Read south west gbaya Gbasamɔ 15 Bible Online

Gbasamɔ 15 - south west gbaya bible

Gbasamɔ 15

¹Hapata ɛngi, mi zɔka ma mbing gasa *mɔweka ka yaksi wi fɛt. Yo nê hio telenge mɔrkɔ zanga bwa ka dung nɛ hio kemɔ mɔrkɔ zanga bwa. Kemɔ ndɔng nê hio kpogio kemɔ, hazu Sɔ belɛmsiri ngambi pɛa nɛ wal mbwa.

²Mi zɔka ma mɔ tuka nana-litɔng ka lia sɔkara may nɛ we. Yo nɛ saa tuka mɔ-zɔk li. Mi zɔka fin hio wi ndɔng ka gana zu ngɔnzu, zu zizi tɛ wa, nɛ zu nɔmɔrɔ mɔ ling wa. Mbwa yola ha zu nana-litɔng ɛngɛ, ka dung nɛ saa tuka mɔ-zɔk li. Hio kunde pɛ Sɔ ha kɔ mbwa.

³Mbwa ha bea gima pɛ Moïse, wan-tom pɛ Sɔ, nɛ gima pɛ Besami: «*Kongawan Sɔ, mɛ nê wan-zu mɔ fɛt, hio wi fɛt ha yaksa ha hio gasa deamɔ pɛ mɛ! Mɛ nê kongawan hazu hio kandɔ fɛt, hio bhekamɔ pɛ mɛ nê nzeng, nɛ kpasa!

⁴Nge wi ka bekafi yuo ke mɛ, Kongawan, ge? Nge wi ka bekafi lukoso mɛ ge? Hazu yo nê mɛ ndang sɔna ka dung nɛ nzɔya. Hio kandɔ fɛt betɛ tɛ lukisi mɛ tuka Sɔ, hazu hio nzeng deamɔ pɛ mɛ gboa long ha li wi fɛt.»

⁵Hapata ɛngi mi zɔka nu *gasa twa Sɔ ha zang ngɔn ha gboa long, nɛ ha zanga mi zɔka twa la mɔ *mbon pɛ Sɔ.

⁶Hio telenge ndɔng mɔrkɔ zanga bwa ka dung nɛ hio kemɔ mɔrkɔ zanga bwa, mbwa gboa ha gasa twa Sɔ. Mbwa yola bu la ka ba kpɛluɛ-kpɛluɛ, nɛ pɛrɛng mɔ gbɛbolo libhoko mbanzi mbwa.

⁷Ha soko hio tunɔ mɔ ndɔng nar, ma ndang kuo hio kɔpɔ mɔ gbɛbolo mɔrkɔ zanga bwa kapini ha hio telenge ndɔng mɔrkɔ zanga bwa. Hio kɔpɔ ndɔng dona nɛ ngambi pɛ Sɔ ka dung nɛ zutunɔ kpoo nɛ kpoo.

⁸Zang gasa twa Sɔ dona nɛ zɛwe ka tɛ nɛ *lɛkɛ-lɛkɛmɔ nɛ ngatɛ pɛ Sɔ. Wi ndang lɛm le ha zang gasa twa Sɔ na, kanɛ ngimɔ ka hio kemɔ mɔrkɔ zanga bwa pɛ hio telenge mɔrkɔ zanga bwa lɛmsara tɛ.