Read south west gbaya Hebro 11 Bible Online

Hebro 11 - south west gbaya bible

Hebro 11

¹Ka ma wi mɛkara Sɔ, wɛnɛ ingɔ nɛdedea nde, Sɔ beha wɛnɛ hio mɔ ndɔng ka wɛnɛ gde tazu wa ang. Ngase ka wɛnɛ tɛ zɔk ka mɔa nɛ li wa na, a ingɔ nɛdedea ngbak nde, mɔa ang.

²Hio gasa ngbabafa ɔ bamɛkiri Sɔ. Yo nê hazu ɛngi ka Sɔ tɔa dede lingtɛ mbwa.

³Nɛ wal mɛkara Sɔ, ɔ ingɔ long nde, Sɔ dea hio mɔ nzan fɛt nɛ wal wen nu wa. A kuo hio mɔ ka wi zɔk na, de nɛ hio mɔ ka wi zɔk.

⁴Nɛ wal mɛkara Sɔ, Abel haa dede sadaka ha Sɔ ka pena pɛ Kain. Nɛ ha wen zu mɛkaramɔ pɛa, Sɔ zɔka wɛnɛ tuka *nzeng wi, nɛ a mɛkara sadaka pɛa. Ngase ka Abel fea, a bhɔna ka ha wolamɔ ha ɔ nɛ wal mɛkaramɔ pɛa.

⁵Nɛ wal mɛkara Sɔ, Henok tɛ fe na, nɛ Sɔ kuo wɛnɛ gde ha ngɔn. Ma wi tɛ zɔk wɛnɛ fin na, hazu Sɔ kuo wɛnɛ gde ha ngɔn. Takarata pɛ Sɔ tɔa nde, sɔngsi kuo Henok gde ha ngɔn, Sɔ bade totɛ tɛ wa.

⁶Ka ma wi tɛ mɛkiri ka Sɔ na, Sɔ lɛm de totɛ tɛ wa na. Hazu wi ka tiki nɛ hapɛtɛ Sɔ hazu gɔ wɛnɛ, dea ka de nde, wia amɛkiri nde, Sɔ ang. Nɛ dea fin nde, wia aing nde, Sɔ bekɛ wi ndɔng ka ki wal mɛ ing wɛnɛ.

⁷Nɛ wal mɛkara Sɔ, Noe zea nu Sɔ, ka gbaa tazu wa nɛ mbengli ka behɔ. Ngase ka wɛnɛ tɛ zɔk ka mbenglia na, a dea gasa kuga. Nɛ wɛnɛ hinɛ hio nam pɛa kpasa ang. Nɛ wal dea mɛgi, a gɔna kita ha zu hio wi mɔ nzan, nɛ a tɛ bo nzeng ha li Sɔ nɛ wal mɛkara wɛnɛ.

⁸Nɛ wal mɛkara Sɔ, Abraham zea nu Sɔ, ka saa wɛnɛ mɛ nɛ ha ma mbing kandɔnu. Hazu Sɔ gɔna nu ha wɛnɛ nde, wɛnɛ bekpa kandɔnu ɛngɛ tuka likɔ, Abraham pena nɛ ang, ngase ka wɛnɛ tɛ ing ka bhandia sɔngsi na.

⁹Nɛ wal mɛkara Sɔ, Abraham dea le tuka tombɔ ha kandɔnu ka Sɔ gɔna nua mɛ ha ha wɛnɛ hinɛ Isaac nɛ Jacob gbesi. Mbwa fɛt dungɔ ha ɔa haki ha zang hio twa ka ɛ dea nɛ la, ndoti nɛnɛ nɛ ngɔn.

¹⁰Abraham dea mɛgi hazu a dungɔ ha kera le ɛngɛ ka Sɔ bede, nɛ ka nangaa bedung nɛ nɔa ngi-ngi-ngi.

¹¹Nɛ wal mɛkara Sɔ, Abraham kpaa ngatɛ mɛ gde zang ha Sara, ngase ka mbwa gbɛla fɛt kari, nɛ ngase ka Sara badung nê nakomba. Hazu a ingɔ nɛdedea nde, Sɔ nɛ mboazu mɛ lɛmsiri gɔnanu pɛa.

¹²Yo nê ɛngi, hio bem zang ma wi ndang, ngase a gbɛla kuyɛɛ, yɛbha tuka sɔla ha zang ngɔn, nɛ tuka gbala lembe ha nukolo nana-litɔng, ka ɛ lɛm tɔl fɛt na.

¹³Hio wi ndɔng fɛt badung ka ha mɛkara Sɔ tee kanɛ mbwa fea. Pɛ mbwa, mbwa tɛ kpa hio mɔ ka Sɔ bagɔn nua na. Ma, mbwa zɔka yo nɛ yɛa, nɛ mbwa dea totɛa. Mbwa batɔ se long nde, mbwa ka nê hio gɔn-gɛnɛ wi nɛ hio tombɔ ha zu nu ɛngɛ.

¹⁴Ka hio wi wolmɔ mɛgi, mbwa osa long nde, mbwa ha kio kpasa le pɛ mbwa.

¹⁵Ka bo se nde, mbwa atakiri le ka mbwa guotɛ ang tɛnɛ, ki mbwa bakifiri si nɛ zupata, hazu wal mɛ kifiri badung ang.

¹⁶Ma, mbwa dea hɛl mɛ de le ha ma dede le ka pena kotoa. Dede lea, yo nê zang ngɔn. Hazu ɛngi, foy tɛ de Sɔ na, ka mbwa saa wɛnɛ nde, Sɔ pɛ mbwa. Kpasawen, a bhɔngara ma gasa le hazu mbwa.

¹⁷Nɛ wal mɛkara Sɔ, Abraham bhɔngara mɔ fɛt hazu ha Isaac nɛ sadaka, ha ngimɔ ka Sɔ wea sila wa. Abraham, mɛkara mɛ ha ndanga bewei pɛa nɛ sadaka ha Sɔ, ngase ka Sɔ gɔna nu

¹⁸ha wɛnɛ nde: «Mɛ bekpa bin hio bezang nɛ wal Isaac.»

¹⁹Abraham ingɔ nde, Sɔ nɛ ngatɛ mɛ tunsi Isaac ha fio. Mɛgi, yo dungɔ tuka nde, Isaac fea fe nɛ a guotɛ fin.

²⁰Nɛ wal mɛkara Sɔ, Isaac wola dede wen ha zu Jacob nɛ Ezau ha wen mɔ ka behɔ ha tɛ mbwa bin.

²¹Nɛ wal mɛkara Sɔ, Jacob wola dede wen ha zu hio bem pɛ Joseph bwa, ha ngimɔ ka wɛnɛ dungɔ sanga-sanga nɛ fio. A guotɛ tɔn tɛ wa ha zu tongolo pɛa, nɛ a lukoso Sɔ.

²²Nɛ wal mɛkara Sɔ, Joseph tɔa ha ngimɔ ka wɛnɛ dungɔ sanga-sanga nɛ fio, nde, hio wi mɔ *Israel begbo bin ha kandɔnu Ezipte. Nɛ a haa nu nde, mbwa aku hio gbalatɛ wa gbonɛ ha ngimɔ ɛngi.

²³Nɛ wal mɛkara Sɔ, bafa mɛ Moïse nɛ nana wa wuso wɛnɛ ha zang twa lɛm kilize tar hapata bhɛ pɛa. Mbwa zɔka nde, bem ɛngɛ nɛ lɔkaa, nɛ mbwa tɛ yu ke *mbonga pɛ *kongapora mɔ Ezipte na.

²⁴Nɛ wal mɛkara Sɔ, Moïse ka wɛnɛ gasa kari, a kafa nde, hio wi asa wɛnɛ nde, bekoko pɛ kongapora mɔ Ezipte.

²⁵A mɛkara mɛ kpa yeksamɔ gbesi hinɛ kandɔ pɛ Sɔ, pen nde, wɛnɛ akpa totɛ ma bengimɔ nɛ wal dea gdangamɔ.

²⁶A ingɔ ha zang sila wa nde, ka hio wi bhɛsiri wɛnɛ tuka mbwa bhɛsiri nɛ *Mesi, ɛngi nɛ dedea pen nde, wɛnɛ akpa hio dedemɔ mɔ kandɔnu Ezipte. Moïse dea mɛgi, hazu wɛnɛ gdea li wa ha kɛamɔ, ka Sɔ bekɛ bin nɛ wɛnɛ.

²⁷Nɛ wal mɛkara Sɔ, Moïse guotɛ ha kandɔnu Ezipte pen, a tɛ yu ke ngambi pɛ kongapora na. A baa da hazu yo dungɔ tuka nde, wɛnɛ ha zɔka Sɔ ka ɛ lɛm zɔk na.

²⁸Nɛ wal mɛkara Sɔ, Moïse osa wal dea yenga *Pake, nɛ a haa nu mɛ ngbanzili tɔk sami ha hio te nutwa yu nde, *telenge pɛ fio betɛ gbɛ hio kay bem mɔ kandɔ Israel.

²⁹Nɛ wal mɛkara Sɔ, hio wi mɔ Israel kuo gbɛ nana-litɔng tuka ha kota nu. Ma, ka hio wi mɔ Ezipte kimbolo mɛ ku yo, yo gulo mbwa fɛt mburr.

³⁰Nɛ wal mɛkara Sɔ, hio wi mɔ Israel nɛa nɔ zikiri nɛ le Jéricho ha zang yala mɔrkɔ zanga bwa, nɛ ngeng kin lea gbinɔ fɛt mburr a ha nu.

³¹Nɛ wal mɛkara Sɔ, Rahab, bhoko-de wanza, baa nɛ dede kɔ hio wi ndɔng ka tɛa nɛ wuso tɛ mbari le Jéricho. Mɛgi, a tɛ fe hinɛ hio wan-de kpandele sungiri nɛ Sɔ na.

³²Mi betɔ fin nɛ nge wen ge? Ngimɔ kɔpa mi mɛ tɔ wen hazu Gedeon, Barak, Samson, Yefte, David, Samuel, nɛ hio *wan-tɔkuliwen.

³³Nɛ wal mɛkara Sɔ, mbwa gana zu hio mbing kandɔ ha bulo, mbwa dea nzengmɔ, nɛ mbwa kpaa nde, Sɔ dea mɔ ka wɛnɛ bagɔn nu mɛ de. Mbwa gdɔka nu hio dila,

³⁴mbwa biso hio nga we, mbwa kpɔya ha fio gbapa, mbwa kpaa ngatɛ ha pata mɔka tɛ, mbwa dungɔ nê hio ngaya wan-bibulo ka gana zu hio gɔn-gɛnɛ zugili bulo.

³⁵Nɛ wal mɛkara Sɔ, hio ma bhoko kpaa hio ma nam pɛ mbwa nɛ mbinga hazu Sɔ guo mbwa ha fio. Pɛ hio ma, ɛ dea mbwa nɛ buu hɔ ha fio. Ma, ngase ɛngi, mbwa kafa kpɔya ha buu ɛngɛ, hazu mbwa ngoya nde, Sɔ agu mbwa ha fio gde ha ma dede tunɔ ka pena mɔa.

³⁶Pɛ hio ma, ɛ yaa mbwa nɛ ɛ zuro mbwa nɛ zambala. Ɛ sanga hio ma nɛ pɛl bolo pi ha twa zɔbhɔ.

³⁷Ɛ loa hio ma nɛ ta gbɛ. Ɛ gɔna soko hio ma ha binsila bwa, nɛ ɛ gbɛa hio ma nɛ gbapa. Hio ma mbinga dungɔ ha ndota nɛ ngɔn nɛnɛ tuka hio fabha wi. Mbwa yola kotu sami nɛ kotu gbele mbori tuka la. Hio wi yukoto mbwa, nɛ ɛ dea buu nɛ mbwa.

³⁸Mbwa dungɔ ha ndota nɛ zang kpɛnu nɛ hio zu ngari nɛnɛ. Nɛ mbwa dungɔ ha ɔa ha zang hio ngu nɛ ha zang hio lok. Mbwa badung nê hio dede wi ka gdanga nzan ɛngɛ tɛ lɛm nɛ mbwa na.

³⁹Sɔ tɔa dede lingtɛ hio wi ndɔng fɛt hazu mbwa mɛkara wɛnɛ. Ma, ngase ɛngi, mbwa tɛ kpa ka mɔ ɛngɛ ka Sɔ bagɔn nua, na.

⁴⁰Hazu mɔ ka Sɔ bheka, yo nɛ dedea pentɛ hazu ɔ. A bheka nde, mbwa akeri nɛ ɔ tuka nde, wɛnɛ alɛmsiri mɔ fɛt wɛɛ hazu ɔ hinɛ mbwa fɛt gbesi.