Read Boros Dusun KAJADIAN 15 Bible Online

KAJADIAN 15 - Boros Dusun bible

KAJADIAN 15

¹Geus kitu PANGERAN ngandika ka Abram dina titingalan. Dawuhana-Na, ”Tong sieun, Abram! Ieu Kami anu jadi kepeng maneh. Ganjaran pikeun maneh taya wiwilanganana.”

²Abram ngawangsul, ”Nun PANGERAN Nu Maha Agung, kangge naon ganjaran, da abdi teh teu gaduh anak. Ahli waris teh mung pun Elieser, urang Damsik tea.

³Ku margi Gusti henteu maparin anak, rajakaya abdi baris ragragna teh tangtos ka salah sawios gandek abdi.”

⁴Gentra PANGERAN kadangu deui, dawuhana-Na, ”Lain eta nu baris jadi ahli waris teh, tapi anak maneh pituin.”

⁵Ti dinya Abram ku PANGERAN dicandak ka luar. PANGERAN ngadawuh deui, ”Cik tanggah ka langit, itung itu bentang ari bisa mah. Tah turunan maneh teh bakal sakitu lobana.”

⁶Abram percanteneun kana dawuhana-Na. Sikep Abram kitu ku PANGERAN kamanah sarta katampi.

⁷PANGERAN ngadawuh deui, ”Ieu Kami PANGERAN, anu nginditkeun maneh ti Ur di Babilonia, sangkan maneh narima ieu tanah Kami.”

⁸Abram ngawangsul, ”Nun PANGERAN Nu Maha Agung, kumaha abdi nya piterangeun, yen abdi baris ngamilik ieu tanah?”

⁹Dawuhan PANGERAN, ”Kami pangnyokotkeun sapi bikang, embe bikang, jeung embe jalu anu umur tilu taunan hiji-hiji, tikukur hiji, japati hiji.”

¹⁰Seug sato-sato anu ditataan teh ku Abram dicandak haturkeuneun ka Allah, terus dipeuncit dibeulah-beulah dua. Eta beulahan-beulahan dientep, diatur sina pahareup-hareup jeung pada beubeulahanana masing-masing. Tapi manukna mah teu dibeulah.

¹¹Ti dinya aya manuk-manuk nu sok ngahakan bangke tarurun, tapi ku Abram digebahan.

¹²Ari dina wanci surup panonpoe Abram kapulesan tibra naker, di dituna katarajang sieun anu pohara.

¹³Lajeng PANGERAN ngadawuh ka anjeunna, ”Kanyahokeun! Turunan maneh baris jaradi jalma asing di nagara deungeun, di dituna bakal jaradi jalma anu diereh ku deungeun jeung dikaniaya, 400 taun lilana.

¹⁴Tapi bangsa anu nganiayana ku Kami baris dihukum. Sanggeus kitu turunan maneh baris kaluar ti eta nagara bari marawa rajabrana kacida lobana.

¹⁵Tapi maneh pribadi mah baris cukup nya umur, maot oge engke ari geus kolot kabina-bina, tur mulang kalawan senang.

¹⁶Turunan maneh anu baris marulang deui ka ieu tanah teh nya eta turunan anu kaopat. Nya harita bangsa Emor teh ku Kami baris dikaluarkeun, diusir, nya eta lamun kajahatan eta bangsa enggeus nepi ka jucungna.”

¹⁷Geus kitu, sanggeus panonpoe surup pisan sarta geus poek, ujug-ujug breh aya parapen, haseupna ngebul, jeung aya obor hurung nyorang ka lebah sato-sato beunang ngabeulahan tea.

¹⁸Dina poe eta PANGERAN ngadamel hiji perjangjian jeung Abram, dawuhana-Na, ”Kami jangji, rek mikeun ieu tanah pikeun turunan maneh, legana ti semet wates tanah Mesir nepi ka Walungan Eprat,

¹⁹ngurung tanah-tanah urang Keni, urang Kenas, urang Kadmoni,

²⁰urang Het, urang Pares, urang Repaim,

²¹urang Emor, urang Kanaan, urang Girgas jeung urang Yebus.”