Read south west gbaya Gbasamɔ 12 Bible Online

Gbasamɔ 12 - south west gbaya bible

Gbasamɔ 12

¹Hapata ɛngi, ɛ zɔka ma gasa *mɔweka ha ngɔn. Yo nde, ma bhoko ndang yola swe tuka la ha tɛ wa, nɛ ze dungɔ ha si nanga wa. Ndutu wan mɔ sɔla bhukɔ gbala bwa ha zu wa.

²Wɛnɛ nɛ zang, nɛ ngimɔ bhɛ lɛma kari. A gdɔra hazu yimtɛ bio bhɛ ha yukoto wɛnɛ.

³Nɛ ɛ zɔka ma mbing mɔweka ha ngɔn. Yo nde, ma gasa gbɛ ndibha ka dung nɛ zu mɔrkɔ zanga bwa, nɛ zak bhukɔ. Hio ndutu wan mɔrkɔ zanga bwa ha hio zu wa.

⁴Wɛnɛ gbaa soko hio sɔla nɛ zugilia tar, nɛ a mɛla nɛ kunda wa ma zugili ha sokoa ndang pi ha nu. Nɛ wɛnɛ yola hapɛtɛ bhoko ɛngɛ ka bi mɛ bhɛ, tuka nde, wɛnɛ agul bema ha pata bhɛ.

⁵Bhoko ɛngɛ bhɛa nɛ bewei ka bengbɔsi hio kandɔ fɛt nɛ tongolo wan mɔ bolo. Nɛ ɛ kuo bema nɛhasa nɛnɛ ha pɛ Sɔ, nɛ hapɛtɛ solowan pɛa.

⁶Nɛ bhoko ɛngɛ yuo mɔ nɛ ha kpɛnu, ha bhandi ka Sɔ babhɔngiri bingiri mɛ day wɛnɛ haki lɛm yala tomay nɛ gɔmmay bwa zu bhukɔa mɔrkɔ zu bhukɔa ndang (1260).

⁷Hapata ɛngi, bulo angara ha zang ngɔn. Michel hinɛ hio *telenge pɛa bio bulo sungiri nɛ ndibha, nɛ ndibha hinɛ hio telenge pɛa bio bulo fin.

⁸Ma, ndibha teka ha si bulo. Mɛgi, wɛnɛ hinɛ hio telenge pɛa bo fin nɛ ziomɔ mɛ bhɔn ha zang ngɔn na.

⁹Ɛ pio wɛnɛ ha nu hinɛ hio telenge pɛa fɛt. Gasa ndibha ɛngɛ, wɛnɛ nê gɔk mɔ koto ngimɔ, ka ɛ sa nde, Gdanga Sɔ mana *Satan, wan-osili hio wi mɔ zu nu fɛt.

¹⁰Hapata ɛngi, mi zea ma gasa gɛl ndang ha ngɔn ka tɔa: «Sising, ngimɔ ka Sɔ pɛ ɔ bekpasisi nɛ hio wi pɛa hɔa kari. Sising, wɛnɛ tɛ bo nê *kongapora nɛ ngatɛ. Sising, *Mesi pɛa gbasa ziomɔ pɛa. Hazu wan-fundi hio ya ɔ, ka fundi mbwa swe nɛ zɛ ha li Sɔ pɛ ɔ, ɛ pio wɛnɛ gbo ha zang ngɔn.

¹¹Hio ya ɔ gana zu wa nɛ wal tɔktɛ Besami, nɛ fin nɛ wal tɛwen ka mbwa kɛa wena. Mbwa tɛ zɔk tunɔ pɛ mbwa tuka ma mɔ na, nɛ mbwa mɛkara mɛ fe.

¹²Mɛgi, ngɔn nɛ hio wi ka de le ang, ɛnɛ ade totɛ! Ma, ngɔtɛ ha nu nɛ ha nana-litɔng, hazu Satan zilo nɛ ha pɛ ɛnɛ. Nɛ wɛnɛ nɛ gasa ngambi, hazu a ingɔ nde, yala pɛa dɔk fin na.»

¹³Ka ndibha zɔka nde, ɛ pio wɛnɛ ha nu kari, a naka pata bhoko ka bhɛa bewei.

¹⁴Ma, bhoko kpaa bhaka bwa tuka pɛ gasa nzio hazu buy ha kpɛnu, ha bhandi ka Sɔ babhɔngiri gde ha wɛnɛ. Haki, wɛnɛ nɛ yɛa ha li gɔk, nɛ a bekpa yɔngamɔ ha zang bɛlɛ tar nɛ ndambu.

¹⁵Mɛgi, gɔk gbosasa li ha nu wa tuka nanali. Nɛ lia naka pata bhoko tuka nde, yo avuvili wɛnɛ pen nɛ.

¹⁶Ma, nu gbakara bhoko. Nu bhaa nu wa, nɛ a gulo nanali ɛngɛ fɛt ka ndibha gbosasa ha nu wa.

¹⁷Mɛgi, sila ndibha yimɔ sungiri nɛ bhoko, nɛ a pena ha bio bulo sungiri nɛ hio olo bem pɛ bhoko, ɛ ndɔng ka pam hio wen *mbonga pɛ Sɔ, nɛ ka pama tɛwen ka Jésus kɛ wena.

¹⁸Hapata ɛngi, ndibha nɛa nɛ yol ha nukolo nana-litɔng.