Read Boros Dusun KAJADIAN 11 Bible Online

KAJADIAN 11 - Boros Dusun bible

KAJADIAN 11

¹Asalna mah basa teh ngan hiji. Jelema-jelema sadunya, ngaromongna sabasa, kecap-kecapna sarua.

²Sanggeus ngaprak ka tebeh wetan, maranehna narepi ka hiji wewengkon di Babilonia, seug maratuh di dinya.

³Geus kitu maranehanana silih ajak pada batur, pokna, ”Anggur urang nyieunan bata, urang beuleum sing alus.” Terusna bata geus loba keur nyieun adegan, ter keur pamageuhna nya kitu keneh.

⁴Terus ceuk maranehna, ”Ayeuna urang nyieun nagara. Urang make munara anu puncakna nepi ka langit, sangkan urang kamashur jeung supaya ulah papencar ka mana-mendi.”

⁵Lajeng PANGERAN lungsur seja ningalian eta nagara jeung munara anu keur diadegkeun.

⁶Mantenna ngandika, ”Ayeuna eta jelema-jelema teh sabangsa jeung ngaromongna kabeh sabasa. Ayeuna maranehna kakara mimiti barang jieunna. Moal lila deui mah maranehna tangtu bisa ngalaksanakeun sagala pamaksudanana.

⁷Hayu Urang turun, Urang kusutkeun basana, sina ulah ngarti batur pada batur.”

⁸Eta jelema-jelema ku PANGERAN dipaburencaykeun ka sakuliah dunya, pagaweanana nyieun nagara tea jadi bangkar.

⁹Eta nagara dingaranan Babul, lantaran di dinya PANGERAN ngusutkeun basa manusa, sarta ti semet harita, manusa teh ku Mantenna dipaburencaykeun ka sakuliah dunya.

¹⁰Ieu turunan Sem. Dua taun ti sanggeus caah gede, waktu Sem yuswa 100 taun, kagungan putra hiji, Arpaksad.

¹¹Ti semet eta, Sem jumeneng keneh 500 taun deui, sarta puputra deui sababaraha urang.

¹²Arpaksad, dina yuswa 35 taun, puputra hiji, Selah.

¹³Ti semet eta anjeunna jumeneng keneh 403 taun deui, sarta puputra deui sababaraha urang.

¹⁴Selah, dina yuswa 30 taun, puputra hiji, Eber.

¹⁵Ti semet harita anjeunna jumeneng keneh 403 taun deui, sarta puputra deui sababaraha urang.

¹⁶Eber, dina yuswa 34 taun, puputra hiji, Peleg.

¹⁷Ti semet harita anjeunna jumeneng keneh 430 taun deui, sarta puputra deui sababaraha urang.

¹⁸Peleg, dina yuswa 30 taun, puputra hiji, Rehu.

¹⁹Ti semet harita anjeunna jumeneng keneh 209 taun deui, sarta puputra deui sababaraha urang.

²⁰Rehu, dina yuswa 32 taun, puputra hiji, Serug.

²¹Ti semet harita anjeunna jumeneng keneh 207 taun deui sarta puputra deui sababaraha urang.

²²Serug, dina yuswa 30 taun, puputra hiji, Nahor.

²³Ti semet harita anjeunna jumeneng keneh 200 taun deui, sarta puputra deui sababaraha urang.

²⁴Nahor, dina yuswa 29 taun, puputra hiji, Terah.

²⁵Ti semet harita anjeunna jumeneng keneh 119 taun deui, sarta puputra deui sababaraha urang.

²⁶Terah, dina yuswa 70 taun, jadi ramana Abram, Nahor jeung Haran.

²⁷Ieu turunan Terah, ramana Abram, Nahor jeung Haran. Haran puputra Elut.

²⁸Haran pupus di tanah asalna, kota Ur di Babilonia, waktu ramana jumeneng keneh.

²⁹Abram nikah ka Sarai. Nahor nikah ka Milka putra Haran. Aya keneh putra Haran anu lalaki, nya eta Yiska.

³⁰Sarai henteu kagungan bae putra.

³¹Geus kitu Terah ngantunkeun kota Ur di Babilonia, seja ka tanah Kanaan. Abram, putrana, Elut putuna anu ti Haran, Sarai mantuna geureuha Abram, dicandak. Ari sarumping ka tanah Haran, tuluy tumetep di dinya.

³²Terah pupus di dinya, dina yuswa 205 taun.