Read south west gbaya 2 Timothée 2 Bible Online

2 Timothée 2 - south west gbaya bible

2 Timothée 2

¹Mɛ ka dung tuka bem pɔm, mɛ gde Jésus-Christ aha mɛ ngatɛ nɛ wal *dede sila pɛa.

²Mɔ ka mɛ zea ha nu mi ha li hio dɔka wi, lɛma nde, mɛ aosi yo ha hio mboazu wi ka lɛma osi yo fin ha hio mbinga.

³Mɛ ayɔng yini ha zang yeksamɔ tuka dede wan-bibulo pɛ Jésus-Christ.

⁴Wan-bibulo ka ngoy ha totɛ ha kagama pɛa, a lɛm gde sila wa ha tom pɛ hio gbele wi na.

⁵Wan-de kpakpay ka sɔwi lɛm nɛ *mbonga na, lɛm kpa kɛamɔ pɛa na.

⁶Wan-gɔm fɔ ka de ngatom, lɛma nde, wɛnɛ adung nê bosi wi ha kpaa nu kpalmɔa.

⁷Mɛ aba zu mɛ ha wen ndɔng ka mi tɔ ha mɛ. *Kongawan beha mɛ mbaramɔ hazu ing goto mɔ fɛt.

⁸Tazu mɛ agba nɛ Jésus-Christ, bezang pɛ *kongapora David. A fea, nɛ a guotɛ ha soko hio fiowi. Ɛngi nê goto *Dede Wen ka mi bul ha hio wi.

⁹Mi ha kpaa yeksamɔ, nɛ mi nɛ gbazɔbhɔ tuka gdanga wi, hazu mi ha bulo Dede Wen ɛngɛ. Ma, ɛ lɛm hɛl wen pɛ Sɔ na.

¹⁰Hazu ɛngi, mi ha yɔnga yini ha mɔ fɛt tuka nde, hio wi ndɔng ka Sɔ weka, akpa *mɔkpasi ka Jésus-Christ bekpasisi nɛ mbwa. Mɛgi, mbwa fin bekpa *lɛkɛ-lɛkɛmɔ kpoo.

¹¹Hio wi fɛt amɛkiri wen mɛgɛ: Ka ɔ fea hinɛ Christ gbesi, ɔ bedung fin nɛ zutunɔ hinɛ wɛnɛ gbesi.

¹²Ka ɔ ba sila ɔ ha zang yeksamɔ, ɔ bedung nê kongapora hinɛ wɛnɛ fin. Ka ɔ kafa wɛnɛ, a bekafi ɔ fin.

¹³Ka ɔ nê yambala zu wi, a bhɔn pɛa nɛ mboazu, hazu a lɛm kafi wen pɛa nɛ pɛa tɛ na.

¹⁴Mɛ gba tazu hio wi fɛt nɛ wen ndɔng ki. Mɛ ha nu ha mbwa ha li Sɔ nde, ka mbwa amɔy hazu hio tum wen na. Mɔya mɛgi lɛm gbakiri wi na, ma, yo bebhondisi nɛ wi ndɔng ka ze yo.

¹⁵Mɛ gbɛngsi tɛ mɛ nde, Sɔ aba mɛ nɛ zioa tuka wan-tom ka bo nɛ foy tom pɛa na, nɛ ka bul tɛwen nzeng.

¹⁶Ka mɛ api nu mɛ ha zanga hio tum wen ka sungiri Sɔ, na. Hazu hio wi ndɔng ka zang wen mɛgi, mbwa bekafi Sɔ nɛnɛ sɔngsi.

¹⁷Mɛgi, osamɔ pɛ mbwa dung tuka gbadalɛ ka begdangsi tɛ wi. Himene hinɛ Filete ha soko wi ndɔng ki.

¹⁸Mbwa laka tɛwen gde, hazu mbwa ha tɔa nde, Sɔ guo hio fiowi kari. Mɛgi, mbwa gdangsa mɛkaramɔ pɛ hio dɔka wi.

¹⁹Ma, tɛwen pɛ Sɔ dung tuka nga nanga twa ka ɛ gɔna ha tɛa nde, «*Kongawan ingɔ hio wi pɛa», nɛ nde, «Hio wi fɛt ka sa ling Kongawan hazu dung nê pɛa, mbwa alak dea gdangamɔ gde.»

²⁰Ha zang gasa twa hio tili kpana nɛtɛ-nɛtɛ ang. Hio ma mɔ gbɛbolo mana mɔ bubolo ang, nɛ hio ma mɔ ge mana mɔ te ang fin. Hio ma de tom ha swe yenga, nɛ hio ma ha gbele swe.

²¹Wi ka lak gdanga osamɔ ndɔng ki fɛt gde, bedung tuka kpana mɔ swe yenga. A bedung nɛ nzɔya, nɛ a begbakiri wan pɛa ha dea hio dede tom fɛt.

²²Mɛ ayu hio hɛl ka ba sila pɔlɔmbɔ wi. Mɛ ki wal mɛ de mɔ nzeng, mɛ mɛkiri Christ nɛkpasa, mɛ ngoy ma mɛ, nɛ mɛ dung nɛ gaamɔ hinɛ wi ndɔng ka gɔ Kongawan nɛ saa sila.

²³Ka mɛ api nu mɛ ha zanga hio yera tum wen na, hazu mɛ ingɔ nde, zanga wen mɛgi bedak wi pi ha mɔya.

²⁴Yo lɛm nde, wan-tom pɛ Kongawan adung nê wan-mɔy mɔya na. Ma, wɛnɛ adung nê wan-ga sila ha tɛ wi fɛt, dede wan-osimɔ, nɛ fin wan-ba sila ha zang ngɔtɛ.

²⁵Lɛma nde, wɛnɛ aosimɔ nɛ gaa sila ha hio wan-lunsiri wen ha nu wa. Mana Sɔ beha mbwa wal mɛ kifiri sila hazu ing nɛ tɛwen.

²⁶Mɛgi, li mbwa bebha fin nɛ mbinga ngɛlɛlɛ, nɛ mbwa bekpɔy ha pɔndɔ pɛ *Satan, ka baa mbwa hazu nde, mbwa ade mɔ ka sila wa ngoya.