Read south west gbaya 1 Jean 1 Bible Online

1 Jean 1 - south west gbaya bible

1 Jean 1

¹Ɔ ngɛriki takarata ɛngɛ ha ɛnɛ hazu wi ɛngɛ ka ɛ sa nde, Wen ka ha tunɔ. Wɛnɛ ang nisi ha ngimɔ ka Sɔ dea nzan. Ɔ zea wen nu wa nɛ zala ɔ. Ɔ zɔka wɛnɛ nɛ li ɔ. Ɔ mbara wɛnɛ. Nɛ ɔ ndɔa tɛ wa nɛ kɔ ɔ.

²Wi ɛngɛ ka ha tunɔ gbasa tɛ, nɛ ɔ zɔka wɛnɛ. Nɛ sising ɔ kɛ nɛ bul wen ha ɛnɛ nde, wɛnɛ nê *tunɔ kpoo. Wɛnɛ badung ang hapɛtɛ Sɔ, Bafa wa, ka gbasa wɛnɛ ha ɔ long.

³Mɔ ka ɔ zɔka nɛ li ɔ, nɛ ka ɔ zea nɛ zala ɔ, ɔ bul wena ha ɛnɛ fin tuka nde, ɔ hinɛ ɛnɛ fɛt ade sɔy. Mɛgi, ɛnɛ bede fin ndangtɛ sɔy ɛngɛ, ka ɔ ha dea hinɛ Sɔ, Bafa ɔ, nɛ Bewei pɛa, Jésus-Christ.

⁴Ɔ ngɛriki takarata ɛngɛ ha ɛnɛ tuka nde, totɛ pɛ ɔ alɛm wɛɛ.

⁵Sɔ nê saamɔ, nɛ tutum bo ang ha tɛ wa ndang na. Ɛngɛ nê wen ka ɔ zea ha nu Jésus-Christ, nɛ ka ɔ tɔ yo ha ɛnɛ.

⁶Ka ɔ tɔ nde, ɔ ha dea sɔy hinɛ Sɔ, nɛ ka ɔ bhɔna ka ha yala ha zang tutum nɛnɛ, ɔ ha tɔa dalo, nɛ ɔ ha dea mɔ, ka lɛm nɛ tɛwen na.

⁷Ma, ka ɔ ha yala ha zang saamɔ tuka Sɔ dung ha zang saamɔ, ɛngɛ osi nde, ɔ ha dea sɔy hinɛ may, nɛ tɔktɛ Jésus, *Bewei pɛ Sɔ, ha fala *sɛmbɔ pɛ ɔ fɛt yunɛ.

⁸Ka ɔ tɔ nde, ɔ bo nê *wan-de gdangamɔ na, ki ɔ osili nɛ tɛ ɔ nɛ pɛ ɔ tɛ, nɛ tɛwen bo ang ha tɛ ɔ na.

⁹Ma, ka ɔ gbasi sɛmbɔ pɛ ɔ ha Sɔ, a bebisi sɛmbɔ pɛ ɔ, nɛ a besasisi ɔ ha gdanga deamɔ pɛ ɔ fɛt, hazu wɛnɛ nɛ mboazu nɛ nzeng.

¹⁰Ka ɔ tɔ nde, ɔ tɛ de gdangamɔ na, ki ɔ ba Sɔ tuka wan-tɔ dalo, nɛ wen pɛa bo ang ha tɛ ɔ na.