Read south west gbaya Gbasamɔ 11 Bible Online

Gbasamɔ 11 - south west gbaya bible

Gbasamɔ 11

¹Hapata, ɛ haa mi ma te sisongo tuka tongolo weki bɔyamɔ. Nɛ ɛ tɔa ha mi: «Mɛ nɛ, nɛ weki bɔya *gasa twa Sɔ, nɛ fin bɔya bhandi ha sadaka. Mɛ tɔl fin hio wi ka lukisi Sɔ ha zanga.

²Ma, ka mɛ aweki zang dɛl mɔ gdong gasa twa Sɔ na, hazu ɛ haa yo ha hio wi ndɔng ka bo nê *zuife na. Mbwa be-um nzɔy gasa le lɛm kilize bhukɔa nar gbala bwa.

³Hio wan-kɛwen pɔm bwa beyol la zim mɔ. Nɛ mi beha mbwa ngatɛ mɛ tɔ hio kuliwen pɔm lɛm hio yala ndɔng tomay nɛ gɔmmay bwa zu bhukɔa mɔrkɔ zu bhukɔa ndang (1260).»

⁴Hio wan-kɛwen ndɔng bwa, mbwa nê hio te olive bwa nɛ hio solo lamba bwa ka yol ha li *Kongawan, wan-zu nu fɛt.

⁵Ka ma wi ngoy mɛ de gdangamɔ ha tɛ mbwa, we begbo ha nu mbwa, nɛ yo bebesisi hio ngana pɛ mbwa. Lɛma nde, ɛ agbɛ wi ka ngoy mɛ de gdangamɔ ha tɛ mbwa.

⁶Ha zang hio yala ndɔng fɛt ka mbwa betɔ kuliwen pɛ Sɔ, mbwa nɛ ngatɛ mɛ gdɔki nu ngɔn tuka nde, kolo aɔl na. Mbwa fin nɛ ngatɛ mɛ kifiri hio nanali ha tɔk, nɛ mɛ mɛl hio wi mɔ zu nu fɛt nɛ hio tili kemɔ ha ngimɔ fɛt tuka sila mbwa ngoya.

⁷Ka mbwa karsa kɛa wen nu Sɔ, ma ngɔnzu ndang begbo ha zang fongo nɛ bebi bulo sungiri nɛ mbwa. A began zu mbwa, nɛ a begbɛ mbwa.

⁸Hio wɔl mbwa bedung ha mbango mɔ gasa le, ha bhandi ka ɛ bangba Kongawan pɛ mbwa ha getakate. Ɛ saa ling gasa le ɛngɛ nɛ zɛng nde, Sodome mana Ezipte.

⁹Hio wi mɔ kandɔ fɛt, mɔ nugala fɛt, mɔ nu le fɛt, nɛ mɔ kandɔnu fɛt, mbwa begɛri hio wɔl ndɔng ha yala tar nɛ ndambu. Nɛ mbwa bedol mɛ gun mbwa.

¹⁰Hio wi mɔ nu fɛt bede totɛ hazu fio pɛ hio wi ndɔng. Mbwa bede gaga, nɛ mbwa beha hio dedemɔ ha may hazu hio *wan-tɔkuliwen ndɔng bwa bayukiti mbwa pentɛ.

¹¹Ma, hapata yala tar nɛ ndambu, ɔmi tunɔ ka gutɛ ha pɛ Sɔ, lea tɛ mbwa, nɛ mbwa yola ha zu nanga. Nɛ gasa ke baa hio wi ka zɔka mbwa.

¹²Hapata, hio wan-tɔkuliwen ndɔng bwa zea ma gɛl ha ngɔn ka tɔa ha mbwa: «Ɛnɛ dang tɛ hakɛ.» Nɛ ha li hio ngana pɛ mbwa, mbwa danga si ha ngɔn ha zang buswe.

¹³Ha ndangtɛ ngimɔ ɛngi, nu yaka nɛngaya. Yo gbaa soko gasa le ɛngɛ bhukɔ, nɛ yo gbinɔ ma bhalkɔa ndang ha sokoa. Nɛ hio wi tomay mɔrkɔ zanga bwa fea ha yo. Gasa ke dona sila hio olo wi, nɛ mbwa lukoso Sɔ ka dung ha zang ngɔn.

¹⁴Zebwa mɔ ngɔtɛ pena mɛgi. Ma, zɔk, zetara betɛ nɛhasa.

¹⁵Hapata ɛngi, zemɔrkɔ zanga bwa *telenge dɔma mbia. Hio ma gasa gɛl gboa ha ngɔn nɛ tɔa: «Nzan ɛngɛ tɛ bo ha si ziomɔ pɛ *Kongawan pɛ ɔ hinɛ *Mesi pɛa. A bedung *kongapora ha zua kpoo nɛ kpoo.»

¹⁶Hio kotowi bhuze bwa gbala nar ka dungnu ha li Sɔ ha hio solowan pɛ mbwa, ngbio zigolo ha nu, gok li ha si Sɔ hazu lukisi nɛ wɛnɛ.

¹⁷Mbwa tɔa: «Kongawan Sɔ, wan-zu mɔ fɛt, mɛ ang nɛ mɛ badung ang. Ɔ tɔ oeba ha mɛ hazu mɛ gbasa gasa ngatɛ pɛ mɛ, nɛ mɛ dea tɛ mɛ kongapora.

¹⁸Hio kandɔ tɛ bo nɛ ngambi, ma, sising, ngimɔ ngambi pɛ mɛ hɔa. Yo nê ngimɔ gɔna kita ha zu hio fiowi. Yo nê ngimɔ ka mɛ bekɛ nɛ hio wan-tom pɛ mɛ, hio *wan-tɔkuliwen, hio nzɔy wi, nɛ hio wi fɛt ka yu ke ling mɛ, mana bebe wi, mana gasa wi. Yo nê ngimɔ ka mɛ bebhondisi hio wi ndɔng ka bhondisi zu nu.»

¹⁹Ha zang ngɔn, nu *gasa twa Sɔ gboa long. Nɛ ɛ zɔka ang kubha *mbon pɛ Sɔ. Pioli kolo, gisi nɛ tubho da kolo gboa ha ngɔn, nu yaka, nɛ kolo bhɔkala gɔya nɛdɔka.