Read south west gbaya Hebro 5 Bible Online

Hebro 5 - south west gbaya bible

Hebro 5

¹Ɛ weki hio gasa wan-hasadaka ndang ndang fɛt ha soko hio wi hazu gde mbwa ha tom lɛmsiri mɔ ha soko Sɔ nɛ hio wi ndɔng. Mbwa ha hio haamɔ nɛ hio sadaka ha Sɔ hazu gdangamɔ ka hio wi dea.

²Gasa wan-hasadaka ingɔ dea kobhe tɛ hio tam-tum wi ka yɔa wal, hazu wɛnɛ fin nɛ mɔkaa gbesi tuka mbwa.

³Mɛgi, lɛma nde, gasa wan-hasadaka aha sadaka ha Sɔ bo sɔna hazu *sɛmbɔ pɛ hio mbing wi na, ma, fin hazu sɛmbɔ pɛa nɛ pɛa tɛ.

⁴Ma wi ndang lɛm ba tɛ wa nɛ zioa mɛ tɛ gasa wan-hasadaka na. Yo nê Sɔ ha sa wi hazu dung nê gasa wan-hasadaka tuka ka wɛnɛ basa nɛ Aaron.

⁵Yo fin gbesi nɛ Christ. Pɛa, a tɛ ba tɛ wa nɛ zioa mɛ tɛ gasa wan-hasadaka na. Ma, yo nê Sɔ ka baweki wɛnɛ, a batɔ: «Mɛ nê Bewei pɔm. Mɛsɛ, mi tɛ bo nê Bafa mɛ.»

⁶Nɛ a tɔa fin ha ma bhandi: «Mɛ bedung nê wan-hasadaka kpoo nɛ kpoo, gbesi tuka ka Melkisedeke badung nê.»

⁷Ha zang ngimɔ ka Christ bayol tɛ wi, a gɔa Sɔ nɛ a alanu ha wɛnɛ nɛ ngagɛl nɛ milikwa. Nɛ Sɔ ka lɛma mɛ kpasisi wɛnɛ gbo ha fio, zea wɛnɛ hazu wɛnɛ yuo ke Sɔ.

⁸Ngase ka wɛnɛ nê Bewei pɛ Sɔ, a yamba zea nu Sɔ nɛ wal kpaa yimtɛ.

⁹Ka wɛnɛ tɛa wi ka lɛma wɛɛ kari, a tɛ bo fin nê wan-ha *mɔkpasi kpoo ha hio wi ndɔng ka ze nu wa.

¹⁰Nɛ Sɔ gdea wɛnɛ gasa wan-hasadaka tuka ka Melkisedeke badung nê.

¹¹Ɔ nɛ hio mɔ nɛdɔka mɛ tɔ ha ɛnɛ hazu mɔ ndɔng. Ma, yo nɛ ngaya mɛ tɔ gotoa ha ɛnɛ, hazu ɛnɛ ze mɔ nɛhasa na.

¹²Yo tɛ bo nê ngimɔ nde, ɛnɛ nɛ pɛ ɛnɛ tɛ adung nê hio wan-osimɔ. Ma, ɛnɛ kpala tɛ dung nê wi ka ɛ lɛma fin osi hio bosi osamɔ hazu Christ ha mbwa. Ɛnɛ dung tuka hio nzɔri bem ka bhɔna ha nɔa li bele, nɛ ɛnɛ tɛ lɛm ka yɔnga nga yɔngamɔ na.

¹³Wi ka bhɔn ha nɔa li bele, wɛnɛ ka nê bhobem, a tɛ ing gbaa soko mɔ ka dung nzeng na.

¹⁴Ma, nga yɔngamɔ lɛma nɛ zɔma wi ka yamba wal mɛ de mɔ ka lɛma, nɛ ka li wa bhaa hazu ing wal mɛ gba soko dedemɔ nɛ gdangamɔ.