Read south west gbaya Tite 2 Bible Online

Tite 2 - south west gbaya bible

Tite 2

¹Ma, pɛ mɛ, mɛ osi mɔ ka lɛm nɛ kpasa osamɔ ha wal mɔ Sɔ.

²Mɛ tɔ ha hio koto wei nde, mbwa adung ngɛlɛlɛ, mbwa adung zio wi ha li wi fɛt, mbwa aba zu ha deamɔ pɛ mbwa, mbwa aba nɛ nɔa ha wal mɔ Sɔ, sila mbwa adon nɛ ngoy, nɛ mbwa adung nɛ yikosila.

³Gbesi tuka ɛngi, mɛ tɔ ha hio koto bhoko nde, mbwa ade mɔ tuka nzɔy wi ha li Sɔ. Ka mbwa atɔ gdanga lingtɛ dan mbwa na. Ka mbwa adung bala ha si dɔkɔ na. Ma, mbwa adung hio wan-osi dede deamɔ.

⁴Mbwa aosi ha hio pɔlɔmbɔ bhoko wal mɛ ngoy wei pɛ mbwa nɛ hio bem pɛ mbwa,

⁵wal mɛ ba zu ha deamɔ pɛ mbwa, wal mɛ dung nɛ mboazu, wal mɛ de dede tom zang twa, wal mɛ ze nu wei pɛ mbwa. Mbwa ade mɛgi yu nde, hio wi betɛ fɛngsi Wen pɛ Sɔ.

⁶Gbesi, mɛ osi ha hio pɔlɔmbɔ wei nde, mbwa aba zu

⁷ha deamɔ pɛ mbwa fɛt. Pɛ mɛ, lɛma nde, ha zang mɔ fɛt, hio olo wi azɔk hio dede deamɔ pɛ mɛ hazu de nɛ pɛ mbwa. Wal ka mɛ osi nɛ mɔ adung nɛ zioa nɛ kpasa ha li wi.

⁸Mɛ osi mɔ nzeng ka ɛ lɛm sungiri yo na, tuka nde, foy ade hio ngana pɛ ɔ hazu mbwa lɛm tɔ ma gdanga wen ha tɛ ɔ na.

⁹Mɛ mbo hio bala nde, mbwa aze nu hio wan pɛ mbwa ha zang mɔ fɛt. Mbwa ade mɔ ka sila wan pɛ mbwa ngoya. Ka mbwa alunsiri wen ha nu hio wan pɛ mbwa na.

¹⁰Ka mbwa azu mɔ na. Ma, mbwa agbasi tɛ mbwa nɛ dedea nɛ mboazu tuka nde, hio wi alukisi osamɔ hazu Sɔ, *wan-kpasisi ɔ.

¹¹Ey, Sɔ gbasa long nde, wɛnɛ de *dede sila ha tɛ hio wi hazu wɛnɛ ngoy kpasisi mbwa fɛt.

¹²Nɛ wal dede sila pɛa, Sɔ osi mɔ ha ɔ nde, ɔ alak gdanga deamɔ nɛ hio wɔ mɔ nzan gde. Ha nzan ɛngɛ sising, lɛma nde, ɔ aba zu ha deamɔ pɛ ɔ, nɛ ɔ ade mɔ nzeng nɛ mboazu ha li Sɔ.

¹³Ɔ ade mɛgi keri nɛ swe totɛ ka ɔ gde tazu ɔ ang. Ha swea, Jésus-Christ, gasa Sɔ pɛ ɔ nɛ Wan-kpasisi ɔ, begbasi tɛ nɛ *lɛkɛ-lɛkɛmɔ pɛa.

¹⁴Jésus-Christ fea gɔn zu ɔ hazu yangi ɔ ha dea tili kpandele fɛt, nɛ hazu sasisi ɔ tuka nde, ɔ adung nê kandɔ pɛa, ka gbɛngsi tɛ swe fɛt ha dea dedemɔ.

¹⁵Mɛ osi mɔ ndɔng ki ha hio wi, mɛ mbo mbwa, nɛ mɛ gay mbwa nɛ ziomɔ fɛt ka Sɔ haa ha mɛ. Ka ma wi ndang abhɛsiri mɛ na.