Read south west gbaya 1 Timothée 6 Bible Online

1 Timothée 6 - south west gbaya bible

1 Timothée 6

¹Hio wi fɛt ka dung nê bala, lɛma nde, mbwa azɔk hio wan pɛ mbwa tuka wi ka lɛma nɛ ke nɛkpasa. Yu nde, hio wi betɛ fɛngsi ling Sɔ nɛ fin hio osamɔ pɛ ɔ.

²Ka bala hinɛ wan pɛa fɛt mɛkara Christ, mbwa tɛ bo nê ya ha Christ. Ngase ɛngi, ka bala abhɛsiri wan pɛa na. Ma, wɛnɛ ade tom nɛdedea pen mɔ sɔngsi, hazu wan pɛa ka kpa dedemɔ ha toma, wɛnɛ mɛkara Christ, nɛ Sɔ ngoya wɛnɛ fin. Mɛ osi mɔ ndɔng ha hio wi, nɛ mɛ mbo mbwa mɛ de yo.

³Hio ma wi ang ka osi ma mɔ nɛtɛ, ka lɛm may ngase nɛ hio kpasa wen pɛ *Kongawan pɛ ɔ, Jésus-Christ, ngase nɛ osamɔ hazu dea tom Sɔ na.

⁴Hio wi ndɔng, mbwa nê wan-sutɛ, ka ing mɔ ndang na. Mbwa nɛ hɛl ka dung tuka zɛlɛ mɔya nɛ siokafɛ hazu hio ma zuwen. Deamɔ mɛgi ha daka tili wi tuka mbwa pi ha dea silamɔ, ha mɔya, ha yaa dala, ha sumɔ gdangamɔ ha tɛ ma mbwa,

⁵ha zanga wen ndɛng-ndɛng hinɛ hio wi ka takiri mɔ nɛ gdanga, nɛ ka ing fin tɛwen na. Mbwa takiri pɛ mbwa nde, dea tom Sɔ, yo nê wal mɛ tɛ wan-kpamɔ.

⁶Kpasawen, dea tom Sɔ, yo nê gasa kpaamɔ hazu wi ka bo nɛ hɛl kpaamɔ na.

⁷Hazu, ɔ tɛa ha nzan nɛ gbele kɔ, nɛ ɔ besi fin nɛ gbele kɔ.

⁸Mɛgi, ka ɔ kpaa yɔngamɔ nɛ latɛ ɔ kari, yo alɛm nɛ ɔ.

⁹Ma, wi ndɔng ka ngoy kpaamɔ nɛdɔka, kpaamɔ ɛngɛ besɛbhili mbwa, nɛ mbwa betek ha wal mɔ Sɔ. Hɛl dɔka tum mɔ nɛ gdangamɔ baa mbwa tuka pɔndɔ. Hio mɔ ndɔng ha gdangsa wi gde ha bhonda.

¹⁰Yo nê hɛl mbɔli ha bhɛ tili gdangamɔ fɛt. Hio ma wi yɔsasa wal pɛ Sɔ hazu mbwa ngoya mbɔli nɛdɔka, nɛ mɛgi, mbwa pio tɛ mbwa ha zang dɔka ngɔtɛ.

¹¹Ma, mɛ ka dung nê wi pɛ Sɔ, mɛ sɔsi mɔ ndɔng ki fɛt. Mɛ ki wal mɛ dung nzeng nɛ mboazu ha li Sɔ. Mɛ bhɔn ka ha mɛkara Christ, mɛ ngoy ma mɛ, mɛ dung nɛ yikosila, nɛ fin nɛ gaa sila.

¹²Mɛ bi dede bulo ha wal mɔ Sɔ tuka nde, mɛ akpa *tunɔ kpoo tuka kɛamɔ. Sɔ saa mɛ hazu kpa yo ha ngimɔ ka mɛ kɛa wen mɛkaramɔ pɛ mɛ ha li hio dɔka wi.

¹³Ha li Sɔ, ka ha tunɔ ha mɔ fɛt, nɛ ha li Jésus-Christ ka kɛa wen pɛa nɛdedea ha li gɔfɔrma Ponse-Pilate, mi mbo mɛ nde,

¹⁴mɛ apam haanu pɔm. Mɛ pam yo nɛ saa, bo nɛ wen hazua na, hɔ ha ngimɔ ka *Kongawan pɛ ɔ, Jésus-Christ, bepe nɛ.

¹⁵A bepe ha ngimɔ ka Sɔ beosi. Sɔ ndang nê wan hazu mɔ fɛt, wɛnɛ nɛ totɛ fɛt, wɛnɛ nê *Kongapora ha zu hio kongapora fɛt, wɛnɛ nê Kongawan ha zu hio kongawan fɛt.

¹⁶Wɛnɛ ndang sɔna lɛm fe na, nɛ wɛnɛ de le ha bhandi saamɔ ka wi lɛm nɛ ang na. Ma wi ndang tɛ zɔk wɛnɛ na, nɛ ma wi ndang lɛm zɔk wɛnɛ na. Lukosomɔ nɛ ziomɔ kpoo ha kɔ wa! Amen.

¹⁷Mɛ ha nu ha hio wan-kpamɔ ha zang nzan ɛngɛ nde, ka mbwa asutɛ na, nɛ ka mbwa agde tazu mbwa ha kpaamɔ ɛngɛ ka bepen na. Ma, lɛma nde, mbwa agde tazu mbwa ha tɛ Sɔ ka ha ɔ yɛbhɛ-yɛbhɛ mɔ fɛt nde, ka ɔ adung nɛ totɛ.

¹⁸Mɛ ha nu ha mbwa nde, mbwa ade dedemɔ, mbwa ade hio dɔka dede tom, mbwa ade ngay nɛ *dede sila, nɛ mbwa akapini kpaamɔ pɛ mbwa.

¹⁹Ka mbwa de mɛgi, mbwa bewesiri dede kpaamɔ hazu ngimɔ ka betɛ bin, tuka nde, mbwa akpa kpasa tunɔ tuka kɛamɔ.

²⁰Timothée, mɛ pam mɔ ka Sɔ gdea ha kɔ mɛ, nɛdedea. Mɛ kafi hio ngbundu wolamɔ ka sungiri Sɔ, nɛ hio zanga wen ka ɛ sa nɛ tum nde, ingɔmɔ.

²¹Hio ma wi ka mɛkara ingɔmɔ ɛngɛ, yɔa wal mɛkara Christ. Sɔ ade dede sila ha tɛ ɛnɛ.