Read south west gbaya Hebro 6 Bible Online

Hebro 6 - south west gbaya bible

Hebro 6

¹Mɛgi, lɛma nde, ɔ ayambi hio osamɔ hazu Christ pen mɔ bosia, ɔ ayambi hio osamɔ ka lɛma nɛ zɔma wi. Bosi osamɔ hazu Christ dung tuka nanga mɛkaramɔ, nɛ ɔ ngoy fin bhɔn ka ha bɛa nanga ɛngɛ na. Hio zuwen mɔ bosi osamɔ ɛngɛ tɔ nde, lɛma nde, ɔ alak dea tum mɔ gde, nɛ ɔ amɛkiri Sɔ.

²Yo osi fin mɔ hazu wen tili gdumso wi ha li, hazu wen gdea kɔ ha zu wi, hazu wen guotɛ ha soko hio fiowi, nɛ hazu wen kita pɛ Sɔ.

³Sising, ka Sɔ ngoya, ɔ beyambi mɔ pen mɔ sɔngsi.

⁴Hio ma wi ang ka Sɔ donsa sila mbwa nɛ saamɔ pɛa, ka tota hio dedemɔ ngɔn, ka kpaa *Nzɔy-Sɔtɛ,

⁵ka tota dede wen pɛ Sɔ, nɛ ka zɔka ngatɛ mɔ nzan ka betɛ bin.

⁶Ngase ɛngi, mbwa laka Sɔ gde. Mɛgi, ɛ lɛm fin ngbɔsi mbwa ha kiforo sila nɛ mbinga na. Hazu, mbwa nɛ tɛ mbwa ngbaa *Bewei pɛ Sɔ ha getakate nɛ mbinga, nɛ mbwa pio foy ha li wa ha li wi fɛt.

⁷Ɛnɛ zɔk hio fɔ. Ka kolo ɔl ha ma fɔ hapata may, nɛ ka hio wan-gɔm fɔ bhi dede kpalmɔ ang, ɛngi osi nde, Sɔ wola dede wen ha zu fɔ ɛngɛ.

⁸Ma, ka bo nê yak ngombia nɛ gdanga pala ha kpɔtɛ ang, yo osi nde, fɔ ɛngɛ bo nê mɔ ndang na. Sɔ tɛ bo sanga mɛ fom yo, nɛ a bebesisi yo.

⁹Ma, pɛ ɛnɛ, hio ndɔngsila ɔ, ngase ka ɔ tɔ wen mɛgi ha ɛnɛ, ɔ ingɔ nde, ɛnɛ ha ndara dede wal ka Sɔ bekpasisi nɛ ɛnɛ ang.

¹⁰Sɔ bo nê wan-de kalbho-kalbho mɔ na. Mɛgi, tazu wa lɛm bisi nɛ tom nɛ ngoy pɛ ɛnɛ na. Ɛnɛ gbakara hio nzɔy wi pɛ Sɔ, nɛ ɛnɛ bhɔna ka ang. Ɛngi osi nde, ɛnɛ ha ngoya Sɔ.

¹¹Gasa mɔ ka ɔ ngoya mɛ tɔ ha ɛnɛ, yo nde, ɛnɛ abhɔn ka ha gbɛngsa tɛ mɛgi hɔ ha kpogio, ka de, Sɔ aha ɛnɛ hio mɔ ndɔng ka ɛnɛ gde tazu ɛnɛ ang.

¹²Ka ɛnɛ atɛ pɔsa wi na. Ma, ɛnɛ ade mɔ gbesi tuka hio wi ndɔng ka mɛkara Sɔ, nɛ ka dung nɛ yikosila, hazu mbwa bekpa mɔ ndɔng ka Sɔ gɔna nua.

¹³Ha ngimɔ ka Sɔ bagɔn nɛ nu ha Abraham, a bakan tɛ wa nɛ pɛa tɛ, hazu ma wi ka dung nɛ gasaa pen Sɔ, ka Sɔ akan mɔ nɛ ling wa, ndang bo na.

¹⁴Mɛgi Sɔ kanamɔ ha Abraham: «Mi bewol dede wen ha zu mɛ nɛkpasa, mi beha mɛ hio dɔka bezang hebhe.»

¹⁵Abraham kera mɔ nɛ yikosila, nɛ a kpaa hio mɔ ka Sɔ bagɔn nua ha wɛnɛ.

¹⁶Ka hio wi dung mɛ kan nɛ mɔ, mbwa kan mɔ nɛ ling wi ka dung nɛ gasaa pen mbwa. Mbwa kan mɔ mɛgi tuka nde, siokafɛ fɛt akari ha soko mbwa.

¹⁷Sɔ ngoya osi ha hio wi ka bekpa mɔ ka wɛnɛ gɔna nua, long nde, ka wɛnɛ bheka ma mɔ kari, a lɛm mɛ kpali nu wa ang fin na. Yo nê ɛngi ka wɛnɛ kana nɛ mɔ.

¹⁸Hio mɔ ndɔng bwa, gɔnanu nɛ kanamɔ pɛ Sɔ, lɛm mɛ kpali na, hazu Sɔ lɛm tɔ dalo na. Mɛgi, ɔ ka nɛa ha si goka kɔ pɛ Sɔ, ɔ baa da pentɛ mɛ bhɔn nɛ nɔa ha *mɔgdetazu pɛ ɔ nde, Sɔ belɛmsiri gɔnanu pɛa.

¹⁹Mɔgdetazu ɛngɛ ha yolsa tunɔ pɛ ɔ ha li Sɔ nging. Hazu, yo lea *gasa twa Sɔ ha ngɔn, yo pena ha gasa la ka gɛ ang, nɛ yo nɔa ha nzɔy bhandi fɛt.

²⁰Jésus lea haki sɔngsi nɛ ɔ hazu gbosisi wal ha ɔ. Mɛgi, a tɛ bo nê gasa wan-hasadaka kpoo nɛ kpoo tuka ka Melkisedeke badung nê.