Read south west gbaya Gbasamɔ 6 Bible Online

Gbasamɔ 6 - south west gbaya bible

Gbasamɔ 6

¹Nɛ mi zɔka Besami ka kuso bosi gdangi ha nu takarata. Nɛ ha soko tunɔ mɔ ndɔng nar, mi zea gɛl ma ndang ha tɔa ha mi: «Mɛ tɛ!» Gɛl wa dungɔ tuka fuo da kolo.

²Mi gɛra mɔ nɛ mi zɔka ma bu yanga ndang. Wan-dang yanga ɛngɛ nɛ kundu ha kɔ wa, nɛ ndutu wan-gan bulo ha zu wa. Wɛnɛ nê wan-gan bulo ka nɛ ha gana zu bulo fin nɛ mbinga.

³Ka Besami kuso zebwa gdangi, mi zea gɛl zebwaa ha soko hio tunɔ mɔ ndɔng nar ha tɔa ha mi: «Mɛ tɛ!»

⁴Nɛ ma mbing yanga hɔa, tɛ wa nɛ gbɛa tuka we. Wan-dang yanga ɛngɛ kpaa ma gasa gbapa ndang, nɛ fin ziomɔ mɛ kusi gaamɔ ha zu nu yunɛ, tuka nde, hio wi agbɛ may ha soko mbwa.

⁵Ka Besami kuso zetar gdangi, mi zea gɛl zetar tunɔ mɔ ka tɔa ha mi fin: «Mɛ tɛ.» Nɛ mi zɔka ma tu yanga ndang. Wan-dang yanga ɛngɛ dungɔ nɛ kilo gɛsi mɔ ha kɔ wa.

⁶Mi zea ma mɔ ha soko tunɔ mɔ ndɔng nar tuka gɛl wi. Gɛl ɛngɛ tɔa ha wan-dang yanga ɛngɛ: «Gɛnɛ bebe tasi ndang mɔ fok ble lɛma nɛ mbɔli tom mɔ yala ndang. Nɛ gɛnɛ bebe tasi tar mɔ fok mbisa lɛma nɛ mbɔli tom mɔ yala ndang. Ma, ka mɛ adangsi gɛnɛ nɔ nɛ gɛnɛ li vigne na.»

⁷Ka Besami kuso zenar gdangi, mi zea gɛl zenar tunɔ mɔ ha tɔa: «Mɛ tɛ.»

⁸Mi gɛra mɔ nɛ mi zɔka ma mbing yanga. Tɛ wa faya-fuyɛ tuka wɔl wi. Ling wan-dang yanga ɛngɛ nde, «Fio». Nɛ wi kɛ ka ɛ sa nde, «Bhandi pɛ hio fiowi» ndara pata wa. Mbwa gbaa soko hio wi mɔ zu nu fɛt nɛ zugilia nar, nɛ mbwa kpaa ziomɔ mɛ gbɛ zugili ndang ha sokoa nɛ gbapa, nɛ ginga foto, nɛ ginga zɛlɛ, nɛ hio ngɔnzu.

⁹Ka Besami kuso zemɔrkɔ gdangi, mi zɔka mɔ ha si bhandi ha sadaka ha Sɔ. Haki, mi zɔka hio sɔtɛ wi ndɔng ka ɛ bagbɛ mbwa hazu mbwa pama Wen pɛ Sɔ, nɛ hazu mbwa kɛa wena nɛ mboazu.

¹⁰Mbwa gdɔra nɛ ngagɛl: «Gasa wan, mɛ nɛ nzɔya, mɛ tɔ nɛ tɛwen sɔna. Ha nge swe ge ka mɛ begɔn kita nɛ mɛ bekundiki tɔktɛ ɔ ha zu hio wi mɔ zu nu, ge nde?»

¹¹Ɛ aa bu gbambusa ha tɛ mbwa fɛt. Nɛ ɛ tɔa ha mbwa nde, dɔka hio sɔy-tom pɛ mbwa nɛ hio ya mbwa ndɔng ka befe ha kɔ hio wi gbesi tuka mbwa, dɔka mbwa tɛ lɛm ka na. Mɛgi mbwa aɔm tɛ mbwa tikiring keri nɛ hio ya ndɔng.

¹²Mi zɔka Besami ha kuso zemɔrkɔ zanga ndang gdangi. Nɛ nu yaka nɛngaya, gbali swe tɛ bo nɛ tua tuka la zim mɔ, nɛ ze nɛ kilia fɛt tɛ bo nɛ gbɛa tuka tɔk.

¹³Hio sɔla hɔfa ha ngɔn tek ha nu tuka mbisoko wayate ka gbabok tongbisi gɔsi ha nu.

¹⁴Nɛ ngɔn yɔamɔ tuka takarata ka ɛ kalka. Hio ngari nɛ hio kisi fɛt guotɛ ha hio bhandi pɛ mbwa pen.

¹⁵Hio *kongapora mɔ nu, hio gasa wi, hio kagama bulo, hio wan-kpamɔ, hio zio wi, hio bala nɛ hio bele, mbwa fɛt wuso tɛ mbwa ha zang hio ngu nɛ ha soko hio gasa ta mɔ ngari.

¹⁶Nɛ mbwa tɔa ha hio ngari nɛ hio gasa ta ndɔng wen mɛgɛ: «Ɛnɛ tɛ tɛ mbasi ɔ, nɛ ɛnɛ gok ɔ ha gbali wi kɛ ka dungnu ha solowan, nɛ ha ngambi pɛ Besami.

¹⁷Hazu gasa swe ngambi pɛ mbwa hɔa kari. Nge wi ka bebhɔn nɛ zutunɔ, o nde?»