Read south west gbaya Gbasamɔ 8 Bible Online

Gbasamɔ 8 - south west gbaya bible

Gbasamɔ 8

¹Ka Besami kuso zemɔrkɔ zanga bwa gdangi ha nu takarata, hio mɔ zang ngɔn fɛt kara kingingi lɛm nɛ ndambu ngonga.

²Hapata, mi zɔka hio ma *telenge mɔrkɔ zanga bwa ha yola ha li Sɔ. Nɛ Sɔ haa mbwa mbia mɔrkɔ zanga bwa.

³Ma mbing telenge ndang tɛa tɛ yol hapɛtɛ bhandi ha sadaka. Kpana gbɛbolo mɔ dɔ kulo pɛlmɔ ha kɔ wa. Wɛnɛ kpaa kulo pɛlmɔ nɛdɔka hazu wesiri yo nɛ hio gɔamɔ pɛ hio wi pɛ Sɔ. Nɛ a haa hio mɔ ndɔng ha Sɔ ha li bhandi ha sadaka mɔ gbɛbolo ka dung ha li solowan.

⁴Nɛ zɛwe kulo pɛlmɔ gbesi nɛ hio gɔamɔ pɛ hio wi pɛ Sɔ danga ha kɔ telenge ɛngɛ nɛ ha li Sɔ.

⁵Hapata, telenge ɛngɛ kuo we ha bhandi ha sadaka a ha zang kpana ɛngɛ don. Nɛ ka wɛnɛ pio yo ha zu nu kari, tubho da kolo, gisi, nɛ pioli kolo tɛa, nɛ nu yaka nɛngaya.

⁶Hio telenge ndɔng mɔrkɔ zanga bwa ka mbia ha kɔ mbwa, bhɔngara tɛ hazu dɔm mbia.

⁷Nɛ ka bosi telenge dɔma mbia, kolo bhɔkala nɛ we ka sɔkara nɛ tɔk, gɔya ha zu nu. Nɛ nu hinɛ hio te fɛt gbaa soko tar, nɛ bhalkɔa ndang bea we. Hio mbɔngi bɛlɛ fɛt bea we fin.

⁸Hapata, zebwa telenge dɔma mbia. Ma mɔ tuka gasa ngari ka be we teka ha zang nana-litɔng. Nɛ nana-litɔng fɛt gbaa soko tar, nɛ bhalkɔa ndang kifo tɔk.

⁹Hio sari fɛt ha si lia gbaa soko tar, nɛ bhalkɔa ndang fea. Nɛ hio kuga fɛt ha li lia gbaa soko tar, nɛ bhalkɔa ndang yangala.

¹⁰Hapata, zetar telenge dɔma mbia. Hio nanali nɛ hio zu ndong li fɛt gbaa soko tar, nɛ ma gasa sɔla ka baa tuka kan, *bhilo ha ngɔn tek ha zu bhalkɔ hio li ndɔng ndang.

¹¹Ling sɔla ɛngɛ nde, Pangamɔ. Li fɛt gbaa soko tar, nɛ bhalkɔa ndang tɛ bo nɛ pangaa. Hio dɔka wi fea hazu panga li gbɛa mbwa.

¹²Hapata, zenar telenge dɔma mbia. Li swe, li ze, nɛ li hio sɔla gbaa soko tar, nɛ ma mɔ mɛla bhalkɔa ndang tuka nde, yo atu. Nɛ yolo swe nɛ saamɔ zɛ gbaa soko tar, nɛ bhalkɔa ndang ba fin na.

¹³Mi zɔka mɔ fin, nɛ mi zea gɛl nzio ka buy nɛyɛa ha liswe. A tɔa nɛ ngagɛl: «Ngɔtɛ, ngɔtɛ, ngɔtɛ ha hio wi mɔ zu nu, ha ngimɔ ka hio olo telenge tar bedɔm mbia.»