Read south west gbaya 1 Pierre 5 Bible Online

1 Pierre 5 - south west gbaya bible

1 Pierre 5

¹Sising, mi wolmɔ ha ɛnɛ, hio kotowi mɔ eglize. Mi fin, mi nê kotowi. Mi zɔka ngimɔ ka Christ kpaa nɛ yeksamɔ, nɛ mi bekpa fin *lɛkɛ-lɛkɛmɔ pɛa ha ngimɔ ka wɛnɛ begbasi tɛ wa. Mɛgi, mi mbo ɛnɛ nde,

²ɛnɛ apam hio giliwi mɔ eglize nɛdedea gbesi tuka ka zaoro sami day nɛ hio sami. Ɛnɛ pam mbwa nɛ totɛ tuka Sɔ ngoya. Ka ɛnɛ ade tom ɛngɛ tuka wi ka ɛ nɔsisi, na. Ɛnɛ de yo bo hazu kang mbɔli na, ma, ɛnɛ gde sila ɛnɛ fɛt ha toma.

³Ka ɛnɛ aba tɛ ɛnɛ tuka wan hazu giliwi ka Christ gdea ha kɔ ɛnɛ, na. Ma, ɛnɛ osi mɔ ha mbwa nɛ wal dede deamɔ pɛ ɛnɛ.

⁴Ka ɛnɛ de mɛgi, wan-zu hio zaoro sami bekɛ ɛnɛ ha ngimɔ ka wɛnɛ begbasi tɛ wa. Yo tɔ nde, a beha ɛnɛ lɛkɛ-lɛkɛmɔ pɛa ka bebhɔn kpoo.

⁵Gbesi tuka ɛngi, hio pɔlɔmbɔ wi, lɛma nde, ɛnɛ aze nu hio gasa wi pɛ ɛnɛ. Nɛ mi tɔ ha ɛnɛ fɛt mburr nde, dea nde, ɛnɛ ahil nɛ mɛndi hazu de tom ha may. Hazu ɛ ngɛraka ha zang takarata pɛ Sɔ: «Sɔ sungiri hio wan-sutɛ, ma, a de *dede sila ha tɛ wi ka hil nɛ mɛndi.»

⁶Mɛgi ɛnɛ ahil nɛ mɛndi ha si Sɔ ka dung nɛ ziomɔ fɛt tuka nde, wɛnɛ agu ɛnɛ ha dede ngimɔ gde ha ngɔn.

⁷Ɛnɛ gde nɔzang pɛ ɛnɛ fɛt ha kɔ Sɔ, hazu wɛnɛ ha pama ɛnɛ.

⁸Ɛnɛ dung ngɛlɛlɛ, nɛ fin gdungɛ-gdungɛ! Hazu ngana pɛ ɛnɛ, *Satan, ha yala zikiri ɛnɛ. Wɛnɛ dung tuka gbabio ka he mɔ hirr, nɛ ka ki wi mɛ gul pɛlɛm.

⁹Ɛnɛ zati ha li wa, nɛ ɛnɛ bhɔn ka ha mɛkara Sɔ, hazu ɛnɛ ingɔ fɛt nde, hio ya ɛnɛ ha Christ ha nzan fɛt, mbwa ha kpaa ndangtɛ yeksamɔ fin tuka ɛnɛ.

¹⁰Nɛ wal dede sila pɛa, Sɔ saa ɛnɛ mɛ dung ha zang lɛkɛ-lɛkɛmɔ hinɛ Christ kpoo nɛ kpoo. Ɛnɛ ha kpaa yeksamɔ ha ma bebe ngimɔ sising. Ma, hapata Sɔ nɛ pɛa tɛ belɛmsiri ɛnɛ wɛɛ, nɛ a bengasisi ɛnɛ nɛ ngatɛ mɛ zati.

¹¹Ziomɔ fɛt ha kɔ wa kpoo. Amen!

¹²Yo nê Silas, ya ɔ ha Christ, ha gbakiri mi hazu ngɛriki dɔ takarata ɛngɛ ha ɛnɛ. Mi zɔka nde, wɛnɛ nɛ mboazu ha wal mɔ Sɔ. Mi ngɛraka takarata ɛngɛ hazu ngasisi nɛ ɛnɛ, nɛ hazu gbasi long nde, Sɔ ha dea kpasa *dede sila ha tɛ ɛnɛ ha zang mɔ fɛt. Mɛgi, dea nde, ɛnɛ abhɔn nɛ nɔa nging ha dede sila pɛ Sɔ.

¹³*Giliwi mɔ eglize hakɛ ha Babilone, ka Sɔ weka mbwa tuka ɛnɛ, mbwa fana ɛnɛ. Marc ka dung tuka kpasa bem pɔm, a fana ɛnɛ fin.

¹⁴Ɛnɛ fan may nɛ duyo mbuku ha zang ngoy pɛ Christ. Gaamɔ pɛ Sɔ adung hinɛ ɛnɛ fɛt ka de sɔy hinɛ Christ.