Read south west gbaya 2 Pierre 2 Bible Online

2 Pierre 2 - south west gbaya bible

2 Pierre 2

¹Sɔngsi bhee, hio *wan-tɔkuliwen dalo bahɔ ha soko kandɔ *Israel. Gbesi tuka ɛngi fin, hio wan-osimɔ dalo behɔ ha soko ɛnɛ. Mbwa betɛ nɛ wuso hazu osi hio kalbho-kalbho osamɔ ka begdangsi tunɔ pɛ hio wi. Nɛ mbwa bekafi Jésus-Christ, wan pɛ mbwa, ka yanga mbwa. Nɛ wal dea mɔ mɛgi, mbwa de nde, Sɔ abhondisi mbwa nɛhasa.

²Hio wi nɛdɔka bendari deamɔ tum pɛ mbwa. Nɛ hio wi befɛngsi kpasa wal mɛ ndari Sɔ pi nɛ mɔ ha mbwa.

³Hio wan-osimɔ dalo ndɔng ha dea hɛl mbɔli pentɛ. Mɛgi, mbwa bendɔmbili ɛnɛ nɛ dede gɛl hazu yɔng ɛnɛ. Ma, Sɔ gɔna kita ba nɛ mbwa bhee, nɛ ngimɔ ka wɛnɛ bebhondisi nɛ mbwa koka kari.

⁴Kpasawen, Sɔ tɛ de kobhe tɛ hio *telenge ndɔng ka bade gdangamɔ sɔngsi, na. Ma, a pio mbwa ha bhandi yɔng nzata. Mbwa dung haki nɛ sanga kɔ ha bhandi ngɛ-ngɛ-ngɛ tutum keri nɛ ngimɔ kita pɛ Sɔ.

⁵Sɔngsi bhee, hio wi mɔ nzan tɛ kpɔy ha kita pɛ Sɔ na. Ma, Sɔ bhondasa mbwa nɛ wal gasa mbeng li. A kpasasa sɔna nɛ hio wi mɔrkɔ zanga tar: Yo nê Noe, ka gba tazu hio wi mɛ de mɔ nzeng, hinɛ hio nam pɛa.

⁶Ka bo nê pɛ hio le Sodome nɛ Gomore, Sɔ gɔna kita ba hio wi mɛ le ndɔng fin. A besasa mbwa sɛbhɛk. Ɛngi osi ha hio *wan-kafi Sɔ mɔ ka behɔ ha tɛ mbwa.

⁷Sɔ kpasasa kanɛ Lot, *nzeng wi, ka kpaa ngɔtɛ nɛ wal deamɔ tum pɛ hio *kalbho-kalbho wi ndɔng.

⁸Ey, nzeng wi ɛngɛ ka bade le ha soko hio wi ndɔng, kpaa ngɔtɛ nɛdɔka hazu wɛnɛ dungɔ ha zɔka nɛ ha zea dea kpandele pɛ mbwa swe fɛt.

⁹Hio mɔ ndɔng osi nde, Sɔ ingɔ wal mɛ kpasisi ha zang yeksamɔ hio wi ka dung nɛ mboazu ha li wa. Nɛ a ingɔ fin mɛ pam hio kalbho-kalbho wi keri nɛ swe kita ka wɛnɛ bendulsi mbwa ang.

¹⁰Hio wi ka Sɔ bendulsi mbwa pen mbinga fɛt, yo nê ɛ ndɔng, ka gde tɛ mbwa ha gdanga hɛl deamɔ tum, nɛ ka bhɛsiri ziomɔ pɛ Sɔ. Hio wan-osimɔ dalo ndɔng ka mi tɔa wen pɛ mbwa ha ɛnɛ, mbwa nê wan-sutɛ nɛ wan-ngazu. Mbwa yu ke fɛngsa hio lɛkɛ-lɛkɛ zio sɔtɛ ngɔn na.

¹¹Ngase hio telenge ka dung pɛ mbwa nɛ ngatɛ nɛ ziomɔ pen hio wan-osimɔ dalo ndɔng, mbwa bo ha guo nu ha li *Kongawan mɛ tɔ gdanga lingtɛ hio lɛkɛ-lɛkɛ ziomɔ ndɔng na.

¹²Ma, hio wi ndɔng de mɔ nɛ wal multɛ tuka hio sari bɛlɛ, ka ɛ bhɛ mbwa nde, hio wi aba mbwa gbɛ. Mbwa ha fɛngsa hio mɔ ka mbwa ing na. Sɔ bebhondisi mbwa tuka hio sari bɛlɛ.

¹³Tuka mbwa dea gdangamɔ, Sɔ bekɛ mbwa nɛ gdangamɔ. Mbwa kpa totɛ ha dea mɔ tum ha gasa swe. Ka mbwa wesiri may hinɛ ɛnɛ hazu yɔng mɔ, ɛngɛ nê gasa mɔ foy nɛ mɔ nyɛl. Mbwa ha osala ɛnɛ, nɛ yo ha dea totɛ ha tɛ mbwa.

¹⁴Dɔka takaramɔ pɛ mbwa sɔna nɛ dea li hio bhoko-de wanza. Tɛ mbwa kati ha dea gdangamɔ na. Mbwa ha kio wal mɛ osili hio wan-pɔsa ha wal mɔ Sɔ pi ha dea gdangamɔ. Sila mbwa dona nɛ wɔ mbɔli. Sɔ foma mbwa kari.

¹⁵Mbwa yɔamɔ lak nzeng wal pɛ Sɔ gde. Mbwa tɛ bo ha ndara wal pɛ Balaam, bewei pɛ Bosor, ka ngoya mɛ kpa mbɔli nɛ wal dea gdangamɔ.

¹⁶Ma, Sɔ sɛna wen ha Balaam hazu kpandele ka wɛnɛ dea. Sɔ tɔa wen ha wan-tɔkuliwen ɛngɛ nɛ wal nu toyfok ka ing wolamɔ na. Toyfok ɛngɛ wolamɔ nɛ gɛl wi hazu dolsi Balaam nde, ka wɛnɛ ade mɔ yera na.

¹⁷Hio wan-osimɔ dalo ndɔng dung tuka zu ndong ka li ɔsa ha yo. Nɛ mbwa dung fin tuka tutum kolo ka gbabok ilo pen. Sɔ bhɔngara bhandi gde ha mbwa ha zang ngɛ-ngɛ-ngɛ tutum.

¹⁸Mbwa ha suotɛ tɔ nɛ hio tum wen. Nɛ wal hɛl mɔ multɛ, mbwa ha kio wal mɛ osili hio wi ndɔng ka gboa pɛ mbwa ngimɔ tikiring sɔna pen ha soko ɛ ndɔng ka ing tɛwen na.

¹⁹Hio wan-osimɔ dalo ndɔng ha gɔna nu ha mbwa nde, mbwa bedung sɛɛ. Ma, mbwa nɛ pɛ mbwa tɛ nê bala ha si wɔ dea mɔ ka begdangsi mbwa. Hazu wi ndang ndang fɛt nê bala ha si mɔ ka gan zu wa.

²⁰Hio wi ka tɛa tɛ ing Kongawan Jésus, *Wan-kpasisi ɔ, mbwa gboa ha zang nzing mɔ nzan pen. Ma, ka mbwa gde tɛ mbwa nɛ mbinga ha nzing ɛngɛ, nɛ ka yo gan zu mbwa, ki dungɔ pɛ mbwa tɛ bo nɛ gdanga pen mɔ sɔngsi.

²¹Hio wi ndɔng ingɔ nzeng wal mɔ Sɔ ngimɔ tikiring, nɛ hapata mbwa kiforo wolo gdong ha nzɔy *mbonga, ka Sɔ haa ha mbwa. Pɛ mbwa, lɛma se pentɛ nde, mbwa aing nzeng wal mɔ Sɔ na.

²²Hio zɛngwen tɔ nde: «Tolo kiforo fin tɛ, tɛ yɔng ɔya pɛa.» Nɛ fin nde: «Nguru ka ɛ zosa, kiforo fin tɛ, tɛ bɛng tɛ wa ha zang mbɔlbhɔtɔ.» Mɔ ka hɔa ha tɛ hio wi ndɔng, yo osi nde, zɛngwen ndɔng nê tɛwen.