Read suba Awaibrania 3 Bible Online

Awaibrania 3 - suba bible

Awaibrania 3

¹Kutio waamwifu ku *Kristo awaetiirwe owulamu owua ku igulu, mute amaingirizio giinyu goona ku Yesu, owa ifwe tulaga awantu mbwe ari *omutumwa kandi *Omuozia iifu omunene.

²Yarinda amangʼana aga Katonda owamulowola amukorre, mala kiomo Muusa oona yakola mu enyumba eya Katonda.

³Kiomo omuntu o-ombooke enyumba aeewua owuti okukira enyumba eya aombooke, nintio lwona Yesu asugre okueewua owuti okukira Muusa.

⁴Aeniki enyumba ki enyumba eombookwe no omuntu, ni Katonda nio omuomboki owa ewintu wiona.

⁵Muusa yarinda amangʼana aga Katonda ki *omukurumu mu enyumba eya Katonda yoona, kandi okwo kwalaga awantu ekia Katonda yaazanga okuwoola mu amiire aga emberi.

⁶Ni Kristo iye arindre amangʼana aga Katonda ki Omuzia okangatiire enyumba eya Katonda. Kandi ifwe ni ifwe enyumba yaae, ni tuandre ku owusiani wuifu no okurindirra okwa tuitumburra nawuno mu owutuuko.

⁷Kuri mala kiomo Katonda awoola mu endagano ni kuwita ku *Omwoyo Omweru mbwe, “Reero, ni muwuriire omwoyo ogwange,

⁸mutagera emioyo giinyu giwe emikalu kiomo Awaisraeli waakola mu amiire aga okugeezaniwua ni waawanga mu ekeewa,

⁹aa waaguukwa wiinyu wangeezaania kandi ku emiaka amakumi ane waawona ewintu ewia nyakola.

¹⁰Ekio nikio ekiagera no okusu kwampamba ni ikula erio kandi nyawoola mbwe, ‘Emioyo egia awantu wano gireka engira enyinga ziona kandi wakiari okumanya engira ziange.’

¹¹Kutio nyaifuuwa ni ndi no okusu otino, ‘Ngawari-ingira mu okuwuluuka kwange, yaaya!’ ”

¹²Inywe waamwifu, muwone mbwe awulao-uwula omulala ku inywe ori no omwoyo ogurimo owuoni, ogutari no okuganya kandi ogugaluka ni gureka Katonda.

¹³No omuntu ki omuntu a-ambie omwina waae amaani owuire ki owuire, iwaga erietwa mbwe “Reero” ni rikiario, kugere awuleo omuntu owa ensemerezanio eya owuoni eere omwoyo omukalu ngʼa.

¹⁴Aeniki ni turindre endagano paka mu owutuuko kandi ni tuteere emioyo giifu ku Katonda wukalu kiomo twakola olwa twawa no okuganya kuluweri, ni tuuza okutuukra omugawo gwifu ku ewintu ewia Kristo wiona.

¹⁵Kuri mala kiomo endagano ewoola mbwe, “Reero, ni muwuriire omwoyo gwae, mutagera emioyo giinyu giwe emikalu kiomo giawanga mu amiire aga awantu waalowa Katonda.”

¹⁶Awaalowa Katonda ni waawu anu? Ngawawanga awantu awa Muusa yakangatra na awafumia Misiri?

¹⁷Awa-ambia Katonda okusu ku emiaka amakumi ane ni waawu anu? Ngawawanga awantu awaakola owuoni, awaafwa mala emiwiri giawu gisigala mu ekeewa?

¹⁸Na awa Katonda yaifuuwa mbwe ngawari-ingira mu okuwuluuka kwae ni waawu anu? Ngawawanga awantu awaatambuka amangʼana gaae?

¹⁹Kutio tuwona mbwe awantu awo ngawakaesanga okuingira mu okuwuluuka okwae ku okutaganya kwawu.