Read south west gbaya 1 Jean 4 Bible Online

1 Jean 4 - south west gbaya bible

1 Jean 4

¹Hio ndɔngsila mi, hio wi ndɔng ka tɔ nde, *Nzɔy-Sɔtɛ ha tɛ mbwa, ka ɛnɛ amɛkiri mbwa fɛt na. Ma, ɛnɛ awe sɔtɛ ka dung ha tɛ mbwa hazu ing mana yo tɛ nɛ pɛ Sɔ. Hazu hio *wan-tɔkuliwen dalo dona nzan kari.

²Mɛgi, wal ka ɛnɛ being wi ka Nzɔy-Sɔtɛ pɛ Sɔ ha tɛ wa, yo nê ɛngɛ: Wi ka gbasi long nde, Jésus-Christ tɛa ha nzan tɛ yol tɛ wi, Nzɔy-Sɔtɛ ha tɛ wia.

³Ma, wi ka kafi nde, Jésus tɛ yol tɛ wi na, Nzɔy-Sɔtɛ pɛ Sɔ bo ha tɛ wa na. Yo nê sɔtɛ pɛ wan-sungiri Christ ka dung ha tɛ wa. Ɛnɛ baze nde, wan-sungiri Christ betɛ. Sising, a hɔa ha nzan kari.

⁴Hio bem pɔm, ɛnɛ nê pɛ Sɔ. Ɛnɛ gana zu hio wan-tɔkuliwen dalo fɛt kari. Hazu Nzɔy-Sɔtɛ ka dung ha tɛ ɛnɛ, wɛnɛ nɛ ngaya pen sɔtɛ ka dung ha tɛ hio wi mɔ nzan.

⁵Hio wan-tɔkuliwen dalo ndɔng, mbwa nê hio wi mɔ nzan. Yo nê ɛngi ka mbwa wolmɔ hazu hio mɔ nzan, nɛ hio wi mɔ nzan ha zea wen pɛ mbwa.

⁶Ma, ɔ nê pɛ Sɔ. Wi ka ingɔ Sɔ, a beze wen pɛ ɔ. Ma, wi ka bo nê pɛ Sɔ na, a lɛm ze wen pɛ ɔ na. Yo nê mɛgi, ka ɔ lɛma gba soko wi ka sɔtɛ tɛwen ha tɛ wa nɛ wi ka sɔtɛ dalo ha tɛ wa.

⁷Hio ndɔngsila mi, ɔ angoy may hazu ngoy tɛ nɛ wal pɛ Sɔ. Mɛgi, wi ndang ndang fɛt ka ngoy may, Sɔ nê Bafa mbwa, nɛ mbwa ingɔ Sɔ.

⁸Hio wi ka ngoy may na, mbwa ing Sɔ na, hazu Sɔ nê ngoy.

⁹Sɔ tomsa ndanga Bewei pɛa tɛ hakɛ ha nzan nde, ɔ akpa tunɔ nɛ wal wa. Yo nê mɛgi, ka Sɔ osa ngoy ka wɛnɛ ngoya nɛ ɔ.

¹⁰Ngoy nê ɛngɛ: Yo bo nê ɔ ha ngoy Sɔ na, ma, yo nê Sɔ ha ngoy ɔ. A tomsa Bewei pɛa tuka nde, wɛnɛ afe gɔn zu ɔ tuka sadaka, ka gu *sɛmbɔ pɛ ɔ yunɛ.

¹¹Hio ndɔngsila mi, ɛnɛ zɔka ngoy ka Sɔ ngoya nɛ ɔ. Mɛgi, ɔ angoy may gbesi tuka ɛngi.

¹²Ma wi ndang tɛ zɔk Sɔ na. Ka ɔ ngoy may, Sɔ ang ha tɛ ɔ, nɛ ngoy pɛa lɛma wɛɛ ha tɛ ɔ.

¹³Sɔ haa *Nzɔy-Sɔtɛ pɛa ha ɔ. Yo nê ɛngi ka ɔ ingɔ nde, ɔ ang ha tɛ Sɔ, nɛ wɛnɛ ang ha tɛ ɔ.

¹⁴Pɛ ɔ, ɔ zɔka nɛ tɛ gbali ɔ nde, Sɔ, Bafa tomsa Bewei pɛa mɛ dung *wan-kpasisi hio wi mɔ nzan. Nɛ sising ɔ ha kɛa wena.

¹⁵Mɛgi, wi ka gbasi nde, Jésus nê *Bewei pɛ Sɔ, yo osi nde, Sɔ ang ha tɛ wa, nɛ wɛnɛ ang ha tɛ Sɔ.

¹⁶Pɛ ɔ, ɔ ingɔ nde, Sɔ ngoya ɔ. Nɛ ɔ mɛkara ngoy, ka wɛnɛ ngoya nɛ ɔ. Sɔ nê ngoy. Mɛgi, wi ka dung ha tɛ ngoy, wɛnɛ ang ha tɛ Sɔ, nɛ Sɔ ang ha tɛ wa.

¹⁷Ka ngoy lɛma wɛɛ ha tɛ ɔ, ɔ bedung nɛ da ha swe kita pɛ Sɔ, hazu dungɔ pɛ ɔ ha nzan yo gbesi tuka pɛ Jésus. Ke bo ha zang ngoy na.

¹⁸Ma, ngoy ka lɛma wɛɛ ha yinɔ ke ha sila wi yunɛ. Wi ka takiri nde, a bekpa ndulsomɔ, wɛnɛ nɛ ke. Mɛgi, ka ma wi nɛ ke, yo osi nde, ngoy tɛ lɛm ka wɛɛ ha tɛ wa na.

¹⁹Pɛ ɔ, ɔ ngoya may hazu Sɔ ha ngoy ɔ sɔngsi.

²⁰Ka ma wi tɔ nde, a ngoya Sɔ, nɛ wɛnɛ ha sɛna ya wa, wɛnɛ nê wan-tɔ dalo. Hazu, ka ma wi tɛ ngoy ya wa ka dung ha li wa na, a bengoy Sɔ ka wɛnɛ zɔk na, mɛng?

²¹Zɔk, Christ haa ɔ *mbonga ɛngɛ: Wi ka ngoy Sɔ, lɛma nde, wɛnɛ angoy fin ya wa.