Read south west gbaya Gbasamɔ 14 Bible Online

Gbasamɔ 14 - south west gbaya bible

Gbasamɔ 14

¹Hapata, mi gɛra mɔ, nɛ mi zɔka Besami ha yola ha zu ngari *Sion. Hio wi tomay gɔmmay ndang nɛ tomay bhukɔa nar gbala nar (144’000) dungɔ hinɛ wɛnɛ. Ɛ bangɛriki ling Besami nɛ ling Bafa wa ha sɔngsi mbwa.

²Nɛ mi zea ma gɛl ka guotɛ ha zang ngɔn tɛ. Gɛla tuka hio gasa somli, nɛ tuka gasa fuo da kolo. Nɛ gɛl ka mi zea, yo fin tuka gɛl kunde ka hio wan-mɛl kunde ha mɛla.

³Hio dɔka wi ndɔng ha bea ma mbombe gima ha li solowan, ha li hio tunɔ mɔ nar, nɛ ha li hio kotowi bhuze bwa gbala nar. Hio wi ka lɛma yambi gima ɛngɛ, yo sɔna nê hio wi ndɔng tomay gɔmmay ndang nɛ tomay bhukɔa nar gbala nar (144’000), ka Sɔ bayangi mbwa ha nu.

⁴Hio wi ndɔng tɛ gdangsi tɛ mbwa nɛ bhoko na, mbwa pama tɛ mbwa nɛ saa. Mbwa ha ndara Besami ha bhandi fɛt ka wɛnɛ yal ang. Sɔ yanga mbwa ha soko hio wi tuka hio bosi waya hazu dung nê pɛa nɛ pɛ Besami.

⁵Ɛ tɛ ze ma wen dalo ha nu mbwa ndang na, nɛ ma wen bo ha zu mbwa na.

⁶Hapata, mi zɔka ma mbing telenge ha buyoa nɛyɛa ha liswe. A tɛa ha tɔa dede wen ka bebhɔn kpoo, ha hio wi mɔ zu nu fɛt, ha kandɔnu fɛt, ha nugala fɛt, ha nu le fɛt, nɛ ha kandɔ fɛt.

⁷A tɔa nɛ ngagɛl: «Ɛnɛ yu ke Sɔ, nɛ ɛnɛ lukisi wɛnɛ! Hazu ngimɔ ka wɛnɛ begɔn nɛ kita ha zu hio wi hɔa kari. Ɛnɛ lukisi wɛnɛ ka dea ngɔn nɛ nu, nana-litɔng nɛ hio zu ndong li fɛt.»

⁸Nɛ ma zebwa telenge gboa hapata bosia, a tɔa: «Gasa le Babilone teka, a teka kari. A haa ba li vigne pɛa ha hio kandɔ fɛt mɛ nɔ nde, ka mbwa ade wanza hebhe tuka wɛnɛ.»

⁹Nɛ ma zetar telenge gboa fin hapata ɛ ndɔng bwa. A tɔa nɛ ngagɛl: «Hio wi ndɔng ka lukisi ngɔnzu nɛ zizi tɛ wa, nɛ ka kpa dafu pɛa ha sɔngsi mbwa mana ha kɔ mbwa,

¹⁰mbwa benɔ ba li vigne pɛ Sɔ. Yo nê li vigne mɔ ngambi pɛ Sɔ, ka wɛnɛ tɛ sɔkiri na, nɛ ka wɛnɛ gɔsa ha zang kɔpɔ mɔ ngambi pɛa. Nɛ mbwa bekpa yukotomɔ ha zang we nɛ piti we ha li hio nzɔy telenge nɛ ha li Besami.

¹¹Nɛ zɛwe ka yukiti mbwa, ha tuloa kpoo nɛ kpoo. Hio wi ndɔng ka lukisi ngɔnzu nɛ zizi tɛ wa, nɛ ka kpa dafu ling pɛa, mbwa lɛm ɔmtɛ na, ngase ha swe, ngase ha zɛ.»

¹²Yo nê ɛngi, lɛma nde, hio wi pɛ Sɔ adung nɛ yikosila, mbwa fɛt ka pam hio wen *mbonga pɛa, nɛ ka mɛkiri Jésus nɛ mboazu.

¹³Hapata, mi zea ma gɛl ha zang ngɔn ka tɔa: «Mɛ ngɛriki mɔ nde: Angiri ha ngimɔ sising, hio wi fɛt ka befe hazu mbwa de sɔy hinɛ *Kongawan, mbwa adung nɛ totɛ!» Nɛ *Nzɔy-Sɔtɛ kɔa: «Ey, kpasawen, mbwa aɔm tɛ mbwa ha ngatom pɛ mbwa, hazu dede tom pɛ mbwa ha kɛa wen tɛ mbwa.»

¹⁴Mi gɛra mɔ fin, nɛ mi zɔka ma buswe kpung-kpung, ka ma mɔ tuka wi dungɔnu ha zua. Ndutu wan mɔ gbɛbolo ha zu wa, nɛ sɔa pa gɔn kpalmɔ ha kɔ wa.

¹⁵Ma mbing *telenge gboa ha zang *gasa twa Sɔ, nɛ gdɔra nɛ ngagɛl ha wɛnɛ ka dungɔnu ha zu buswe, a tɔa: «Ngimɔ gɔn kpalmɔ hɔa kari. Mɛ ku pa pɛ mɛ, nɛ mɛ gɔn yo, hazu kpalmɔ ha zu nu ngaya kari.»

¹⁶Mɛgi, wɛnɛ ka dungɔnu ha zu buswe, gɔna kpalmɔ ha zu nu nɛ pa pɛa, nɛ a wesara kpalmɔ mɔ zu nu fɛt.

¹⁷Ma mbing telenge gboa ha gasa twa Sɔ ha zang ngɔn. Wɛnɛ fin nɛ sɔa pa gɔn kpalmɔ ha kɔ wa.

¹⁸Nɛ ma mbing telenge gboa ha bhandi ha sadaka. Wɛnɛ nɛ ziomɔ ha zu we. Nɛ a gdɔra nɛ ngagɛl ha telenge ka dung nɛ sɔa pa gɔn kpalmɔ, a tɔa: «Mɛ ku sɔa pa pɛ mɛ, nɛ mɛ gɔn hio wayate vigne ha zu nu, hazu hio wayaa fea kari.»

¹⁹Mɛgi, telenge ɛngɛ gɔna hio wayate vigne ha zu nu, nɛ a pio yo ha zang gasa mɔ bhal wayate vigne mɔ ngambi pɛ Sɔ.

²⁰Ɛ bhala yo ha zang mɔ bhal wayate ha gdong gasa le. Nɛ tɔk foka ha zang mɔ bhal wayate ɛngɛ tuka nanali ka gdukoa hɔ ha nu yanga ha yola, nɛ ka bɔyaa lɛma kilomɛtɛrɛ gɔmmay tar.