Read south west gbaya Gbasamɔ 13 Bible Online

Gbasamɔ 13 - south west gbaya bible

Gbasamɔ 13

¹Hapata, mi zɔka ma ngɔnzu ha gboa ha si nana-litɔng. Wɛnɛ nɛ zak bhukɔ, nɛ fin nɛ zu wa mɔrkɔ zanga bwa. Hio ndutu wan bhukɔ ha zu hio zak wa. Ha tɛ hio zu wa ndang ndang fɛt, ɛ ngɛraka ma ling ka fɛngsi Sɔ.

²Ngɔnzu ɛngɛ ka mi zɔka, baa may hinɛ gɔ. Nanga wa tuka pɛ ma gasa ngɔnzu ka ɛ sa nde, urse, nɛ nu wa tuka pɛ dila. Ndibha haa ngatɛ pɛa, solowan pɛa, nɛ gasa ziomɔ ha wɛnɛ.

³Ma zu wa ndang tuka yo bakɔmbiri nɛ dalɛ fio, ma, dalɛa wea kari. Mɛgi hio wi mɔ zu nu fɛt yaksa hazu ngɔnzu ɛngɛ, nɛ mbwa ndara wɛnɛ.

⁴Mbwa lukoso ndibha tuka ma sɔ hazu a haa ziomɔ ha ngɔnzu ɛngɛ. Mbwa lukoso ngɔnzu ɛngɛ fin nɛ tɔa: «Nge wi ha belɛm may hinɛ ngɔnzu ɛngɛ, o nde? Nge wi ha lɛma bio bulo hinɛ wɛnɛ, o nde?»

⁵Ngɔnzu ɛngɛ kpaa ziomɔ mɛ tɔ hio wen suotɛ nɛ hio wen fɛngsi Sɔ. A kpaa ziomɔ mɛ de mɛgi lɛm kilize bhukɔa nar gbala bwa.

⁶Nɛ wɛnɛ guo nu nɛ tɔ wen fɛngsamɔ ha tɛ Sɔ. A fɛngsa ling Sɔ, bhandi ka wɛnɛ de le ang, nɛ fin ɛ ndɔng ka de le ha zang ngɔn.

⁷Ngɔnzu ɛngɛ kpaa ziomɔ mɛ bi bulo sungiri nɛ hio wi pɛ Sɔ, nɛ mɛ gan zu mbwa. A kpaa ziomɔ ha zu hio nugala fɛt, kandɔ fɛt, nu le fɛt, nɛ kandɔnu fɛt.

⁸Hio wi mɔ zu nu fɛt belukisi wɛnɛ tuka ma sɔ, ngbɔl kanɛ hio wi ndɔng ka Sɔ ngɛraka ling mbwa ha Takarata Tunɔ nisi ha dea nzan. Takarata ɛngɛ nê pɛ Besami ka ɛ bagbɛ.

⁹«Wi ka bo nɛ zala mɛ ze mɔ, wɛnɛ aze!

¹⁰Ka Sɔ weka nde, ma wi adung nê wan-zɔbhɔ, bede ka gan, a benɛ ha twa zɔbhɔ. Ka Sɔ weka nde, ɛ agbɛ ma wi nɛ gbapa, bede ka gan, ɛ begbɛ wɛnɛ nɛ gbapa. Ha ngimɔ ɛngi lɛma ka lɛm nde, hio wi pɛ Sɔ abhɔn ka ha mɛkara Sɔ nɛ yikosila.»

¹¹Hapata, mi zɔka ma mbing ngɔnzu ha gboa ha si nu. Wɛnɛ nɛ zak bwa tuka pɛ besami, ma, a wolmɔ tuka ndibha.

¹²Wɛnɛ nɛ ziomɔ fɛt pɛ bosi ngɔnzu hazu de tom ha li wa. Wɛnɛ dungɔ ha nɔsasa nu nɛ hio wi mɔ zua fɛt nde, mbwa alukisi bosi ngɔnzu ka dalɛ fio pɛa wea kari, tuka ma sɔ.

¹³Zebwa ngɔnzu ɛngɛ dea hio gasa *mɔweka. Ha li hio wi fɛt, a zilso we ha ngɔn pi ha nu.

¹⁴A osala hio wi mɔ zu nu nɛ wal hio mɔweka ndɔng ka wɛnɛ kpaa ziomɔ mɛ de ha li bosi ngɔnzu. A tɔa ha hio wi mɔ zu nu nde, mbwa asɛk ma zizi bosi ngɔnzu ka bakpa dalɛ gbapa nɛ ka bakifiri nɛ zutunɔ.

¹⁵Nɛ zebwa ngɔnzu kpaa ziomɔ mɛ ha ɔmi tunɔ ha zizi bosi ngɔnzu. Mɛgi zizi bosi ngɔnzu lɛma wolamɔ, nɛ haa nu nde, ɛ agbɛ hio wi ndɔng ka kafi lukoso yo.

¹⁶Ngase bebe wi mana gasa wi, ngase wan-kpamɔ mana fabha wi, ngase bele mana bala, ngɔnzu ɛngɛ nɔsasa hio wi fɛt nde, mbwa akpa ma dafu ha wekɔ mbwa nɛ ha sɔngsi mbwa.

¹⁷Nɛ ka ma wi bo nɛ dafu ɛngɛ na, a lɛm mɛ hɛ nɛ gdongi ma mɔ na. Dafu ɛngɛ, yo nê ling bosi ngɔnzu mana nɔmɔrɔ ka lɛma nɛ ling wa.

¹⁸Ɛngɛ nê ngimɔ hazu osi mbaramɔ. Wi ka dung nɛ ingɔmɔ, lɛma tɔl nɔmɔrɔ pɛ bosi ngɔnzu, hazu nɔmɔrɔ ɛngɛ lɛma nɛ ling ma wi. Nɔmɔrɔ ɛngɛ, yo nê gɔmmay mɔrkɔ zanga ndang zu bhukɔa mɔrkɔ zu bhukɔa ndang zanga mɔrkɔ gbala ndang (666).