Read south west gbaya 3 Jean 1 Bible Online

3 Jean 1 - south west gbaya bible

3 Jean 1

¹Mi, kotowi mɔ eglize, mi ngɛriki takarata ɛngɛ ha mɛ, Gaius, ka mi ngoya nɛ tɛwen.

²Ndɔngsila mi, mi ngoy nde, mɔ pɛ mɛ fɛt adung nɛdedea, nɛ mɛ dung fin nɛ dede tɛ nɛ wal multɛ tuka mɛ dung nɛ wal sɔtɛ.

³Hio ma ya ha Christ, ka guotɛ ha pɛ mɛ tɛnɛ, tɔa ha mi nde, mɛ ha pama tɛwen, nɛ mɛ ha dea mɔ lɛm nɛ tɛwen. Ka mi zea mɛgi, yo haa totɛ ha mi nɛkpasa.

⁴Ka mi zea nde, hio bem pɔm ha dea mɔ lɛm nɛ tɛwen, ɛngɛ ha mi gasa totɛ. Ma totɛ pɔm pen ɛngɛ bona.

⁵Ndɔngsila mi, mɛ nɛ mboazu ha gbakara hio ya ha Christ, ngase mbwa gutɛ nɛyɛa tɛnɛ.

⁶Mbwa tɔa kasi ngoy ka mɛ ngoya nɛ mbwa ha li hio *giliwi mɔ eglize hakɛ. Nɛdedea nde, mɛ agbakiri mbwa tuka Sɔ ngoya ka mbwa benak yali pɛ mbwa.

⁷Hazu, mbwa ha yala mɛ de tom nɛ ling Christ, nɛ mbwa ha kafa kuo mɔ ha kɔ hio *bhilo.

⁸Lɛma nde, ɔ, hio wi pɛ Christ, agbakiri tili wi ndɔng tuka nde, ɔ ade sɔy hinɛ mbwa ha zang tom ka mbwa de hazu tɛwen.

⁹Mi ngɛraka ma bebe takarata ha *giliwi mɔ eglize haki. Ma, Diotrefe ka ngoy dung wan hazu mbwa, a ngoy zea wen pɛ ɔ ndang na.

¹⁰Hazu ɛngi, ka mi behɔ ha pɛ mbwa, mi begba tazu hio wi nɛ hio gdanga deamɔ pɛa, nɛ hio gdanga wen dalo ka wɛnɛ tɔ sungiri nɛ ɔ. Wɛnɛ de sɔna nɛ ɛngi na, ma, a kafi fin ba nɛ dede kɔ hio ya ha Christ ha yali. Nɛ fin, a dolsi ɛ ndɔng ka ngoy ba hio ya ndɔng nɛ dede kɔ, nɛ a mul mbwa pi, gbo ha soko giliwi mɔ eglize.

¹¹Ndɔngsila mi, ka mɛ azɔk dea gdangamɔ mɛ de nɛ pɛ mɛ na. Ma, mɛ zɔk dea dedemɔ mɛ de nɛ pɛ mɛ. Wi ka de dedemɔ, wɛnɛ nê wi pɛ Sɔ. Ma, wi ka de gdangamɔ, wɛnɛ tɛ zɔk Sɔ na.

¹²Ka bo nê pɛ Demetrius, wi fɛt ha tɔa dede lingtɛ wa. Hio deamɔ pɛa ka lɛm nɛ tɛwen, ha tɔa ndangtɛ wen. Nɛ ɔ fin ha tɔa yo gbesi. Mɛ ingɔ nde, wen ka ɔ tɔ, yo nê tɛwen.

¹³Mi nɛ wen nɛdɔka mɛ tɔ ha mɛ. Ma, mi ngoy ngɛriki yo fɛt ha zang takarata na,

¹⁴hazu mi ngoy mɛ nɛ ha pɛ mɛ sising ka ɔ awolmɔ ha li may.

¹⁵Gaamɔ adung hinɛ mɛ! Hio dan mɛ hakɛ fana mɛ. Mɛ fan hio dan ɔ ndang ndang fɛt.