Read south west gbaya 1 Timothée 5 Bible Online

1 Timothée 5 - south west gbaya bible

1 Timothée 5

¹Ka mɛ atubhi da tubhi ha zu gbɛl wei na. Ma, mɛ mbo wɛnɛ nɛhɔn tuka bafa mɛ. Mɛ mbo hio pɔlɔmbɔ wi tuka hio ya mɛ,

²nɛ hio gbɛl bhoko tuka hio nana mɛ. Mɛ mbo hio bezunga nɛ saa sila fɛt tuka hio ya mɛ mɔ bebhoko.

³Mɛ tusisi tɛ hio nagula ndɔng ka bo nɛ wi mɛ gbakiri mbwa na.

⁴Ma, ka hio bem mana hio benday pɛ ma nagula ang, mbwa aing nde, tom Sɔ pɛ mbwa sɔngsi mɔ fɛt, yo nê pama hio nam pɛ mbwa. Mɛgi, mbwa bekifiri dedemɔ ka gdibafa nɛ gdinana bade ha tɛ mbwa. Ɛngi nê mɔ ka ha totɛ ha Sɔ.

⁵Kpasa nagula ka bo nɛ wi mɛ gbakiri wɛnɛ na, gdea tazu wa fɛt ha tɛ Sɔ kari. Nɛ wɛnɛ bhɔna ka ha ana mɔ ha kɔ Sɔ nɛ ha gɔa wɛnɛ swe nɛ zɛ.

⁶Ma, nagula ɛngɛ ka de le ha zang tandamɔ, fea kari, ngase ka wɛnɛ boka nɛ zutunɔ.

⁷Mɛ aha nu mɛgi ha hio nagula tuka nde, ma wen adung ha zu mbwa na.

⁸Ka ma wi pam hio nam pɛa nɛdedea na, pen fɛt, ka wɛnɛ pam hio wi mɔ twa pɛa nɛdedea na, wɛnɛ kafa mɛkara Christ kari. Nɛ wɛnɛ tɛ bo nɛ gdangaa pen wi ɛngɛ ka tɛ mɛkiri Christ swe ndang na.

⁹Sɔngsi ka mɛ bengɛriki ling ma nagula ha zang takarata ling pɛ hio nagula, lɛma nde, wɛnɛ akpa bɛlɛ bhukɔa mɔrkɔ zu bhukɔa ndang ing, nɛ wɛnɛ adung nê wan-si wei ndang.

¹⁰Nɛ lɛma fin nde, hio wi akɛ wen dede tom pɛa mɛgɛ: A dungɔ ha pama hio bem pɛa nɛdedea, ha baa hio gɛnɛ nɛ dede kɔ, ha fala nanga hio wi pɛ Sɔ, ha gbakara hio wan-ngɔtɛ, nɛ ha gdea tɛ wa fɛt ha dea dedemɔ.

¹¹Ma, ka mɛ angɛriki ling hio pɔlɔmbɔ nagula ha zang takarata ling pɛ hio nagula na. Hazu ka wɔ multɛ gan zu mbwa, mbwa bengoy sio wei. Ɛngi beyɔsisi mbwa ha wal pɛ Christ,

¹²nɛ kita beba mbwa, hazu mbwa tukolo gɔnanu pɛ mbwa nde, mbwa bebhɔn nê nagula hazu tom pɛ Christ.

¹³Ey, hio pɔlɔmbɔ nagula beangiri pensa ngimɔ nɛgbelea nɛ ndɛnda nɛ hio nutwa nɛnɛ. Nɛ yo bo sɔna nê ɛngi na, ma, mbwa bepi nu ha wen pɛ hio wi, nɛ mbwa bewolmɔ nɛtum.

¹⁴Mɛgi, mi ngoya nde, mbwa asi ma mbing wei, mbwa abhɛ bem, nɛ mbwa apam twa nɛdedea. Yu nde, hio ngana pɛ ɔ betɛ kpa wal mɛ tɔ nɛ gdanga lingtɛ ɔ.

¹⁵Mi tɔ mɛgi, hazu hio ma nagula toa gdong gde ha gɔnanu pɛ mbwa kari, nɛ mbwa tɛ bo ha ndara *Satan.

¹⁶Ka hio nagula ha zang nam pɛ ma bhoko pɛ Christ, lɛma nde, wɛnɛ agbakiri mbwa. Ka wɛnɛ alak mbwa gde ha kɔ *giliwi mɔ eglize na. Mɛgi giliwi ndɔng bekpa wal mɛ gbakiri hio nagula ndɔng ka bo nɛ wi na.

¹⁷Hio kotowi ka pam giliwi mɔ eglize nɛ wala, lɛma nɛ kɛamɔ tom pɛ mbwa zebwa. Pen fɛt, ɛ ndɔng ka gbɛngsi tɛ mbwa ha bulo wen pɛ Sɔ nɛ ha osamɔ Sɔ.

¹⁸Hazu wen pɛ Sɔ tɔa: «Nday ka um zik kpalmɔ hazu gbosisi gbalaa, ka mɛ ahɛl nu wa na.» Nɛ yo tɔa fin: «Wan-de tom lɛma nɛ mbɔli tom pɛa.»

¹⁹Ka ma wi fundo ma kotowi mɔ eglize, mɛ amɛkiri yo sɔna ka wan-kɛwen bwa mana tar ang.

²⁰Mɛ sɛn wen ha hio *wan-de gdangamɔ ha li wi fɛt, tuka nde, ke ade hio mbinga.

²¹Mi mbo mɛ ha li Sɔ, ha li Jésus-Christ nɛ ha li hio nzɔy *telenge nde, mɛ apam hio wen ndɔng. Ka mɛ agba soko wi na, nɛ ka mɛ ale gdong zu ma wi sungiri nɛ mbinga na.

²²Ka mɛ agde kɔ ha zu ma wi nɛhasa hazu gde wɛnɛ ha ma tom ha soko giliwi mɔ eglize na. Ka mɛ ade sɔy hinɛ ma wi ha gdangamɔ pɛa na. Mɛ pam tɛ mɛ nɛ saa.

²³Ka mɛ abhɔn ka sɔna ha nɔa nɛ gbele li na. Ma, mɛ nɔ li vigne tikiring ha wen zang mɛ, nɛ ha wen zɛlɛ ka yukiti mɛ swe fɛt.

²⁴Hio ma wi ang ka *sɛmbɔ pɛ mbwa gbo long sɔngsi gɔna kita ha zu mbwa. Ma, pɛ hio ma, sɛmbɔ pɛ mbwa begbo nɛ pata sɔna.

²⁵Yo fin gbesi nɛ hio dede tom. Pɛ hio ma wi, dede tom pɛ mbwa gboa long. Nɛ pɛ hio ma, dede tom pɛ mbwa tɛ gbo ka na. Ma, yo lɛm bhɔn nɛ wuso kpoo na.