Read south west gbaya 1 Jean 5 Bible Online

1 Jean 5 - south west gbaya bible

1 Jean 5

¹Wi ndang ndang fɛt ka mɛkiri nde, Jésus nê *Mesi, mbwa nê bem pɛ Sɔ. Mɛgi, wi ndang ndang fɛt ka ngoy Sɔ, Bafa, mbwa ngoya hio bem pɛa fin.

²Ka ɔ ngoya Sɔ, nɛ ka ɔ ha dea mɔ lɛm nɛ hio *mbonga pɛa, yo nê ɛngi ka begbasi ha ɔ nde, ɔ ngoya hio bem pɛ Sɔ.

³Nɛ ka ɔ pam hio mbonga pɛ Sɔ, ɛngi osi nde, ɔ ngoya Sɔ. Nɛ hio mbonga pɛa bo nê gdingbɛng toy ha zu ɔ na.

⁴Hazu hio bem pɛ Sɔ fɛt began zu mɔ nzan fɛt. Ka ɔ mɛkara Jésus-Christ, ɔ gana zu mɔ nzan kari.

⁵Nge wi ka began zu nzan, o nde? Yo sɔna nê wi ka mɛkiri nde, Jésus nê *Bewei pɛ Sɔ.

⁶Jésus-Christ tɛa ha pɛ ɔ nɛ wal mɔ bwa: Li ka ɛ gdumso wɛnɛ ang, nɛ tɔktɛ wa ka sɛa ha ngimɔ fio pɛa. A tɛ tɛ sɔna nɛ wal li na, ma, nɛ wal li nɛ tɔk fɛt. Nɛ *Nzɔy-Sɔtɛ ha kɛa wena, hazu Nzɔy-Sɔtɛ nê wan-tɔ tɛwen.

⁷Mɛgi, yo nê mɔ tar ka kɛ wen nde, Jésus nê Bewei pɛ Sɔ:

⁸Nzɔy-Sɔtɛ, li nɛ tɔk. Hio mɔ tar fɛt ha kɛa ndangtɛ wen ɛngɛ.

⁹Ka ma wi kɛ wen hazu mɔ ka wɛnɛ zɔka, ɔ ha mɛkara yo. Ma, wen ka Sɔ kɛ, yo nɛ zioa pen pɛ wi. Yo nê Sɔ ha kɛ wen hazu Bewei pɛa.

¹⁰Mɛgi, wi ka mɛkiri Bewei pɛ Sɔ, a ingɔ ha zang sila wa nde, wen ka Sɔ kɛa nê tɛwen. Ma, wi ka mɛkiri Sɔ na, a baa Sɔ tuka wan-tɔ dalo. Hazu a tɛ mɛkiri wen ka Sɔ kɛa hazu Bewei pɛa na.

¹¹Nɛ Sɔ kɛa wen nde, wɛnɛ haa *tunɔ kpoo ha ɔ kari, nɛ ɔ kpaa tunɔ ɛngɛ nɛ wal Bewei pɛa.

¹²Wi ka de sɔy hinɛ Bewei pɛ Sɔ, a kpaa tunɔ kari. Ma, wi ka de sɔy hinɛ Bewei pɛ Sɔ na, a lɛm kpa tunɔ na.

¹³Mi ngɛraka takarata ɛngɛ ha ɛnɛ ka mɛkara ling *Bewei pɛ Sɔ tuka nde, ɛnɛ aing nde, ɛnɛ kpaa *tunɔ kpoo kari.

¹⁴Ka ɔ gɔ ha kɔ Sɔ ma mɔ, ka lɛm nɛ mɔ ka wɛnɛ ngoya, ɔ gde tazu ɔ ha tɛ wa nɛkpasa nde, a beze gɔamɔ pɛ ɔ.

¹⁵Tuka ɔ ingɔ nde, Sɔ ha zea gɔamɔ pɛ ɔ, mɛgi ɔ ingɔ fin nde, ɔ kpaa mɔ ka ɔ gɔ ha kɔ wa kari.

¹⁶Ka ma wi zɔka ya wa ha dea ma gdangamɔ, ka lɛm nɛ fio ha li Sɔ na, lɛma nde, wɛnɛ agɔ Sɔ, nɛ Sɔ beha tunɔ ha wi ɛngɛ. Wen ɛngɛ nê sɔna hazu hio gdangamɔ ka lɛm nɛ fio ha li Sɔ na. Ma, ma gdangamɔ ang ka lɛm nɛ fio ha li Sɔ. Mi tɛ tɔ nde, ɛnɛ agɔ Sɔ hazu hio wi ka dea tili gdangamɔ mɛgi, na.

¹⁷Kpasawen, tili gdanga deamɔ fɛt, yo nê gdangamɔ ha li Sɔ. Ma, hio ma gdangamɔ ang ka lɛm nɛ fio ha li Sɔ na.

¹⁸Ɔ ingɔ nde, hio wi ndang ndang fɛt ka dung nê bem pɛ Sɔ, mbwa bhɔn ha dea gdangamɔ na. Hazu Bewei pɛ Sɔ ha pama tɛ mbwa, nɛ gdanga sɔ lɛm gan zu mbwa na.

¹⁹Ɔ ingɔ nde, ɔ nê hio wi pɛ Sɔ, ma, nzan fɛt dung ha si ziomɔ pɛ gdanga sɔ.

²⁰Ɔ ingɔ nde, Bewei pɛ Sɔ tɛa tɛ ha ɔ mbaramɔ nde, ɔ aing kpasa Sɔ. Ɔ ang ha tɛ kpasa Sɔ hazu ɔ ang ha tɛ Bewei pɛa, Jésus-Christ. Wɛnɛ nê kpasa Sɔ, nɛ wɛnɛ nê tunɔ kpoo.

²¹Hio bem pɔm, ka ɛnɛ andari hio gbele sɔ na!