Read south west gbaya 1 Timothée 3 Bible Online

1 Timothée 3 - south west gbaya bible

1 Timothée 3

¹Hio wi fɛt amɛkiri wen mɛgɛ: Wi ka ngoy mɛ dung wi mɔ zu eglize, a weka dede tom.

²Mɛgi yo lɛm nde, wi mɔ zu eglize adung nɛ ma wen ha zu wa na. Wɛnɛ adung nê wan-bhoko ndang sɔna. Wɛnɛ agan zu tɛ wa, wɛnɛ aba zu ha deamɔ pɛa, wɛnɛ aba tɛ wa nɛ zioa, wɛnɛ apam hio gɛnɛ nɛdedea, nɛ wɛnɛ aing osa mɔ ha hio wi nɛdedea.

³Ka wɛnɛ adung nê wan-fe dɔkɔ mana wan-bi tumbɔ na. Ma, wɛnɛ adung nɛ gaa nɛ mɛndi, nɛ ka wɛnɛ agde sila wa ha tɛ mbɔli na.

⁴Wɛnɛ adung nê wan-zu nam pɛa nɛ wala, wɛnɛ adung nê wi ka hio bem pɛa hil nɛ mɛndi ha si wa nɛ ke fɛt.

⁵Hazu, ka ma wi tɛ ing mɛ dung wan-zu nam pɛa na, wɛnɛ lɛma pam *giliwi mɔ eglize pɛ Sɔ mɛng?

⁶Ka wi mɔ zu eglize adung nê mbombe wi pɛ Christ na, yu nde, a betɛ sutɛ wa, nɛ Sɔ betɛ gɔn kita ba nɛ wia, gbesi tuka ka wɛnɛ gɔna nɛ kita ba nɛ *Satan.

⁷Lɛma fin nde, lingtɛ wi mɔ zu eglize adung nɛ dedea ha zala hio wi mɔ nzan yu nde, mbwa betɛ bhɛsiri wɛnɛ, nɛ Satan betɛ ba wɛnɛ ha pɔndɔ pɛa.

⁸Lɛma nde, hio diakre adung nê hio zio wi, ka bo nɛ nu bwa na. Ka mbwa anɔ dɔkɔ nɛ ngurua na, nɛ ka mbwa aki mbɔli nɛ gdanga wal na.

⁹Mbwa apam tɛwen hazu mɛkaramɔ ka Sɔ gbasa yo, nɛ saa ingɔmɔ sila.

¹⁰Hio wi ndɔng ka weki wi tuka diakre, lɛma nde, mbwa awe wia sɔngsi ing. Nɛ ka ma wen bo ha zu wa na, wia lɛma de tom tuka diakre.

¹¹Hio ko pɛ hio diakre fin, lɛma nde, mbwa adung nê hio zio wi, ka ba lingtɛ hio wi na. Mbwa agan zu tɛ mbwa, nɛ mbwa adung nɛ mboazu ha mɔ fɛt.

¹²Diakre adung nê wan-sibhoko ndang sɔna, nɛ wɛnɛ adung nê wan-zu hio bem pɛa nɛ hio nam pɛa nɛ wala.

¹³Hazu, hio diakre ndɔng ka de tom pɛ mbwa nɛdedea, hio wi beba mbwa nɛ zioa, nɛ mbwa bedung nɛ da pentɛ ha zang mɛkaramɔ ka mbwa mɛkiri nɛ Jésus-Christ.

¹⁴Mi ngɛriki takarata ɛngɛ ha mɛ, ngase mi gde tazu mi ha tɛ Sɔ nde, mi behɔ ha pɛ mɛ nɛhasa.

¹⁵Ma, ka mi ziko ha hɔa, takarata ɛngɛ beosi ha mɛ dede ndɔki deamɔ ha soko hio nam pɛ Sɔ, yo nde, ha soko *giliwi mɔ eglize pɛ tunɔ Sɔ, giliwi ndɔng ka dung tuka mbing nɛ nanga twa ka tɔn nɛ pam tɛwen.

¹⁶Wen mɛkaramɔ ka Sɔ gbasa, yo nê gasa mɔ pentɛ, siokafɛ bona. Wen ɛngɛ nde: Christ yola tɛ wi, nɛ *Nzɔy-Sɔtɛ gbasa nde, wɛnɛ nê *nzeng wi. Hio *telenge zɔka wɛnɛ, nɛ ɛ bulo wen tɛ wa ha hio kandɔ. Hio wi mɔ nzan mɛkara wɛnɛ, nɛ Sɔ guo wɛnɛ ha ngɔn gde ha lɛkɛ-lɛkɛ bhandi.