Read south west gbaya 1 Pierre 4 Bible Online

1 Pierre 4 - south west gbaya bible

1 Pierre 4

¹Gbesi tuka Christ kpaa yeksamɔ ha tɛ wa, lɛma nde, ɛnɛ fin aba ndangtɛ takaramɔ tuka wɛnɛ. Ɛngɛ beha ɛnɛ da mɛ dung nɛ yikosila ha zang yeksamɔ. Hazu, ka ɛnɛ kpa yeksamɔ ha tɛ ɛnɛ hazu ɛnɛ nê wi pɛ Christ, ɛnɛ laka dea gdangamɔ gde kari.

²Angiri sising, ha ngimɔ fɛt ka ɛnɛ bhɔna nɛ zutunɔ, dea nde, ɛnɛ ade sɔna nɛ mɔ ka Sɔ ngoya. Ka ɛnɛ ade fin hio mɔ ka tɛ ɛnɛ ngoya na.

³Sɔngsi, ɛnɛ pensa ngimɔ pɛ ɛnɛ ha dea mɔ gbesi tuka *bhilo. Yo abhɔn nɛ ɛngi. Ɛnɛ dungɔ ha dea wanza, ha dea hɛl mɔ nzan, ha nɔa dɔkɔ nɛ ngurua, ha yɔnga nɛ nɔa mɔ nɛ kang, nɛ ha dea gdanga tom gbele sɔ.

⁴Ma, sising, ɛnɛ bo fin ha dea sɔy hinɛ wi ndɔng ha dea mɔ nɛtum na. Yo nê ɛngi, ka mbwa yaksa, nɛ mbwa tɛ bo ha yaa ɛnɛ.

⁵Ma, ma swe ndang, mbwa beyol bin ha li Sɔ hazu tɔ pata deamɔ pɛ mbwa fɛt. Wɛnɛ tɛ bo sanga mɛ gɔn kita ha zu hio tunɔ wi nɛ ha zu hio fiowi gbesi.

⁶Sɔ begɔn kita ha zu hio fiowi lɛm nɛ deamɔ pɛ mbwa ha zu nu. Yo nê hazu ɛngi, ka Christ bulo *Dede Wen ha mbwa tuka nde, nɛ wal *Nzɔy-Sɔtɛ mbwa fin akpa ndangtɛ tunɔ, ka Sɔ dung nɛ yo.

⁷Sising, ngbɔla kanɛ bengimɔ tikiring nde, ka mɔ nzan fɛt akari. Hazu ɛngi, lɛma nde, ɛnɛ agan zu tɛ ɛnɛ, nɛ ɛnɛ adung ngɛlɛlɛ ha gɔa Sɔ.

⁸Pen fɛt, ɛnɛ abhɔn ka ha ngoya may nɛ sila ɛnɛ fɛt. Hazu, ngoy bisi dɔka *sɛmbɔ.

⁹Ɛnɛ aba may ha soko ɛnɛ nɛ dede kɔ, bo nɛ yimɔlɔmɔ na.

¹⁰Sɔ haa ɛnɛ ndang ndang fɛt hio tili ngatɛ nɛtɛ-nɛtɛ mɛ de nɛ hio tili tom nɛtɛ-nɛtɛ. Lɛma nde, ɛnɛ agbakiri may nɛ wal ngatɛ ndɔng tuka dede wan-tom.

¹¹Wi ka kpaa ngatɛ mɛ de nɛ tom bulo wen, dea nde, wɛnɛ abul nɛ wen ka tɛ nɛ wal pɛ Sɔ. Nɛ wi ka kpaa ngatɛ mɛ gbakiri nɛ hio wi, dea nde, wɛnɛ agbakiri mbwa nɛ wal ngatɛ pɛ Sɔ. Mɛgi ɛnɛ de mɔ ndɔng fɛt tuka nde, hio wi alukisi Sɔ nɛ wal Jésus-Christ, ka dung nɛ *lɛkɛ-lɛkɛmɔ, nɛ ziomɔ kpoo nɛ kpoo. Amen.

¹²Hio ndɔngsila mi, ka ɛnɛ ayaksi hazu hio ngamɔ ka we sila ɛnɛ sising, na. Ka ɛnɛ atakiri nde, yo nê ma gɔn-gɛnɛ mɔ ka hɔa, na.

¹³Ma, ɛnɛ ade totɛ, hazu ɛnɛ kpa sɔna nɛ ndangtɛ yeksamɔ ka Christ bakpa. Mɛgi, ɛnɛ bede fin totɛ pen mɔ sɔngsi ha yala ka Christ begbasi tɛ wa nɛ *lɛkɛ-lɛkɛmɔ pɛa.

¹⁴Ka hio wi ya ɛnɛ hazu ɛnɛ nê wi pɛ Christ, dea nde, ɛnɛ ade totɛ, hazu ha ngimɔ ɛngɛ *Nzɔy-Sɔtɛ pɛ Sɔ ka dung nɛ ngaya pen mɔ fɛt, bedung hinɛ ɛnɛ.

¹⁵Ka ma wi ha soko ɛnɛ kpa yeksamɔ hazu wɛnɛ nê nagbɛwi, mana wanzu, mana wan-de mɔ nɛtum, mana wan-ki wen, yo bo nɛ dedea na.

¹⁶Ma, ka ma wi kpa yeksamɔ hazu wɛnɛ nê wi pɛ Christ, ka foy ade wɛnɛ na. Ma, dea nde, wɛnɛ alukisi nɛ Sɔ hazu Sɔ gbala wɛnɛ nɛ ling Christ.

¹⁷Ngimɔ ka Sɔ angiri gɔna kita ha zu hio wi, hɔa kari. Wɛnɛ ha gɔna kita ha zu hio wi pɛa sɔngsi. Woo! Ka Sɔ gɔn kita sɔngsi ha zu ɔ, hio wi pɛa, ki kita pɛ Sɔ ha zu hio wi ndɔng ka kafi *Dede Wen pɛa bedung mɛng?

¹⁸Ɛ ngɛraka ha zang takarata pɛ Sɔ: «Ka yo dung nɛ ngaya hazu *nzeng wi mɛ kpasi, pɛ hio *wan-kafi Sɔ nɛ *wan-de gdangamɔ bedung mɛng?»

¹⁹Mɛgi, hio wi ndɔng ka kpa yeksamɔ tuka ka Sɔ ngoya, dea nde, mbwa abhɔn ka ha dea dedemɔ. Nɛ dea fin nde, mbwa agde tɛ mbwa fɛt ha kɔ Sɔ, ka dea mbwa, nɛ ka dung nɛ mboazu.