Read south west gbaya Hebro 13 Bible Online

Hebro 13 - south west gbaya bible

Hebro 13

¹Ɛnɛ abhɔn ka ha ngoya may tuka hio ya ha Christ.

²Ka tazu ɛnɛ abisi nɛ baa hio gɛnɛ nɛ dede kɔ ha soko ɛnɛ na. Hazu nɛ wal baa hio gɛnɛ mɛgi, hio ma wi baba hio *telenge, ngase ka mbwa ing yo na.

³Tazu ɛnɛ agba nɛ hio wan-zɔbhɔ tuka ɛnɛ ha twa zɔbhɔ hinɛ mbwa gbesi. Hio wi ndɔng ka kpa yukotomɔ, tazu ɛnɛ agba nɛ mbwa tuka ɛnɛ ha kpaa yukotomɔ hinɛ mbwa gbesi.

⁴Ɛnɛ aba wen sio may nɛ zioa. Ngase wei, ngase ko pɛa ade wanza na. Hazu Sɔ begɔn kita ba nɛ wi ndɔng ka de mɔ nɛtum-nɛtum, nɛ ka de wanza.

⁵Ka wɔ mbɔli agan zu deamɔ pɛ ɛnɛ na, ma, ɛnɛ ade totɛ hazu mɔ ka dung ha kɔ ɛnɛ. Hazu Sɔ tɔa: «Mi lɛm mɛ ndekiri mɛ ndang na. Nɛ mi lɛm lak mɛ gde ndang na.»

⁶Hazu ɛngi, ɔ fɛt beba da nɛ tɔ: «*Kongawan nê wan-gbakiri mi, mi lɛm yu ke ma mɔ ndang na. Yo nê nge gdangamɔ ka ma wi bede ha tɛ mi, ge nde?»

⁷Tazu ɛnɛ agba nɛ wi ndɔng ka bangbɔsi ɛnɛ nɛ bosia ha wal mɔ Sɔ, nɛ ka batɔ wen pɛ Sɔ ha ɛnɛ. Tazu ɛnɛ agba nɛ wal ka mbwa bade nɛ mɔ hɔ ha fio. Ɛnɛ amɛkiri Sɔ tuka ka mbwa bamɛkiri nɛ.

⁸Jésus-Christ ka nê ndang tɛ wa, mɛmbalasɔ, swe mɛsɛ, kpoo nɛ kpoo.

⁹Hio ma wi tɛ bo ha osa hio gɔn-gɛnɛ osamɔ nɛtɛ-nɛtɛ. Ka mbwa ayɔsisi ɛnɛ na. Nɛ dedea nde, sila ɛnɛ akpa ngatɛ nɛ wal *dede sila pɛ Sɔ, bo nɛ wal hio haanu hazu yɔngamɔ na. Hio wi ka de mɔ lɛm nɛ hio haanu ndɔng, tɛ kpa ma dedemɔ ndang ang na.

¹⁰Hio wan-hasadaka ka de tom ha twa Sɔ hakɛ ha nu, mbwa tɛ kpa wal mɛ yɔng mɔ ha bhandi ha sadaka pɛ ɔ, na.

¹¹Gasa wan-hasadaka pɛ hio *zuife dung mɛ ku tɔk sari le nɛ ha nzɔy bhandi fɛt hazu ha yo ha Sɔ tuka sadaka zosi nɛ hio *sɛmbɔ. Nɛ wɔl saria, ɛ dung mɛ ku yo nɛnɛ besisi ha gdong kin.

¹²Yo nê hazu ɛngi, ka Jésus fea ha gdong kin le tuka nde, wɛnɛ agde kandɔ pɛa nɛ nzɔya nɛ wal tɔktɛ wa.

¹³Mɛgi, ɔ agbo nɛ ha gdong kin nde, ka hio wi abhɛsiri ɔ hinɛ wɛnɛ gbesi.

¹⁴Hazu, hakɛ ha zu nu, ɔ bo nɛ ma kpasa le ka bebhɔn na. Ma, ɔ nɛ hɛl mɔ le ɛngɛ ka betɛ bin.

¹⁵Mɛgi, ɔ aha sadaka lukosomɔ ha Sɔ ngimɔ fɛt nɛ wal Jésus. Yo nde, ɔ abhɔn ka ha lukoso ling Sɔ nɛ wal hio wen nu ɔ.

¹⁶Ka tazu ɛnɛ abisi nɛ dea dedemɔ nɛ dea ngay ha tɛ may na, hazu yo nê tili sadaka mɛgi ka ha totɛ ha Sɔ.

¹⁷Ɛnɛ aze nu hio wi mɔ zu ɛnɛ, nɛ ɛnɛ ahil nɛ mɛndi ha si mbwa. Hazu mbwa ha pama tunɔ pɛ ɛnɛ, nɛ mbwa betɔ bin pata tom pɛ mbwa ha Sɔ. Ka ɛnɛ ze nu mbwa, mbwa bede tom pɛ mbwa nɛ totɛ. Hazu, ka mbwa de tom pɛ mbwa nɛ tɔatɛ, ki yo lɛm mɛ gbakiri ɛnɛ ndang na.

¹⁸Ɛnɛ gɔ Sɔ hazu ɔ. Ɔ ingɔ nɛdedea nde, ingɔmɔ sila pɛ ɔ nɛ saa, hazu ɔ ngoya de dedemɔ ha zang mɔ fɛt.

¹⁹Mi mbo ɛnɛ nɛkpasa nde, ɛnɛ agɔ Sɔ ka mi akifiri si ha pɛ ɛnɛ nɛhasa.

²⁰Sɔ, wan-ha gaamɔ, guo *Kongawan pɛ ɔ, Jésus, ha soko hio fio wi yunɛ. Wɛnɛ nê gasa zaoro sami, ka tɔktɛ wa bhɔngara *mbon ɛngɛ ka bebhɔn kpoo.

²¹Sɔ alɛmsiri ɛnɛ mɛ de hio dedemɔ fɛt, ka sila wa ngoya nde, ɛnɛ ade. Nɛ wal Jésus-Christ, wɛnɛ aha ɛnɛ ngatɛ mɛ de mɔ ka ha totɛ ha wɛnɛ. *Lɛkɛ-lɛkɛmɔ ha kɔ Jésus-Christ kpoo nɛ kpoo. Amen.

²²Hio ya mi, mi alnu ha ɛnɛ nde, ɛnɛ akonzi hio wen mbɔla ndɔng ha zang sila ɛnɛ. Hazu mi ngɛraka kanɛ dɔ wen ha ɛnɛ.

²³Ɛnɛ aing nde, ɛ gbosasa ya ɔ, Timothée, ha twa zɔbhɔ kari. Ka wɛnɛ hɔa ha pɔm nɛhasa, mi beku wɛnɛ nɛnɛ haki ha zɔka ɛnɛ.

²⁴Ɛnɛ afan hio wi mɔ zu ɛnɛ fɛt, nɛ fin hio wi pɛ Sɔ fɛt. Hio ya ha Christ mɛ kandɔnu Itali fana ɛnɛ.

²⁵Sɔ ade *dede sila ha tɛ ɛnɛ fɛt.