Read south west gbaya Gbasamɔ 21 Bible Online

Gbasamɔ 21 - south west gbaya bible

Gbasamɔ 21

¹Hapata ɛngi, mi zɔka mbombe ngɔn nɛ mbombe nu. Hazu mɔa ngɔn nɛ mɔa nu pena kari, nɛ nana-litɔng bo fin na.

²Nɛ mi zɔka nzɔy gasa le, yo nê mbombe Jérusalem, ha guotɛ ha ngɔn ha pɛ Sɔ zil. Le ɛngɛ bhɔngara tɛ wa nɛ lɔka tuka bhoko ka nɛ ha sio wei pɛa.

³Mi zea ma gasa gɛl ka gboa ha solowan ha tɔa: «Sising, twa pɛ Sɔ tɛ bo ha soko hio wi. A bede le hinɛ mbwa, nɛ mbwa bedung nê kandɔ pɛa. Sɔ nɛ tɛ wa bedung hinɛ mbwa, nɛ a bedung nê Sɔ pɛ mbwa.

⁴A bedi milikwa fɛt ha li mbwa yunɛ. Ngase fio, ngase ngɔtɛ, ngase lokatɛ, ngase yimtɛ bo fin na, hazu hio mɔa mɔ fɛt pena wong.»

⁵Mɛgi, wi ka dungnu ha solowan tɔa: «Sising, mi bede mɔ fɛt nɛ mbombea.» Nɛ a tɔa ha mi: «Mɛ ngɛriki hio wen ndɔng ha zu yo nê kpasa tɛwen.»

⁶Nɛ a tɔa fin ha mi: «Yo kara! Mi nê Alfa nɛ Omega, mi nê bosia nɛ kpogioa. Wi ka dung nɛ wɔ li, mi beku li ha nzɔngɛ ka ha tunɔ, ha wɛnɛ mɛ nɔ nɛ gbelea.

⁷Mi bekapini hio mɔ ndɔng ha hio wi fɛt ka gana zu mɔ. Nɛ mi bedung nê Sɔ pɛ mbwa, nɛ mbwa bedung nê hio bem pɔm.

⁸Ma, ka bo nê pɛ hio wan-ke, hio wan-yambala zu, hio wan-nyalɔ, hio nagbɛwi, hio wan-de wanza, hio wan-nganga, hio wan-lukisi gbele sɔ, nɛ hio wan-tɔ dalo fɛt, mbwa bekpa bhandi ha tɔ we ka ba we nɛ piti. Tɔ we ɛngɛ, yo nê zebwa fio.»

⁹Hapata, ma *telenge ndang tɛa ha pɔm. Wɛnɛ nê ma ndang ha soko ɛ ndɔng mɔrkɔ zanga bwa, ka baa ha kɔ mbwa hio kɔpɔ mɔrkɔ zanga bwa, ka dona nɛ hio kpogio kemɔ mɔrkɔ zanga bwa. A tɔa ha mi: «Mɛ tɛ ka mi aosi ha mɛ bhinzi bhoko ka bedung nê ko pɛ Besami.»

¹⁰*Nzɔy-Sɔtɛ baa mi, nɛ telenge ɛngɛ kuo mi nɛnɛ ha zu kuso bhele-bhele ngari. A osa ha mi gasa nzɔy le Jérusalem ha guotɛ ha ngɔn ha pɛ Sɔ zil.

¹¹Lea dona nɛ *lɛkɛ-lɛkɛmɔ pɛ Sɔ, nɛ yoloa tuka pɛ dede lɔka ta, tuka pɛ ngɛlɛ-ngɛlɛ ngagɛnɛ ta zaspe.

¹²Ma gasa kuso kin ngeng zikoro lea. Kina nɛ nua bhukɔ gbala bwa, ka hio telenge bhukɔ gbala bwa ha pama. Ha hio nua ɛ ngɛraka ling hio nugala bhukɔ gbala bwa pɛ kandɔ *Israel.

¹³Hio nua tar ha wal gutɛ swe, tar ha walɔnu swe, tar ha wal kala, nɛ tar ha wal gdɔk.

¹⁴Nanga ngeng kin ɛngɛ yol ha zu hio gasa ta bhukɔ gbala bwa. Nɛ ɛ gɔna ling hio *wan-nɛtom pɛ Besami bhukɔ gbala bwa ha tɛ hio ta ndɔng.

¹⁵Ma tongolo mɔ gbɛbolo ha kɔ telenge ka wolmɔ ha mi, hazu weki nɛ bɔyaa lea, kina nɛ hio nua.

¹⁶Lea nɛ ngbilia nar, bɔyaa nɛ pɛsaa lɛma may. Telenge weka lea nɛ tongolo weki bɔyamɔ pɛa, nɛ a kpaa nde, bɔyaa, pɛsaa nɛ kusoa lɛma may. Yo ndang ndang fɛt lɛma hio bɔya mɔwekimɔ tomay bhukɔ gbala bwa.

¹⁷Nɛ wɛnɛ weka fin kuso kina. Yo lɛma hio dɔ mɔwekimɔ gɔmmay ndang zubhukɔa nar gbala nar. Wɛnɛ weka yo nɛ ndangtɛ mɔwekimɔ tuka pɛ hio wi.

¹⁸Nɛ ɛ dea ngeng kina nɛ ngagɛnɛ ta zaspe, nɛ ka bo nê pɛ lea, ɛ dea yo nɛ kpasa gbɛbolo ka dung nɛ saa ngɛlɛ-ngɛlɛ.

¹⁹Ɛ kuo hio tili dede ngagɛnɛ ta nɛtɛ-nɛtɛ gde ha tɛ hio ta mɔ nanga ngeng kina. Ling bosi dede taa nde, zaspe, ling zebwaa nde, safir, ling zetara nde, agate, ling zenara nde, emerode,

²⁰ling zemɔrkɔa nde, sardoane, ling zemɔrkɔ zanga ndanga nde, kornaline, ling zemɔrkɔ zanga bwaa nde, krizolite, ling zemɔrkɔ zanga tara nde, berile, ling zemɔrkɔ zanga nara nde topaze, ling zebhukɔa nde, krizoprase, ling zebhukɔ gbala ndanga nde, turkoaze, nɛ ling zebhukɔ gbala bwaa nde, ametiste.

²¹Ɛ dea hio nu kina bhukɔ gbala bwa nɛ hio mɛtɛtɛ bhukɔ gbala bwa, nɛ ɛ dea nua ndang ndang fɛt nɛ mɛtɛtɛ ndang. Ɛ dea mbango mɔ lea nɛ kpasa gbɛbolo ka dung nɛ ngɛnza ngɛlɛ-ngɛlɛ.

²²Mi tɛ zɔk ma *gasa twa Sɔ ha zang lea na. Hazu, *Kongawan Sɔ, wan-zu mɔ fɛt, hinɛ Besami, mbwa ha dung nê gasa twa Sɔ mɔ lea.

²³Yo bo fin nê swe mana ze ka lɛma mɛ ba ha zu lea na, hazu yolo lɛkɛ-lɛkɛmɔ pɛ Sɔ ha baa ha zua, nɛ Besami ha dung nê saamɔ lea.

²⁴Hio kandɔ beyal ha yolo saamɔ pɛa, nɛ hio *kongapora mɔ nu fɛt beku kpaamɔ pɛ mbwa le nɛ ha zang lea.

²⁵Ɛ lɛm gdɔki hio nu kin lea ma yala ndang na, hazu zɛ lɛm dung fin haki na.

²⁶Nɛ ɛ bekay hio kpaamɔ nɛ hio dedemɔ pɛ hio kandɔ fɛt le nɛ ha zang lea.

²⁷Ma, ma mɔ nzing ndang lɛm le ha zang lea na, hio wan-de mɔ nyɛl nɛ hio wan-tɔ dalo lɛm le ang na. Yo sɔna nê hio wi ndɔng ka Sɔ ngɛraka ling mbwa ha Takarata Tunɔ pɛ Besami ha bele ang.