Read suba Awaibrania 8 Bible Online

Awaibrania 8 - suba bible

Awaibrania 8

¹Ekineene ekikirre ku ewia tuwoola, ni mbwe nyingeeno katio, turi no Omukangasi omunene owa *awoozia owaikala ansi nyakukono okusaaza okwa entewe eya owuami eya Katonda Omukaate ku igulu.

²Ao nio akorra emirimo egia owuozia mu eema eya okusawa eri kuwuene, etaombookwe no okukono okwa omuntu yaaya, ni no *Omwami Katonda omwene.

³Omukangasi omunene ki Omukangasi omunene owa awoozia aloworrwa emirimo egia okufumia empanwa alala ne emisango, kutio kwanigirizia mbwe ono oona awe ne ekintu ekia akafumia.

⁴Kuweeko mbwe ari ku ekialo kuno, ngakaweere omuozia aeniki awantu awafumia empanwa ezigamba-gambwako mu endagano, wario.

⁵Iwo wakola emirimo mu eema eri omufwano kandi ekiiruuzia ekia eema eri kuwuene eri ku igulu. Ekio nikio ekigera ni Muusa yasiagiziwua ni yaagalanga okuomboka eema eyo mbwe, “Paka owone mbwe o-ombooke ewintu wiona ewiwa mu eeme eyo, mu engira eya walagwa mu ekigiri!”

⁶Ne emirimo egia Yesu aazre okukola giri na amaani okukira egiawu, mala kiomo empurizanio eya aazre okureeta agati ya Katonda na awantu eri na amaani okukira enkulu, kandi eisimbiire ku okuifuuwa okulootu okukira.

⁷Kuweeko mbwe *endagano eyasooka yasuga mu engira ziona aa nekakeeya mu engira-ungira, lwona kirio ekikagerre ne eindi empia ewaao kandi?

⁸Ni Katonda yatuukra awantu awayakola nawo endagano eyo ni wakeeyire: ekintu ekiagera na awoola otino,[6] “Mbalaga mbwe enyinga ziiza, ezia nyiza okukola endagano empia na awantu Awaisraeli kandi ne ekiriango ekia Yuuda.

⁹Endagano eene neeza okufwanana ne eya nyakola ni waaswawu olwa nyawa-amba okukono okuwakangatra ni mbafumia mu ekialo ekia Misiri. Ngawakarinda endagano eya nyakola nawo, kutio nyawalaga omugongo.

¹⁰Ndaga ekiriango ekia Israeli mbwe endagano eya nyiza okukola nawo ngino: Nyiza okuta *ensikirra ziange mu amaingirizio gaawu kandi nyiza okuzijoja mu emioyo giawu. Nyiza okuwa Katonda waawu kandi waaza okuwa awantu wange.

¹¹Awulao omulala ku iwo ooza okugerera omwina waae, namba awulao omuntu ooza okugerera wamwawu waae, na amulaga mbwe ‘manya Katonda’ aeniki waaza onkuumanya woona, okuemera ku ori ansi kutuuka ku omunene otuukre.

¹²Aeniki nyiza okuwarekera amawi gaawu, lwona nganyiza okuingirizia owuoni wuawu kandi.”

¹³Omwami na aeta endagano eno mbwe eri ‘empia,’ agera endagano eyasooka ne ewa ewula ne emirimo, kandi ekintu ekikulu-kulu ekia amiire gago gaawita, kiiza okuwua nawuno kiteeke no okuteeka.