Read south west gbaya Gbasamɔ 3 Bible Online

Gbasamɔ 3 - south west gbaya bible

Gbasamɔ 3

¹«Mɛ ngɛriki ha *telenge pɛ giliwi mɔ eglize ha Sarde wen mɛgɛ: Ɛngɛ nê wen nu wi kɛ ka ba ha kɔ wa hio Sɔtɛ pɛ Sɔ mɔrkɔ zanga bwa nɛ hio sɔla mɔrkɔ zanga bwa. Mi ingɔ deamɔ pɛ ɛnɛ fɛt. Hio wi ha takara pɛ mbwa nde, ɛnɛ nɛ zutunɔ. Tangere, ɛnɛ fea kari.

²Ɛnɛ tun ha ɔala, ɛnɛ ngasisi olo mɔ ka tɛ fe ka na, yu nde, yo betɛ fe nɛkpasa. Hazu mi zɔka nde, tom pɛ ɛnɛ tɛ lɛm ha li Sɔ pɔm na.

³Tazu ɛnɛ agba nɛ osamɔ ka ɛnɛ bakpa nɛ ka ɛnɛ baze. Ɛnɛ pam osamɔ ɛngɛ nɛdedea, nɛ ɛnɛ kifiri sila ɛnɛ. Ka ɛnɛ dung nɛ zɔma na, mi bewang ɛnɛ tuka wanzu, nɛ ɛnɛ lɛm ing ngimɔ ka mi betɛ ndang na.

⁴Ma, hio ma wi ha soko ɛnɛ ha Sarde haki, tɛ tusisi latɛ pɛ mbwa na. Mbwa beyol bu la, nɛ ɔ benɛ nɔ hinɛ may gbesi, hazu mbwa nɛ zioa.

⁵«Wi fɛt ka began zu mɔ, mbwa beyol bu la mɛgi. Nɛ mi lɛm bisi ling mbwa ha zang Takarata Tunɔ ndang na. Ha li Bafa mi nɛ ha li hio telenge pɛa, mi betɔ long nde, wi ndɔng nê hio wi pɔm.

⁶«Wi fɛt ka bo nɛ zala mɛ ze mɔ, mbwa aze wen ka *Nzɔy-Sɔtɛ tɔ ha hio giliwi mɔ eglize.»

⁷«Mɛ ngɛriki ha *telenge pɛ giliwi mɔ eglize ha Filadelfi wen mɛgɛ: Ɛngɛ nê wen nu nzɔy wi ka tɔ tɛwen. Sɔtɛ nutwa pɛ *kongapora David ha kɔ wa. Ka wɛnɛ gbosasa nutwa, ma wi ndang mɛ gdɔki yo bo na. Nɛ ka wɛnɛ gdɔki nutwa, ma wi ndang mɛ gbosisi yo bo na.

⁸Mi ingɔ deamɔ pɛ ɛnɛ fɛt. Mi ingɔ nde, ɛnɛ bo nɛ kpasa ngatɛ na. Ma, ngase ɛngi ɛnɛ pama wen pɔm, nɛ ɛnɛ kafa mɛ kafi ling mi. Mɛgi, mi gbosasa nutwa gde long keri nɛ ɛnɛ, nɛ ma wi ndang ka lɛma mɛ gdɔki yo bo na.

⁹Ɛnɛ zɔk, hio ma wi ha tɔa dalo nde, mbwa nê *zuife. Ma, mbwa bo nê zuife na, mbwa nê giliwi pɛ *Satan. Mi benɔsisi mbwa nde, mbwa atɛ tɛ ngbi zigolo ha si ɛnɛ. Mɛgi, mbwa being nde, mi ngoya ɛnɛ.

¹⁰Ɛnɛ pama wen nu mi nde, ɛnɛ adung nɛ yikosila. Hazu ɛngi, mi fin, mi bepam ɛnɛ ha ngimɔ *sɛbhalamɔ ka betek ha nzan fɛt hazu we sila wi mɔ zu nu fɛt.

¹¹Mi bepe nɛhasa. Ɛnɛ ba mɔ ka dung ha kɔ ɛnɛ nɛ nɔa yu nde, ma wi betɛ ku kɛamɔ pɛ ɛnɛ yunɛ.

¹²«Wi fɛt ka began zu mɔ, mi begde mbwa tuka mbing twa ha gasa twa pɛ Sɔ pɔm. Mbwa lɛm gbo haki fin na. Mi begɔn ling Sɔ pɔm, ling gasa le pɛ Sɔ pɔm, nɛ mbombe ling mi ha tɛ mbwa. Gasa le ɛngi nê mbombe Jérusalem ka begutɛ ha ngɔn hapɛtɛ Sɔ pɔm tɛnɛ.

¹³«Wi fɛt ka bo nɛ zala mɛ ze mɔ, mbwa aze wen ka *Nzɔy-Sɔtɛ tɔ ha hio giliwi mɔ eglize.»

¹⁴«Mɛ ngɛriki ha *telenge pɛ giliwi mɔ eglize ha Laodise wen mɛgɛ: Ɛngɛ nê wen nu wi kɛ ka ɛ sa nde, Amen. Wɛnɛ nê mboazu wan-kɛwen, ka tɔ tɛwen. Nɛ Sɔ dea mɔ nzan fɛt nɛ wal wɛnɛ.

¹⁵Mi ingɔ deamɔ pɛ ɛnɛ fɛt. Ka bo se nde, ɛnɛ adung nɛ gaa mana nɛ gbɛnga, ki dea se!

¹⁶Tuka ɛnɛ bhisi-bhisi, yo nde, ɛnɛ bo nɛ gbɛnga na, nɛ ɛnɛ bo nɛ gaa na, mɛgi, mi beɔy ɛnɛ ha nu mi.

¹⁷Ɛnɛ ha tɔa nde, ɛnɛ nê hio wan-kpamɔ, ɛnɛ kpaa yɛbhɛ-yɛbhɛ mɔ, ma mɔ ndang kɔpi ɛnɛ na. Ma, kpasawen, ɛnɛ nê hio wan-ngɔtɛ, wan-kɔsa, wan-keri mɔ, wan-gdɔka li, wan-sɔngere, nɛ ɛnɛ tɛ ing yo na.

¹⁸Mɛgi, mi ngoya mbo ɛnɛ nde, ɛnɛ atɛ tɛ hɛ ha kɔ mi gbɛbolo ka ɛ wea ha we, tuka nde, ɛnɛ adung nê hio kpasa wan-kpamɔ. Ɛnɛ ahɛ fin bu la mɛ yol tuka nde, foy sɔngɛrɛ tɛ ɛnɛ agbasi tɛ na. Ɛnɛ ahɛ fin yina mɛ a ha gbali ɛnɛ tuka nde, ɛnɛ azɔk mɔ.

¹⁹Hio wi fɛt ka mi ngoy, mi dak zala mbwa nɛ ndulsi mbwa. Mɛgi, ɛnɛ gbɛngsi tɛ ɛnɛ, nɛ ɛnɛ kifiri sila ɛnɛ.

²⁰Ɛnɛ zɔk, mi ha yola ha nutwa nɛ mi ha kɔna. Wi fɛt ka beze gɛl mi, nɛ ka begbosisi nutwa ha mi, mi bele ha pɛ mbwa, nɛ ɔ beyɔng tɛ mɔ hinɛ may.

²¹«Wi fɛt ka began zu mɔ, mi beha mbwa wal nde, mbwa atɛ tɛ dungnu hinɛ mi ha solowan pɔm. Tuka mi fin, mi gana zu mɔ, nɛ mi ha dungɔnu hinɛ Bafa mi ha solowan pɛa.

²²«Wi fɛt ka bo nɛ zala mɛ ze mɔ, mbwa aze wen ka *Nzɔy-Sɔtɛ tɔ ha hio giliwi mɔ eglize.»