Read suba Awaibrania 1 Bible Online

Awaibrania 1 - suba bible

Awaibrania 1

¹Mu amiire amakulu agaawita, Katonda yagamba-gamba ni waaguukwa wiifu kangi kandi mu engira enyingi ni kuwitra ku *awagambi waae.

²Ni mu amiire aga entuuko gano, Katonda amiire okugamba-gamba ni ifwe ni kuwitra ku Omuzia waae, owa yalowola okuteera ewintu wiona mu amakono kandi owa ni kuwitako, yaluka igulu ne ekialo alala ni wiona ewirimo.

³Omuzia owa Katonda ono, nio owunene owua Katonda wumurika ni wuemako kandi nie ekilago ekia Katonda ndiki-ndiki. Kandi ni iye oambiriire alala ewintu wiona ewiri ku igulu ni ku ekialo, na amangʼana gaae agari na amaani. No Omuzia yamala okuesana engira eya awantu wakaoziziwua amawi, yaikala nyakukono okusaaza okwa Katonda Omukaate ku igulu.

⁴Kutio yawa omukaate okukira *enyankoi woona mala kiomo eriina eria yaeewua riona riri ikaate okukira amiina aga enyankoi woona.

⁵Kusi ne enyankoi ki eya Katonda yalagako mbwe, “Ori Omuzia wange, reero mbeere Swao”? Namba mbwe, “Nyiza okuwa Swae, kandi oona aaza okuwa Omuzia wange”?

⁶Kandi ni Katonda areeta Omuzia waae owa oluweri ku ekialo, yawoola otino, “Reka enyankoi awa Katonda woona wamuikirre wamusawe.”

⁷Omwene na agamba-gamba ku enyankoi waae, awoola otino, “Agera enyankoi waae wawa ki omuyaga kandi *awatumwa waae wawa ki endimi ezia omurro.”

⁸Ni na agamba-gamba ku Omuzia waae awoola otino, “Entewe eya owuami wuao, iwue Katonda, eeza okuweerao amiire goona, kandi ooza okangatra awantu awa mu owuami wuao no owuigolovu.

⁹Iwue omiire okugonzia owuigolovu, na amawi oregere, kutio, inze Katonda waao miire okukuta angulu okukira awiina waao ku *okukuwaka amavuta aga ekisangaalo.”

¹⁰Lwona alaga Omuzia waae otino, “Oo Omwami, mu owutanikro, ni iwue owaomboka owulusa owua ekialo, kandi igulu riri emirimo egia amakono gaao.

¹¹Igulu ne ekialo wiiza okuteeka, kandi wiiza okukiriiya ki enguwo, ni iwue orio amiire goona.

¹²Ooza okuwizinga alala ki ekanzu, kandi wiiza okugaluka ki enguwo. Ni iwue orio-wuri otio, ngorigaluka, kandi emiigo giao giwula ne entuuko.”

¹³Ne enyankoi ki owa Katonda yalagako mbwe, “Ikala nyakukono kwange okusaaza nawuno ntoole awazigu waao nte ansi ku amagulu gaao otaze?”

¹⁴Kane enyankoi niki? Ngawari mala emioyo egitumrwe okukorra awantu awaaza okutuukra owuinunuzi?