Read south west gbaya Philémon 1 Bible Online

Philémon 1 - south west gbaya bible

Philémon 1

¹Yo nê ɔ Paul, wan-zɔbhɔ hazu Jésus-Christ, hinɛ ya ɔ Timothée ka ngɛriki takarata ɛngɛ ha mɛ Philémon, ndɔngsila ɔ nɛ sɔy-tom pɛ ɔ.

²Ɔ ngɛriki yo fin ha Apia, ya ɔ bebhoko, ha Arshipe, sɔy-bibulo pɛ ɔ ha wal mɔ Sɔ, nɛ fin ha *giliwi mɔ eglize fɛt ka dung mɛ wesiri may ha twa pɛ mɛ.

³Sɔ, Bafa ɔ hinɛ *Kongawan Jésus-Christ ade *dede sila ha tɛ ɛnɛ, nɛ mbwa aha gaamɔ ha ɛnɛ.

⁴Swe fɛt ka mi gɔ Sɔ, mi takiri ha mɛ, nɛ mi tɔ oeba ha wɛnɛ hazu mɛ.

⁵Hazu mi zea nde, mɛ ngoya hio wi pɛ Sɔ fɛt gdang, nɛ mɛ mɛkara *Kongawan Jésus nɛkpasa.

⁶Ɔ hinɛ mɛ ha dea sɔy hinɛ may hazu ɔ fɛt mɛkara Sɔ gbesi. Mi gɔ Sɔ nde, mɛkaramɔ pɛ mɛ ade nde, mɛ aing pen mɔ sɔngsi hio dedemɔ ka ɔ lɛma de mɛ lukisi nɛ Christ.

⁷Ya mi, mi zea nde, mɛ haa totɛ ha sila hio wi pɛ Sɔ nɛ wal ngoy pɛ mɛ. Ɛngi haa mi gasa totɛ nɛ yo yɔkala mi fin.

⁸Christ haa mi ziomɔ mɛ ha nu ha mɛ nde, mɛ ade mɔ ka lɛma. Tangere, mi ngoy de mɛgi na.

⁹Ma, mi lokitɛ ha mɛ nɛ wal ngoy. Yo nê mi, Paul, kotowi ka dung ha twa zɔbhɔ sising hazu Jésus-Christ,

¹⁰ka lokitɛ ha mɛ hazu wen pɛ Onezime, bem pɔm ka mi bhɛa ha wal mɔ Sɔ hakɛ ha zang twa zɔbhɔ.

¹¹Sɔngsi, wɛnɛ tɛ gbakiri mɛ na. Ma, sising, wɛnɛ ha gbakara ɔ hinɛ mɛ.

¹²Nɛ mi tomsi wɛnɛ kifiri si ha pɛ mɛ, wɛnɛ ka dung nê tɛ sila mi.

¹³Sising mi dung ha twa zɔbhɔ, hazu mi bulo *Dede Wen. Yo nê ɛngi, ka mi ngoya nde, wɛnɛ abhɔn hapɛtɛ mi mɛ de tom ha mi, hazu mɛ nɛ pɛ mɛ tɛ lɛm gbakiri mi hakɛ na.

¹⁴Ma, mi ngoy de ma mɔ ndang na, hazu lɛma nde, mɛ amɛkiri yo sɔngsi. Mi ngoy nɔsisi mɛ hazu de dedemɔ na, ma, lɛma nde, mɛ ade yo nɛ wal *dede sila pɛ mɛ.

¹⁵Onezime laka mɛ gde hazu ma ngimɔ. Mana mɔ hɔa mɛgi tuka nde, wɛnɛ akifiri tɛ bhɔn hinɛ mɛ kpoo.

¹⁶Ma, a bekifiri bo sɔna tuka bala na, ma, a tɛ bo nɛ zioa pen bala, a tɛ bo nê ya ɔ ka ɔ ngoya. Pɔm, mi ngoya wɛnɛ gdang, lɛma nde, mɛ angoy wɛnɛ pen zua, bo sɔna tuka bala na, ma, fin tuka ya mɛ ha *Kongawan.

¹⁷Ka mɛ zɔk mi tuka sɔy-tom pɛ mɛ nɛkpasa, mɛ aba wɛnɛ gbesi tuka mɛ beba mi.

¹⁸Ka wɛnɛ dea ma mɔ nɛ gdanga ha tɛ mɛ, mana yamando pɛ mɛ ha kɔ wa, mɛ tɔl yo gde ha zu mi.

¹⁹Mi, Paul, mi ngɛriki wen mɛgɛ nɛ tɛ kɔ mi nde, mi bekpe yo fɛt ha mɛ. Ma, mi nê bafa mɛ ha wal mɔ Sɔ. Mɛgi, bo nê tunɔ pɛ mɛ fɛt dung tuka yamando pɔm ha kɔ mɛ, na nde?

²⁰Ey, ya mi, mɛ de dedemɔ ɛngɛ ha mi hazu mɛ ngoya Kongawan. Mɛ ha totɛ ha sila mi, hazu ɔ hinɛ mɛ fɛt, ɔ nê hio wi pɛ Christ.

²¹Mi gde tazu mi ha mɛ nde, mɛ aze nu mi. Hazu ɛngi, mi ngɛriki takarata ɛngɛ ha mɛ. Nɛ mi ingɔ fin nde, mɛ bede mɔ pen mɔ ka mi ana.

²²Mi ani mɛ fin hazu bhɔngiri ma bhandi gde ha mi. Hazu mi gde tazu mi ha tɛ Sɔ nde, wɛnɛ aze gɔamɔ pɛ ɛnɛ, nɛ wɛnɛ agbosisi liwal ha mi mɛ nɛ ha pɛ ɛnɛ.

²³Epafras, sɔy-de zɔbhɔ pɔm hazu Jésus-Christ fana mɛ.

²⁴Hio sɔy-tom pɔm, Marc, Aristarke, Demas nɛ Luc fana mɛ fin.

²⁵*Kongawan Jésus-Christ ade *dede sila ha tɛ ɛnɛ fɛt.