Read south west gbaya Tite 3 Bible Online

Tite 3 - south west gbaya bible

Tite 3

¹Mɛ gba tazu hio wi pɛ Christ nde, mbwa agde tɛ mbwa ha si hio wan-le nɛ hio nasara. Lɛma nde, mbwa aze nu mbwa, nɛ mbwa adung sanga ha dea dedemɔ kpoo.

²Ka mbwa afɛngsi wi na. Ka mbwa amɔy hinɛ wi na. Ma, mbwa adung nɛ gaa, nɛ mbwa ade mɔka sila ha tɛ wi fɛt.

³Hazu, ɔ fin, ɔ badung sɔngsi nê hio wi ka zu mbwa bona, nɛ wan-de kpandele, nɛ ɔ bayɔ nzeng wal pɛ Sɔ. Ɔ badung nê bala ha si tili golamɔ nɛ wɔ mɔ nzan. Ɔ bapensi tunɔ pɛ ɔ ha dea gdangamɔ nɛ silamɔ. Ɔ basɛn hio wi, nɛ mbwa basɛn fin ɔ.

⁴Ma, Sɔ, *Wan-kpasisi ɔ, gbasa mɔ long nde, wɛnɛ ngoya hio wi, nɛ wɛnɛ ngoy de dedemɔ ha tɛ mbwa.

⁵Sɔ kpasasa ɔ bo hazu ɔ dea mɔ nzeng na, ma, a kpasasa ɔ hazu a dea kobhe tɛ ɔ. A bhɛa ɔ nɛ mbinga nɛ wal li ka ɛ gdumso ɔ ang, nɛ a haa ɔ mbombe tunɔ nɛ wal *Nzɔy-Sɔtɛ.

⁶Sɔ donsa ɔ lɛtɛtɛ nɛ Nzɔy-Sɔtɛ nɛ wal Jésus-Christ, Wan-kpasisi ɔ,

⁷tuka nde, Sɔ aha ɔ likɔ ka ɔ gde tazu ɔ ang. Yo nde, a beha ɔ *tunɔ kpoo hazu a gdea ɔ nzeng ha li wa nɛ wal *dede sila pɛa.

⁸Wen ndɔng ka mi tɔa, yo nê tɛwen. Mi ngoya nde, mɛ aputiri yo swe fɛt ha wi ndɔng ka mɛkara Sɔ, tuka nde, mbwa agbɛngsi tɛ nɛkpasa ha dea dedemɔ. Ɛngi nɛ dedea, nɛ yo ha gbakara hio wi.

⁹Ka hio wi ha zanga yera wen hazu pɛl nam pɛ hio gasa ngbabafa ɔ, mana mbwa ha mɔya hazu wen *mbonga pɛ Moïse, ka mɛ api nu mɛ ang na. Ɛ ndɔng ki nê hio gombo wen ka lɛm gbakiri wi na.

¹⁰Ka ma wi de nde, *giliwi mɔ eglize agba soko, mɛ sɛn wen ha wia nɛ bosia. Nɛ ka wɛnɛ bhɔna ka ha dea, mɛ sɛn wen ha wɛnɛ zebwa fin. Nɛ ka wɛnɛ ze mɛ na, mɛ mul wɛnɛ pi.

¹¹Mɛ ingɔ nde, hio tili wi mɛgi gdea gdong ha nzeng wal pɛ Sɔ kari. Gdangamɔ ka mbwa de, gɔna kita ba mbwa kari.

¹²Mi betomsi Artemas mana Tishike nɛ ha pɛ mɛ. Ka ma ha soko mbwa hɔa haki, mɛ kimbili mɛ tɛ, tɛ kpa mi ha le Nikopolis. Mi bhɔngara nde, mi bedung haki kanɛ ngimɔ gangmɔ kara.

¹³Ka Zenas, wan-le gdong wen, hinɛ Apolos begutɛ ha pɛ mɛ hazu nɛ gɛnɛ, mɛ gbakiri mbwa tuka nde, ma mɔ akɔpi mbwa na.

¹⁴Lɛma nde, hio wi pɛ ɔ fin ayambi mɛ gbɛngsi tɛ ha dea dedemɔ hazu gbakiri wi ndɔng ka mɔ kɔpi mbwa nɛkpasa. Mɛgi, hio wi pɛ ɔ beway nɛ dede waya.

¹⁵Hio wi ka dung hinɛ mi hakɛ, fana mɛ. Mɛ fan fin hio ndɔngsila ɔ, ka mɛkara Christ. Sɔ ade *dede sila ha tɛ ɛnɛ fɛt.