Read south west gbaya Jacques 4 Bible Online

Jacques 4 - south west gbaya bible

Jacques 4

¹Goto mɔya nɛ tumbɔ ka dung ha soko ɛnɛ, yo gutɛ ha ndɔ tɛnɛ ge nde? Yo tɛ nɛ wal gdanga golamɔ pɛ ɛnɛ ka bi bulo ha tɛ ɛnɛ.

²Ɛnɛ ha gola mɔ, ka ɛnɛ kpa na, nɛ ɛnɛ gbɛ wi ha wena. Ɛnɛ ha gdea sila ha tɛ ma mɔ, ka ɛnɛ lɛm kpa yo na. Yo nê ɛngi ka gde ɛnɛ ha mɔya nɛ ha bio tumbɔ ha soko may. Ɛnɛ kpa mɔ ka ɛnɛ ngoya na, hazu ɛnɛ gɔ yo ha kɔ Sɔ na.

³Nɛ ka ɛnɛ gɔ mɔ ha kɔ Sɔ, a lɛm ha yo ha ɛnɛ na, hazu ɛnɛ gɔ yo nɛ gdanga takaramɔ. Ɛnɛ gɔ yo sɔna hazu gdangsi yo lɛm nɛ golamɔ pɛ ɛnɛ.

⁴Ɛnɛ, hio wan-yambala zu ha li Sɔ, ɛnɛ ing nde, dea gdidan hinɛ nzan, yo nê sungoro Sɔ. Mɛgi, wi fɛt, ka ngoy dea gdidan hinɛ nzan, a tɛ bo nê ngana pɛ Sɔ.

⁵Ha zang takarata pɛ Sɔ ɛ ngɛraka: «Sɔ ha dea gula hazu sɔtɛ ka wɛnɛ gdea ha tɛ ɔ.» Ɛnɛ baa yo tuka gbele wen nde?

⁶Ma, ngase ɛngi, Sɔ ha dea *dede sila ha tɛ ɔ nɛnɛ, gbesi tuka ɛ bangɛriki ha zang takarata pɛa: «Sɔ sungiri hio wan-sutɛ, ma, a de dede sila ha tɛ wi ka hil nɛ mɛndi.»

⁷Mɛgi ɛnɛ hil nɛ mɛndi ha si Sɔ. Ɛnɛ zati ha li *Satan, nɛ wɛnɛ beyu ɛnɛ pen nɛyɛa.

⁸Ɛnɛ tiki tɛ ha pɛ Sɔ, nɛ Sɔ fin betɛ sanga nɛ ɛnɛ. Ɛnɛ hio *wan-de gdangamɔ, ɛnɛ tay kɔ ɛnɛ! Nɛ ɛnɛ hio wan-sila bwa, ɛnɛ sasisi sila ɛnɛ!

⁹Ɛnɛ de ngɔtɛ hazu gdanga deamɔ pɛ ɛnɛ. Ɛnɛ lokitɛ nɛ he kwa. Ɛnɛ kifiri mami pɛ ɛnɛ ha kwa, nɛ totɛ ha ngɔtɛ.

¹⁰Ɛnɛ hil nɛ mɛndi ha si *Kongawan, nɛ wɛnɛ begu ɛnɛ gde ha ngɔn.

¹¹Hio ya mi, ka ɛnɛ atɔ gdanga lingtɛ may na. Wi ka tɔ gdanga lingtɛ ya wa, nɛ ka gɔn kita ha zu wa, a tɔa gdanga lingtɛ *mbonga pɛ Sɔ, nɛ a gɔna kita ha zua. Ka mɛ gɔna kita ha zu mbonga ɛngɛ, yo tɔ nde, mɛ pam mbonga fin na, ma, mɛ tɛ bo nê wan-gɔn kita.

¹²Sɔ ndang sɔna nê wan-ha mbonga nɛ wan-gɔn kita. Yo nê wɛnɛ ka lɛma kpasisi wi, nɛ ka lɛma bhondisi wi. Ma, pɛ mɛ, mɛ ba tɛ mɛ tuka o mɛ gɔn kita ha zu ma mɛ, o nde?

¹³Ɛnɛ pangay, ɛnɛ ka tɔ: «Mɛsɛ mana mɔsaa ɔ benɛ ha ma gasa le. Ɔ bedung haki lɛm bɛlɛ ndang, ɔ begdongi mɔ, nɛ ɔ bekpa tonga.»

¹⁴Ɛnɛ ingɔ mɔ ka behɔ nɛ bhisiri nde? Way, tunɔ pɛ ɛnɛ dung tuka kutu ka bhɔn pata yɛ na, hapata yo yɛmala fin.

¹⁵Ɛngɛ nê mɔ ka ɛnɛ lɛma tɔ: «Ka *Kongawan ngoya nde, ɔ adung nɛ zutunɔ, ɔ bede mɔ mɛgi, mana ɔ bede mɔ mɛgɛ.»

¹⁶Ma, sising, ɛnɛ ha suotɛ, nɛ ɛnɛ ha lukoso tɛ. Tili suotɛ mɛgi fɛt, yo nɛ gdanga.

¹⁷Mɛgi, wi ka ingɔ wal mɛ de dedemɔ, nɛ ka de yo na, wia dea gdangamɔ.