Read suba Mathaayo 1 Bible Online

Mathaayo 1 - suba bible

Mathaayo 1

¹Gano nigo amangʼana agaajojwa ku owuiwulane owua Yesu *Kristo omuizukulu owa Daudi, omuizukulu owa Abraamu:

²Abraamu yawanga swawu Isaaka, Isaaka yawanga swawu Yakoobo ori swawu Yuuda ni waamwawu waae awekizia ikumi no omulala.

³Yuuda yawanga swawu Pereezi ni Zeera, awaana awa omukazi owaetwanga mbwe Tamaari. Pereezi yawanga swawu Ezrooni, ni Ezrooni yawanga swawu Raamu.

⁴Raamu yawanga swawu Aminadaabu, ni Aminadaabu yawanga swawu Nasooni owawanga swawu Salmooni.

⁵Salmooni yawanga swawu Boazi. Ngʼinwawu Boazi yaetwanga mbwe Raabu. Boazi yawanga swawu Obeedi omwana owa omukazi owaetwanga mbwe Ruth. Obeedi yawanga swawu Yeese,

⁶ni Yeese yawanga swawu Omwami Daudi. Daudi yawanga swawu Sulumaani, owa ngʼinwae yasooka akwewua ni Uria.

⁷Sulumaani yawanga swawu Reoboamu, swawu Abiija. Abiija yawanga swawu Aasa.

⁸Aasa yawanga swawu Yeosefaati, ni Yeosefaati yawanga swawu Yoraamu. Yoraamu yawanga swawu[1] Uzia,

⁹ni Uzia yawanga swawu Yothaamu. Yothaamu yawanga swawu Aazi, swawu Ezekia.

¹⁰Ezekia yawanga swawu Manaase, owawanga swawu Amooni. Amooni yawanga swawu Yosia,

¹¹ni Yosia yaiwula[2] Yekonia ni waamwawu waae awekizia mu amiire aga Awaisraeli waawanga mu owusiwe mu ekialo ekia *Babulooni.

¹²Okuemera Awaisraeli wagie mu owusiwe mu ekialo ekia Babulooni: Yekonia yawa swawu Seltieli, ni Seltieli yawanga swawu Zerubabeeli.

¹³Zerubabeeli yawanga swawu Abiudi, ni Abiudi yawanga swawu Eliakiimu, swawu Azoori.

¹⁴Azoori yawanga swawu Zadooki, Zadooki yawanga swawu Akiimu, ni Akiimu yawanga swawu Eliudi.

¹⁵Eliudi yawanga swawu Eliazaari, owawanga swawu Mathaani. Mathaani yawanga swawu Yakoobo,

¹⁶ni Yakoobo yawanga swawu Yoseefu, iwa Maaria ngʼinwawu Yesu oetwa mbwe Kristo.

¹⁷Kutio tuwona mbwe kwatoola amakula agalondokana ikumi ni ine okuemera ku Abraamu kutuuka ku Daudi, amakula ikumi okuemera ku Daudi nawuno Awaisraeli waagia mu owusiwe mu ekialo ekia Babulooni, kandi amakula ikumi okuemera ao kutuuka ku okuiwulwa okwa Kristo.

¹⁸Okuiwulwa okwa Yesu Kristo kwawa kutino: Kwatuukra ngʼinwae Maaria ni yawanga na amiire okukola empurizanio ni Yoseefu mbwe waaza okukwezana. Ni, ni waawanga ni wakiari okuwa owulala ki omukazi no omusaaza, Maaria yatuukrwa na ari ni isaai ku amaani aga *Omwoyo Omweru ogwa Katonda!

¹⁹Yoseefu, owaagianga okuwa omusaaza owa Maaria, yawanga omuntu omuigolovu. Lwona ngakaagalanga okufumia Maaria enze asuuke emberi wa awantu.[3] Kutio yawisia okumuiiyako enkumu arekane nae owuiwisi.

²⁰Ni ni yawanga na akiaingirizia okukola otio, *enyankoi owa Katonda yamuuzra mu amalooto na agona, amulaga otino, “Yoseefu omuzia owa Daudi, otatia okutoola Maaria awe omukazi waao, aeniki isaai eria ari nario rimuemiire ku Omwoyo Omweru ogwa Katonda.

²¹Maaria aaza okuiwula omwana owekizia, kandi paka omuluke eriina Yesu,[4] aeniki aaza okununula awaawu mu amawi gaawu.”

²²Wino wiona wiaikola okutuusia amangʼana aga *Omwami Katonda yawoola ni kuwita ku *omugambi waae otino:

²³“Omwala omugima aaza okuamba isaai aiwule omwana owekizia. Waaza okumueta eriina Emanueli” — erilagana mbwe, “Katonda ari ni ifwe.”

²⁴Olwa Yoseefu yalamuka mu endoolo, yakola kiomo enyankoi yamulaga mala atoola Maaria aira engo, awa omukazi waae.

²⁵Ni kukawa kutio, ngakawa nae owulala ki omukazi no omusaaza nawuno Maaria yaigawula areeta omwana owekizia. Kandi Yoseefu yamuluka eriina Yesu.