Read south west gbaya 2 Timothée 4 Bible Online

2 Timothée 4 - south west gbaya bible

2 Timothée 4

¹Ha ngimɔ ka Jésus-Christ bepe nɛ tuka *kongapora, a begɔn kita ha zu hio fiowi nɛ hio tunɔwi. Mɛgi, mi ha nu ha mɛ ha li Sɔ nɛ ha li Jésus-Christ nde,

²mɛ abul wen pɛ Sɔ, nɛ mɛ abhɔn ha yo nɛ nɔa nging ha dede ngimɔ nɛ ha gdanga ngimɔ fin. Mɛ agbasi ha hio wi gdanga deamɔ pɛ mbwa, mɛ asɛn wen ha mbwa, nɛ mɛ ambo mbwa. Mɛ ade mɛgi nɛ wal osa mɔ Sɔ ha mbwa nɛ yikosila fɛt.

³Hazu ma ngimɔ behɔ ka hio wi ngoy ze fin kpasa osamɔ na. Mbwa bede sɔna nɛ mɔ ka sila mbwa ngoya, nɛ mbwa bewesiri hio dɔka wan-osimɔ, ka beosi mɔ ka dung nɛ yefaa ha zala mbwa.

⁴Mbwa begdɔki zala ha tɛwen, nɛ mbwa bezifili tɛ hazu lɛngi zala ha hio yera towen.

⁵Ma, pɛ mɛ, mɛ abhɔn ngɛlɛlɛ ha mɔ fɛt. Mɛ yɔng yini ha zang yeksamɔ, mɛ de tom bulo *Dede Wen, nɛ mɛ lɛmsiri tom ka Sɔ gdea ha kɔ mɛ.

⁶Pɔm, ngimɔ ka ɛ beha mi tuka sadaka ha Sɔ hɔa kari. Mi tɛ bo sanga mɛ fe.

⁷Mi bio dede bulo, mi lɛmsara sɔawi ha kpakpay kari, mi pama mɛkara Christ nɛ nɔa.

⁸Mɔ sising, kɛamɔ pɛ wan-gan bulo ha kera mi hazu mi dea mɔ nzeng. Kongawan, nzeng wan-gɔn kita, beha mi kɛamɔ ɛngɛ ha swe ka wɛnɛ bepe nɛ. A lɛm ha yo sɔna ha mi gbatɛ na, ma, a beha yo fin ha hio wi ndɔng fɛt ka keri kiforo pɛa nɛ totɛ.

⁹Mɛ ki wal mɛ tɛ nɛhasa ha pɔm.

¹⁰Hazu Demas laka mi gde hazu a gdea sila wa ha mɔ nzan ɛngɛ. A pena si ha le Tesalonike. Kresan nɛa pɛa ha kandɔnu Galasi, nɛ Tite pena pɛa nɛ ha kandɔnu Dalmasi.

¹¹Yo sɔna nê Luc ha bhɔn hakɛ hinɛ mi. Ka mɛ ha tɛa, mɛ ku Marc tɛnɛ ka wɛnɛ agbakiri mi ha tom.

¹²Mi tomsa Tishike ha le Efeze.

¹³Ka mɛ ha tɛa, mɛ ku gasa latɛ pɔm ka mi gdea ha le Troas ha twa pɛ Karpus tɛnɛ ha mi. Mɛ ku fin hio takarata pɔm tɛnɛ ha mi, pen mɔ fɛt, ɛ ndɔng ka ɛ dea nɛ kotu.

¹⁴Alexandre, wan-dɔla, dea gdangamɔ sungiri nɛ mi pentɛ. *Kongawan bekɛ wɛnɛ lɛm nɛ deamɔ pɛa.

¹⁵Mɛ fin, mɛ pangay nɛ wɛnɛ. Hazu a sungoro hio wen nu ɔ nɛngaya.

¹⁶Ha bosi ngimɔ ka mi kɛa wen tɛ mi ha li kita, ma wi ndang tɛ le gdong mi na. Wi fɛt laka mi gde. Ka Sɔ atɔl yo tuka gdangamɔ ha zu mbwa na.

¹⁷Ma, Kongawan lea gdong mi, nɛ a haa mi ngatɛ. Mɛgi, mi kpaa wal mɛ bul *Dede Wen lɛm fɛt, nɛ hio kandɔ fɛt zea yo. Ey, Kongawan gbosasa mi ha nu gbabio yunɛ.

¹⁸Kongawan begbosisi mi ha gdangamɔ fɛt yunɛ, nɛ a bekpasisi mi hazu le ha *Kongakandɔ Ngɔn pɛa. Lukosomɔ nê pɛa kpoo nɛ kpoo! Amen.

¹⁹Mɛ fan Priscille hinɛ Akilas ha mi. Mɛ fan fin hio nam pɛ Onezifore.

²⁰Eraste bhɔna pɛa ha Korente, nɛ mi gdea Trofime ha Milet hazu tɛ wa nɛ yimɔa.

²¹Mɛ hasi tɛ mɛ hazu hɔ hakɛ sɔngsi nɛ ngimɔ gangmɔ. Ebule, Pudan, Linus, Claudia hinɛ hio ya ha Christ hakɛ fɛt fana mɛ.

²²*Kongawan adung hinɛ mɛ. Nɛ wɛnɛ ade *dede sila ha tɛ ɛnɛ.