hio ma wi ka osi hio mɔ dalo hazu wal mɛkaramɔ.

⁴Mɛ tɔ ha mbwa nde, mbwa akafi mɛ ze hio to ndɔng nɛ hio wen bɔya pɛl nam pɛ hio gasa ngbabafa. Hio mɔ ndɔng dak nɛ siokafɛ pi ha nu nɛgbelea. Ma, dede wal ka Sɔ bhɔngara mɛ kpasisi nɛ wi, mbwa being yo sɔna nɛ wal mɛkaramɔ.

⁵Goto mɔ ka mi haa nu ha mɛ mɛgi, yo nde, hio wi pɛ Christ angoy hio ma mbwa nɛ ngoy ka tɛ nɛ wal saa sila, nɛ wal dede ingɔmɔ sila, nɛ wal mɛkaramɔ ka bo nɛ dambari na.

⁶Hio ma wi kiforo gdong ha deamɔ mɛgi, nɛ mbwa gdea li mbwa ha wola nɛ hio tum wen.

⁷Mbwa nɛ hɛl mɛ dung *wan-osi mbonga pɛ Moïse, ma, mbwa nɛ tɛ mbwa tɛ ing ngase goto wolamɔ pɛ mbwa, ngase goto hio wen ka mbwa mɛkiri ha yo nɛ da, na.

⁸Ɔ ingɔ nde, mbonga pɛ Moïse nɛ dedea, ka wi de mɔ lɛm nɛ yo.

⁹Ɔ aing nde, Sɔ tɛ bhɔngiri mbonga hazu *nzeng wi na. Ma, a bhɔngara yo hazu hio wan-de kpandele, wan-ngazu, *wan-kafi Sɔ, *wan-de gdangamɔ, wan-sɛn Sɔ nɛ nzɔy mɔ, nagbɛ gdibafa nɛ gdinana, nagbɛwi,

¹⁰wan-de wanza, wei ka ɔnu hinɛ ma wa wei, wan-gdongi bala, wan-tɔ dalo, wan-kan wen dalo, nɛ wi ndɔng ka sungiri kpasa osamɔ.

¹¹Kpasa osamɔ ɛngɛ, yo tɛ nɛ wal lɛkɛ-lɛkɛ *Dede Wen, ka Sɔ ka dung nɛ totɛ fɛt, gdea ha kɔ mi.

¹²Mi ha oeba ha Jésus-Christ, *Kongawan pɛ ɔ, ka haa mi ngatɛ hazu de nɛ tom pɛa. Mi ha oeba ha wɛnɛ hazu a zɔka mi tuka mboazu wi, nɛ a weka mi tuka wan-tom pɛa.

¹³Sɔngsi, mi dungɔ ha fɛngsa wɛnɛ, ha namala wɛnɛ, nɛ ha yaa wɛnɛ. Ma, a kpala tɛ de kobhe tɛ mi hazu mi tɛ ing mɔ ka mi dea na, nɛ mi tɛ mɛkiri ka wɛnɛ na.

¹⁴Kongawan pɛ ɔ, Jésus-Christ, dea *dede sila ha tɛ mi pentɛ: A haa mi mɛkaramɔ nɛ ngoy ka tɛ nɛ wal dea sɔy hinɛ wɛnɛ.

¹⁵Lɛma nde, hio wi fɛt amɛkiri kpasa wen mɛgɛ: Jésus-Christ tɛa ha nzan hazu kpasisi hio *wan-de gdangamɔ. Nɛ mi nê gasa wan-de gdangamɔ pen hio mbinga fɛt.

¹⁶Ma, yo nê ɛngi, ka Jésus-Christ dea kobhe tɛ mi hazu osi long nde, wɛnɛ baa sila wa nɛ mi, gasa wan-de gdangamɔ pen fɛt. Mɛgi, nɛ wal mi, hio wi being nde, mbwa fɛt lɛma mɛkiri wɛnɛ, nɛ mbwa fɛt lɛma kpa *tunɔ kpoo.

¹⁷Lukosomɔ nɛ *lɛkɛ-lɛkɛmɔ nê pɛ *Kongapora, ndanga Sɔ, kpoo nɛ kpoo. Wi lɛm zɔk wɛnɛ na, wɛnɛ lɛm fe na, nɛ wɛnɛ nê Kongapora kpoo. Amen.

¹⁸Timothée, bem pɔm, mi gde osamɔ ɛngɛ ha kɔ mɛ lɛm nɛ hio kuliwen ka ɛ batɔ sɔngsi hazu mɛ. Tazu mɛ agba nɛ wen ndɔng tuka nde, mɛ aku yo bi nɛ dede bulo.

¹⁹Mɛ bhɔn ka ha mɛkara Christ, nɛ mɛ pam ingɔmɔ sila pɛ mɛ nɛ saa. Hio ma wi kafa mɛ de mɛgi, nɛ mɛkaramɔ pɛ mbwa bhonda.

²⁰Himene hinɛ Alexandre ha soko wi ndɔng. Mi gdea mbwa ha kɔ *Satan hazu ndulsi mbwa. Mɛgi mbwa beyambi nde, ka mbwa afɛngsi Sɔ fin na.