Read suba Luuka 1 Bible Online

Luuka 1 - suba bible

Luuka 1

¹Omukangasi otiirwe Tiofiila, awantu awangi awamiire okukalawana okujoja ku ewintu ewimiire okuikola agati iifu ano.

²Wamiire okujoja amangʼana amalala aga ifwe twona twalagwa na awantu awasooka okugawona na amiiso ni gaikola kandi awaakorra Katonda mu okugalanzizia awantu.

³Kutio, mbona mbwe kulootu noona nkujojere amangʼana gano mu engira ewurikana aeniki omwene miire okugalondorezia geeza okuemera mu owutanikro,

⁴kugere omanye owuene wuona owuri ku amangʼana goona aga omiire okugererwa.

⁵Mu amiire aga *Eroode yawanga omwami owa Yudeea, yawangao *omuozia owaetwanga mbwe Zakaria, owawanga mu owuasio owua owulala owua awoozia owuaetwanga Abiija.[1] Mukaae yaetwanga mbwe Elizabeethi, omwala owa awa Aruuni.

⁶Woona wawiri waawanga awigolovu emberi wa Katonda, kandi waarinda *ensikirra ne endagirra ziona ezia Katonda aa wataterera.

⁷Ni waawulanga omwana aeniki Elizabeethi yawanga omugumba, kandi woona wawiri waawanga awantu awakulu.

⁸Owuire wulala ni Zakaria yawanga na akola emirimo egia owuozia emberi wa Katonda mu owuasio owua owulala wuawu,

⁹yalowolwa ne ensiiti na awoozia awiina waae, nikulondokana ne enkola ezia emirimo egia owuozia, okuingira mu ekaalu eya Omwami okusamba *owubaani.

¹⁰Ne enyinga ezia okusamba owubaani wuatuuka, awantu woona awaaikumia okusawa, waasawiranga enze.

¹¹*Enyankoi owa Katonda yafumira Zakaria aimerra nyakukono okusaaza okwa emeesa eya okusamba owubaani.

¹²Olwa Zakaria yamuwona, yazinduka amasaai kandi owuti wuamuamba.

¹³Ne enyankoi yamulaga otino, “Zakaria, otatia. Katonda amiire okuwurra okusawa kwao, kandi mukaao Elizabeethi aaza okuiwula omwana owekizia, omuluke eriina Yowaana.

¹⁴“Aaza okugera owone geeza kandi owe omusangaavu, kandi awantu awangi wariwa ne ekisangaalo ku okuiwulwa kwae,

¹⁵aeniki ariwa omuntu omukaate emberi wa Katonda. Na ataaza yanywa amalwa nakuwa ewintu ewilulu ewitowookwe; kandi aaza okuizuziwua no *Omwoyo Omweru, namba na akiari mu enda eya ngʼinwae.

¹⁶“Arigera Awaisraeli awangi wairane ku *Omwami Katonda waawu.

¹⁷Arikangata emberi wa Omwami na ari na amaani aga Omwoyo Omweru kiomo Eliija. Arigalusia emioyo egia waaswawu awaana okugonzia awaana waawu; kandi origera awa emitwe emikalu okuwurra amangʼana aga owuganga aga awalongoole, kugere waikagre okuingizia Omwami.”

¹⁸Ni Zakaria yawuuzia enyankoi otino, “Ekiesa okundaga mbwe ewintu wino wiriikola niki? Aeniki inze ndi omuntu mukulu, kandi mukange oona ari ne emiaka emiera.”

¹⁹Nikuemao, enyankoi yamuirania otino, “Inze ni *Gabrieli, *omutumwa okola emberi owa Katonda; kandi ntumrwe okugamba-gamba ni iwue ni nkureetra amangʼana amageni amalootu gano.

²⁰Kutio, manya mbwe ooza okuwa omurimba otagamba-gamba nawuno kutuuke owuire owua ewintu wino wiiza okuikola, aeniki ngokaganya na amangʼana gange gano agaaza okuikola owuire wuago.”

²¹Ku enyinga ezio, awantu awaasawanga enze awo waarindanga Zakaria ni waaluguula ekiagera na akinda ino mu ekaalu munsi otio.

²²Olwa Zakaria yafuma enze, ngakaesanga okugamba-gamba. Kuno kwagera wamanya mbwe awuine owusasuko mu ekaalu; aeniki yawalagirizianga ewintu mala na amakono ni ngakanawula ekingʼana.

²³Ne enyinga ezia owuasio owua okukola mu ekaalu ziawua, Zakaria yairana engo waae.

²⁴Lunyima, mukaae Elizabeethi ya-amba isaai kandi yaiwisa mu enyumba ku emienzi itaanu na atafuma enze. Yawoola otino,

²⁵“Katonda nio onkoriire geeza otino. Mwakuuno ambariire no owusiza wuae kandi antoorreko ensuuko ezia owugumba emberi wa awantu.”

²⁶Ne Elizabeethi yawanga ni isaai eria emienzi mukaaga, Katonda yatuma enyankoi Gabrieli ku omugizi ogwa Nazareeti, mu ekitemo ekia Galiili.

²⁷Yagia ku omwala omugima oetwa Maaria, owawanga no owuiko owua okukwezana ni Yoseefu, owaemanga mu ekiriango ekia Omwami Daudi.

²⁸Enyankoi oyo yamugiako amulaga otino, “Oikaziwue, iwue omwala omusereke. Omwami ari ni iwue kandi aomereerwe ni iwue!”

²⁹Maaria yainyaasia mu omwoyo gwae ino ku amangʼana ago kandi yaiwuuzia mu amaingirizio gaae ekia amakeezio ago gaalagananga.

³⁰Enyankoi oyo yamulaga otino, “Maaria, otatia, aeniki Katonda ari omusiza ni iwue.

³¹Kutio, wona! Ooza okuamba isaai kandi oiwule omwana owekizia kandi orimuluka mbwe Yesu.

³²Ariwa omuntu omukaate, kandi arietwa mbwe Omuzia owa Katonda omunene; kandi Omwami Katonda arimuta ku entewe eya owuami owua guukwa waae Daudi.

³³Ariwa omwami owa awiizukulu awa Yakoobo ku emiigo emiera egiiza kandi owuami wuae ngawuriwua yawa!”

³⁴Maaria yawuuzia enyankoi otino, “Kino kiesa okuikola kitie, ni inze nkiari omwala omugima okiari okuwa alala no omusaaza?”

³⁵Enyankoi yamuirania otino, “Omwoyo Omweru aaza okukuuzako kandi amaani aga Katonda ori kungulu okukira gaaza okukusanikira. Kutio omwana owa ooza okuiwulwa oyo arietwa mbwe Omweru, Omuzia owa Katonda.

³⁶Namba Elizabeethi, omuganda waao, oona aaza okuwa no omwana kukawa mbwe ari omukiire. Kandi iye owaetwanga omugumba nyingeeno ari ne enda eya emienzi mukaaga.

³⁷Aeniki kiwulao ekiesa okukira Katonda okukola.”

³⁸Maaria yairania otino, “Inze ndi *omukurumu owa Omwami Katonda, kandi nganyire ekintu-ukintu ekia aagala mbwe kinyiikoleko.” Nikuemao enyankoi yagia amureka.

³⁹Nikuemao, Maaria yasiwa emisigo wuangu afuma okugia ku omugizi oguri mu ekialo ekia ewigiri ewia Yudeea,

⁴⁰aingira ku omugizi ogwa Zakaria agia akeezia Elizabeethi.

⁴¹Olwa Elizabeethi yawurra amakeezio aga Maaria otino, omwana yawaaya mu enda yaae kandi Elizabeethi yaizuziwua no Omwoyo Omweru.

⁴²Yagamba-gamba no omwoyo ogwa kungulu na awoola otino, “Iwue osereekwe agati eya awakazi wandi, kandi omwana owa ooza okuiwula oona asereekwe!

⁴³Ni inze nsereekwe aeniki ngʼinwawu Omwami wange aazre okumbona.

⁴⁴Aeniki olwa mpuriire-uwurra amakeezio gaao otino, omwana ori munda yange aduma-duumre ne ekisangaalo.

⁴⁵Osereekwe iwue ku okuganya mbwe ewintu ewia Katonda akulagre wiiza okuikola!”

⁴⁶Nikuemao Maaria yawoola otino, “Omwoyo gwange gutondowola Omwami Katonda.

⁴⁷Mu owulamu wuange ndi ne ekisangaalo ku Katonda omununuzi wange,

⁴⁸aeniki amiire okunyingirizia inze omukurumu waae ori ansi! Okutanikra reero, amakula goona gaaza okunyeta omusereke,

⁴⁹aeniki Katonda owa amaani goona amiire okunkorra ewintu ewikaate. Eriina riaae rieru!

⁵⁰Alagana owusiza ku awantu awamuere owuti, okuemera ku ikula rino okugia ku ikula rindi.

⁵¹Amiire okukola ewinene na agoloole okukono kwae okwa amaani na ataanyia awaitumbula mu amaingirizio gaawu.

⁵²Yategula awaami awa amambala nawuno awatoola ku entewe ziawu, na aginga kungulu awantu awaiisiizie ansi.

⁵³Yaigusia awari ne enzala ne ewintu ewilootu, na awanyazi arumusia wagia amakono masa.

⁵⁴Amiire okutunzia omukurumu waae Israeli, na alonda owusiza wuae,

⁵⁵kiomo yawoorra waaguukwa wiifu, Abraamu alala na awiizukulu waae, mbwe arikola amiire goona.”

⁵⁶Kutio, Maaria yamenya ne Elizabeethi ku emienzi egikaera isatu nikwo airana owaawu.

⁵⁷Olwa enyinga ezia Elizabeethi ezia okuigawula ziatuuka, yaiwula omwana owekizia.

⁵⁸Awamenyere nae ampi na awaganda waae waawurra kiomo Omwami amiire okumukorra owusiza owukaate, kandi woona waasangaala nae alala.

⁵⁹Olwa owuire owua munaane wuatuuka waaza okuira omwana *enyangu, kandi waagalanga mbwe wamuluke swae Zakaria.

⁶⁰Ni ngʼinwae yawairania otino, “Yaaya! Asugaane aetwe Yowaana!”

⁶¹Ni iwo waamuirania watino, “Awulao omuntu mu oluganda lwinyu ori ne endukwa eyo.”

⁶²Nikuemao waawuuzia swae na amakono ni wamuagalako eriina eria akaagala omwana oyo alukwe.

⁶³Yawasawa iwaale eria akujojako, kandi yajoja mbwe “Eriina riae ni Yowaana.” Kandi okwo kwagera awantu waluguula ino.

⁶⁴Ao-ao, omunwa gwae gwaiguka kandi olurimi lwae lusiwuka, nawuno atanika okugamba-gamba na atondowola Katonda.

⁶⁵Kandi, owuti wua-amba awantu woona awaawanga ni wamenyere nawo ampi. Awantu woona awa ekialo kiona ekia ewigiri ewia Yudeea waagamba-gambanga ku amangʼana gano.

⁶⁶Omuntu-umuntu owawurra amangʼana gano yagaluguula na aiwuuzia otino, “Omwana ono aaza okuwa omuntu ofwana otie?” Aeniki, kuri kuwuene mbwe amaani aga Omwami Katonda gari nae.

⁶⁷Swae Zakaria, na aizuziwua no Omwoyo Omweru, yawoola amangʼana agaamuemera ku Katonda otino:

⁶⁸“Atondowolwe Omwami, Katonda owa Awaisraeli, aeniki amiire okuuza okutoola awantu waae mu amakono aga omuzigu.

⁶⁹Amiire okutureetra omununuzi ori na amaani okuema mu enyumba eya omukurumu waae Daudi.

⁷⁰Kiomo yawoola okuwitra ku *awagambi waae aweeru okuemera kale mbwe:

⁷¹Aritununula okuema ku awazigu wiifu kandi okuema ku amakono aga awaturegere woona.

⁷²Arilagana owusiza ku waaguukwa wiifu kandi ari-ingirizia *endagano yaae enzeru eya yakola nawo.

⁷³Aaza okutuusia endagano eya yaifuuwira soifu Abraamu.

⁷⁴Aaza okutu-aa amaani aga okumukorra ni tuwula owuti, na amiire okututoola mu amakono aga awazigu wiifu.

⁷⁵Kandi tuuza okuwa aweeru kandi awigolovu emberi waae, amiire goona aga owulamu wuifu.

⁷⁶Ni iwue, omwana wange, ooza okuetwa omugambi owa Katonda omunene; aeniki orikangata emberi owa Omwami okuta emioyo egia awantu okuwa amankaga okumuingizia.

⁷⁷Ooza oku-aa awantu waae amaganga aga okumanya owuinunuzi owutuukrwa ni warekeerwe owuoni wuawu.

⁷⁸Okuwitra ku owusiza owua olugonzi olwa Katonda iifu, aaza okureeta owueru owua enyanga owua owuinunuzi wumurike, ni wuema ku igulu,

⁷⁹ku awamenyere mu ekierema kandi awari mu ekiiruuzia ekia olumbe; kandi okulagirizia amagulu giifu ku engira eya owuolu.”

⁸⁰Omwana oyo yakoma kandi awa omukalangufu mu omuwiri ni mu omwoyo; kandi yamenya mu ekeewa nawuno kutuuka afuma awonekana owuyanga ku Awaisraeli.