Read south west gbaya Gbasamɔ 19 Bible Online

Gbasamɔ 19 - south west gbaya bible

Gbasamɔ 19

¹Hapata ɛngi, mi zea gasa gɛl dɔka giliwi ha ngɔn ka tɔa: «Aleluya! Sɔ pɛ ɔ nê *wan-kpasisi ɔ! Lukosomɔ nɛ ngatɛ nê pɛa!

²Wɛnɛ ha gɔna kita nzeng lɛm nɛ tɛwen! Hazu, a gɔna kita ba nɛ gasa bhoko-de wanza ɛngɛ, ka gdangsa hio wi mɔ zu nu nɛ dea wanza pɛa. A kundoko hio wan-tom pɛa, ka tɔktɛ mbwa ndara ha kɔ bhoko ɛngɛ.»

³Nɛ mbwa tɔa fin: «Aleluya! Zɛwe ka besasa Babilone, yo betul kpoo nɛ kpoo.»

⁴Hapata, hio kotowi bhuze bwa gbala nar nɛ hio tunɔ mɔ nar fɛt, ngbio zigolo lukisi nɛ Sɔ ka dungnu ha solowan. Mbwa tɔa: «Amen! Aleluya!»

⁵Hapata ɛngi, mi zea ma gɛl ha gboa ha wal solowan, yo tɔa: «Ɛnɛ, hio wan-tom pɛ Sɔ, ɛnɛ ka yu ke Sɔ, mana bebe wi, mana gasa wi, ɛnɛ fɛt alukisi Sɔ.»

⁶Nɛ mi zea gɛl dɔka giliwi tuka hio gasa somli, nɛ tuka gasa fuo da kolo. Gɛla tɔa: «Aleluya! Hazu, *Kongawan Sɔ pɛ ɔ, wan-zu mɔ fɛt, tɛ bo nê *kongapora sising.

⁷Ɔ ade totɛ nɛ ɔ ade gaga! Ɔ aha *lɛkɛ-lɛkɛmɔ ha wɛnɛ! Hazu ngimɔ sio bhoko pɛ Besami hɔa kari, nɛ ko pɛa bhɔngara tɛ wa fɛt kari.

⁸Ko pɛa kpaa dede lɛgbɛ-lɛgbɛ la mɛ yol. Yo nɛ bua nɛ saa kpung-kpung.» Dede la ɛngɛ, yo nê hio nzeng deamɔ pɛ hio wi pɛ Sɔ.

⁹Nɛ *telenge tɔa ha mi: «Mɛ ngɛriki mɔ nde: Totɛ ha wi ka Sɔ saa wɛnɛ ha yenga sibhoko pɛ Besami.» Nɛ a tɔa fin: «Hio wen ndɔng, yo nê tɛ kpasa wen nu Sɔ.»

¹⁰Nɛ mi teka ha si nanga wa hazu lukisi wɛnɛ. Ma, a tɔa ha mi: «Pangay! Ka mɛ ade mɛgi na. Mi fin, mi nê wan-tom gbesi tuka mɛ hinɛ hio ya mɛ fɛt, ka pam tɛwen ka Jésus kɛ wena. Mɛ alukisi nɛ Sɔ!» Yo nê tɛwen ka Jésus kɛ wena, ka ha ngatɛ ha hio wi mɛ tɔ kuliwen pɛ Sɔ.

¹¹Hapata ɛngi, mi zɔka ngɔn gboa long, nɛ ma bu yanga yola ang. Ling wan-dang yanga ɛngɛ nde, «Wan-mboazu» nɛ «Wan-tɛwen.» Wɛnɛ ha gɔna kita nɛ ha bio bulo nɛ wala nzeng.

¹²Gbali wa tuka lembe we, nɛ hio dɔka ndutu wan ha zu wa. Ha tɛ wa, ɛ ngɛraka ma ling ndang, ka ma wi ing yo na, kanɛ wɛnɛ ndang sɔna.

¹³Nɛ wɛnɛ yola gbambusa ka ɛ vɔtaka ha zang tɔk. Linga nde, «Wen pɛ Sɔ.»

¹⁴Hio zugili bulo mɔ ngɔn ndara wɛnɛ ha zu hio bu yanga. Mbwa yola lɛgbɛ-lɛgbɛ la ka dung nɛ bua nɛ saa kpung-kpung.

¹⁵Sɔa gbapa gboa ha nu wa. A bemɛl hio kandɔ nɛ yo, nɛ a bengbɔsi mbwa nɛ tongolo wan mɔ bolo. A bebhal mbwa tuka hio wayate vigne hazu lɛmsiri gdanga ngambi pɛ Sɔ, wan-zu mɔ fɛt.

¹⁶Ha tɛ gbambusa pɛa nɛ ha ku wa, ɛ ngɛraka ling mɛgɛ: «*Kongapora ha zu hio kongapora fɛt, *Kongawan ha zu hio kongawan fɛt.»

¹⁷Hapata, mi zɔka ma *telenge ha yola ha zang swe. Wɛnɛ gdɔra nɛ ngagɛl ha hio nɔy fɛt ka buy nɛyɛa ha liswe. A tɔa: «Ɛnɛ fɛt, ɛnɛ tɛ tɛ wesiri may, nɛ ɛnɛ yɔng fada ka Sɔ bhɔngara.

¹⁸Ɛnɛ tɛ tɛ yɔng multɛ hio kongapora, multɛ hio kagama bulo, multɛ hio wan-bibulo, multɛ hio yanga nɛ hio wan-dang yanga, nɛ multɛ hio wi fɛt, bele mana bala, bebe wi mana gasa wi.»

¹⁹Nɛ mi zɔka ngɔnzu, nɛ hio kongapora mɔ zu nu hinɛ hio zugili bulo pɛ mbwa. Mbwa wesara may hazu bi bulo sungiri nɛ wan-dang bu yanga hinɛ zugili bulo pɛa.

²⁰Ma, ɛ baa ngɔnzu hinɛ *wan-tɔkuliwen dalo, ka bade hio *mɔweka ha li ngɔnzu. Nɛ wal hio mɔweka ndɔng, wɛnɛ dungɔ ha osala hio wi ndɔng ka dung nɛ dafu ling ngɔnzu ha tɛ mbwa, nɛ ka lukisi zizi tɛ wa. Nɛ ɛ pio ngɔnzu hinɛ wan-tɔkuliwen dalo nɛ zutunɔ ha zang tɔ we, ka ba we nɛ piti.

²¹Nɛ gbapa ka gboa ha nu wan-dang bu yanga, gbɛa hio olo wi. Nɛ hio nɔy fɛt yɔnga multɛ olo wi ndɔng zang mbwa don.