Read south west gbaya Gbasamɔ 9 Bible Online

Gbasamɔ 9 - south west gbaya bible

Gbasamɔ 9

¹Hapata, zemɔrkɔ telenge dɔma mbia. Mi zɔka ma sɔla ndang ka bhilo ha ngɔn tek ha nu. Ɛ haa wɛnɛ sɔtɛ nu fongo.

²Ka wɛnɛ gbosasa nu fongo ɛngɛ, zɛwe gboa ha zanga kitoo tuka zɛwe gbakuru we. Nɛ yo tusoso liswe nɛ ngɔn.

³Hio gdɔlɔ gboa ha zɛwe ɛngɛ, nɛ mbwa panzaka nɛ ha zu nu. Ɛ haa mbwa ngatɛ tuka ngatɛ pɛ hio tolɛ mɔ zu nu.

⁴Ɛ haa mbwa nu nde, mbwa agdangsi ngase bɛlɛ ha zu nu na, ngase ma bhɔyamɔ ndang na, ngase ma te ndang na. Ma, lɛma nde, mbwa ade gdangamɔ sɔna ha tɛ hio wi ndɔng ka bo nɛ dafu pɛ Sɔ ha sɔngsi mbwa na.

⁵Ɛ tɛ haa nu ha hio gdɔlɔ ndɔng nde, mbwa agbɛ hio wia gbɛ na. Ma, ɛ haa nu ha mbwa nde, mbwa ayukiti hio wia lɛm kilize mɔrkɔ nɛ yimtɛa tuka daa tolɛ ka tok nɛ tɛ wi.

⁶Ha zang yala ndɔng, hio wia beki fio, ma, mbwa lɛm kpa yo na. Mbwa bedung nɛ hɛl mɛ fe, ma, fio beyu mbwa nɛ nɛyɛa.

⁷Hio gdɔlɔ ndɔng baa may nɛ hio yanga ka ɛ bhɔngara hazu bio bulo. Mbwa yola ndutu wan mɔ gbɛbolo ha zu mbwa, nɛ zang li mbwa dung tuka zang li wi.

⁸Bumɔzu mbwa tuka bumɔzu bhoko, nɛ yini mbwa tuka pɛ dila.

⁹Ha tɛ mbwa, mbwa yola koko mɔ bibulo, ka dung tuka mɔ bolo. Nɛ gisi bhaka mbwa dung tuka gisi dɔka puspus ka hio yanga dak sɔ nɛ wi ha bio bulo.

¹⁰Kunda mbwa lɛma tok wi tuka pɛ tolɛ. Nɛ kunda mbwa nɛ ngatɛ mɛ de gdangamɔ ha tɛ hio wi lɛm kilize mɔrkɔ.

¹¹*Kongawan pɛ mbwa, yo nê telenge mɔ fongo. Ling wa nɛ nu *hebro nde, Abadon, nɛ nu greke nde, Apolion. Goto ling ndɔng tɔ nde, *wan-yangili mɔ.

¹²Bosi mɔ ngɔtɛ pena kari. Ma, hapata ɛngi, hio ma mɔ ngɔtɛ bwa betɛ fin.

¹³Hapata, zemɔrkɔ zang ndang telenge dɔma mbia. Nɛ mi zea ma gɛl ka gutɛ ha wal bhandi ha sadaka mɔ gbɛbolo, ka dung ha li Sɔ. Gɛla guotɛ ha wal hio ngbilia nar.

¹⁴Zemɔrkɔ zang ndang telenge baa mbia ha kɔ wa, nɛ gɛl ɛngɛ tɔa ha wɛnɛ: «Mɛ bul hio telenge ndɔng nar ka ɛ bahɛl ha nukolo nanali Efrate.»

¹⁵Ɛ bulo telenge ndɔng nar, ka Sɔ babhɔngiri mbwa gde keri nɛ ngonga, nɛ yala, nɛ kilize, nɛ kili bɛlɛ ɛngɛ ka mbwa agbɛ hio wi ang. Mbwa gbaa soko hio wi fɛt nɛ zugilia tar, nɛ mbwa gbɛa zugili ndang ha sokoa.

¹⁶Ɛ osa ha mi dɔka hio wan-bibulo ha zu yanga. Dɔka mbwa lɛma wi million gɔmmay bwa.

¹⁷Nɛ zizimɔ ka mi zɔka, yo mɛgɛ: Mi zɔka hio yanga nɛ hio wan-dang mbwa. Hio wan-dang yanga ndɔng yola koko mɔ bibulo. Tɛ hio ma kokoa nɛ gbɛa tuka we, tɛ hio ma baya-bum tuka liswe, nɛ tɛ hio ma gaya-gɔyɔ tuka piti. Zu hio yanga ndɔng baa may nɛ zu dila. Nɛ we, zɛwe nɛ piti ha gboa ha nu mbwa.

¹⁸We, zɛwe nɛ piti ka gbo ha nu hio yanga ndɔng, yo nê hio kemɔ tar ka gbaa soko hio wi fɛt nɛ zugilia tar, nɛ ka gbɛa zugili ndang ha sokoa.

¹⁹Ngatɛ pɛ hio yanga ndɔng ha nu mbwa nɛ ha kunda mbwa. Hio kunda mbwa baa may nɛ hio gɔk, hazu hio kunda ndɔng nɛ zu mɛ de nɛ gdangamɔ ha tɛ wi.

²⁰Hio olo wi fɛt ka tɛ fe nɛ wal hio kemɔ ndɔng na, mbwa bhɔna ka ha lukoso hio gdanga sɔ nɛ hio gbele sɔ ka mbwa dea nɛ kɔ mbwa nɛ gbɛbolo, nɛ bubolo, nɛ bolo, nɛ ta, mana nɛ te. Mbwa tɛ to gdong ha yo na, mbwa bhɔna ka ha lukoso hio sɔ ndɔng ka zɔk mɔ na, ka ze mɔ na, nɛ ka nɛ nɔ na.

²¹Mbwa bhɔna ka fin ha gbɛa wi, ha dea tom dua, ha dea wanza, nɛ ha zuo mɔ. Mbwa tɛ to gdong ha deamɔ ndɔng na.