Read south west gbaya Hebro 3 Bible Online

Hebro 3 - south west gbaya bible

Hebro 3

¹Hio ya mi, Sɔ saa ɛnɛ mɛ dung nê hio nzɔy wi pɛa. Hazu ɛngi, ɛnɛ azɔk Jésus ka Sɔ tomsa ha ɔ hazu dung nê gasa wan-hasadaka mɔ mɛkaramɔ ka ɔ kɛ wena.

²Sɔ gdea wɛnɛ ha litom ɛngɛ, nɛ Jésus dea yo nɛ mboazu, gbesi tuka ka Moïse badung nɛ mboazu ha tom, ka wɛnɛ bade ha twa pɛ Sɔ fɛt.

³Lɛma nde, Jésus akpa lukosomɔ pen Moïse, gbesi tuka ka ɛ lukisi nɛ wan-bɛ twa pen twa ka wɛnɛ bɛa.

⁴Twa ndang ndang fɛt nɛ wan-bɛ nɛ. Ma, Sɔ nê wan-bɛ mɔ fɛt.

⁵Moïse badung nɛ mboazu wan-tom ha twa pɛ Sɔ fɛt. A bulo wen hio mɔ ka Sɔ betɔ bin.

⁶Ma, Christ nê *Bewei pɛ Sɔ, ka dung nê wan hazu twa pɛ Sɔ. Ka ɔ bhɔna nɛ da ha kera mɔ ka ɔ gde tazu ɔ ang, ɔ bedung nê twa pɛa.

⁷Hazu ɛngi, *Nzɔy-Sɔtɛ tɔa: «Swe mɛsɛ ka ɛnɛ ha zea gɛl Sɔ,

⁸ka ɛnɛ angasisi sila ɛnɛ tuka hio ngbabafa ɛnɛ na. Mbwa ngasasa sila mbwa ha ngimɔ ka mbwa guotɛ sungiri nɛ mi. Mbwa wea sila mi ha kpɛnu.

⁹Mbwa kio nu mi, nɛ mbwa wea sila mi, ngase ka mbwa zɔka hio deamɔ pɔm ha zang bɛlɛ bhukɔa nar.

¹⁰Yo nê hazu ɛngi, sila mi yimɔ sungiri nɛ mbwa, nɛ mi tɔa nde, sila mbwa ha yɔa wal swe fɛt, nɛ mbwa tɛ ing hio wal pɔm na.

¹¹Mɛgi, mi kana mɔ nɛ ngambi nde, mbwa lɛm le ha bhandi ɔmtɛ ka mi bhɔngara gde ha mbwa, na.»

¹²Hio ya mi, ɛnɛ pangay yu nde, ma wi ha soko ɛnɛ betɛ dung nɛ gdanga sila ka kafi Sɔ, nɛ wɛnɛ betɛ lak tunɔ Sɔ gde.

¹³Ma, hɔ ha kpogio yala ha soko hio yala ndɔng, ka Sɔ sa nde, swe mɛsɛ, ɛnɛ ambo may swe ndang ndang fɛt yu nde, gdangamɔ betɛ sɛbhili ɛnɛ hazu dung nê hio wan-ngazala.

¹⁴Lɛma nde, ɔ abhɔn ha gdea tazu ɔ ha tɛ Christ tuka ka ɔ dea nɛ ha angara mɛkara wɛnɛ. Hazu, ɔ nê hio sɔy pɛa sɔna ka ɔ de mɛgi tee hɔ ha kpogio ngimɔ.

¹⁵Yo nê ɛngi, ka Nzɔy-Sɔtɛ tɔa: «Swe mɛsɛ ka ɛnɛ ha zea gɛl Sɔ, ka ɛnɛ angasisi sila ɛnɛ tuka hio ngbabafa ɛnɛ na. Mbwa ngasasa sila mbwa ha ngimɔ ka mbwa guotɛ sungiri nɛ mi.»

¹⁶Hio wi ndɔng ka zea gɛl Sɔ, nɛ ka guotɛ sungiri nɛ wɛnɛ, yo nê hio nge wi ge? Yo nê hio wi ndɔng fɛt ka Moïse gbosasa ha kandɔnu Ezipte.

¹⁷Hio wi ndɔng ka Sɔ dea ngambi sungiri nɛ mbwa ha zang bɛlɛ bhukɔa nar, yo nê hio nge wi ge? Yo nê hio wi ndɔng ka dea gdangamɔ, nɛ ka fea bhɔn ha kpɛnu.

¹⁸Nɛ hio wi ndɔng ka Sɔ kana mɔ ha mbwa nde, mbwa lɛm le ha bhandi ɔmtɛ ka wɛnɛ bhɔngara gde ha mbwa na, yo nê hio nge wi ge? Yo nê hio wi ndɔng ka dea kpandele.

¹⁹Mɛgi, ɔ zɔka nde, mbwa tɛ kpa wal mɛ le ha bhandi ɔmtɛ ɛngi na, hazu mbwa tɛ mɛkiri Sɔ na.