Read Boros Dusun KAJADIAN 23 Bible Online

KAJADIAN 23 - Boros Dusun bible

KAJADIAN 23

¹Sanggeus Sarah yuswana 127 taun,

²Sarah pupus di Hebron di tanah Kanaan. Ibrahim anu dikantun, midangdam taya hinggana, lajeng sasayagian keur ngurebkeun.

³Layon ku anjeunna dikantun nepangan heula urang Het anu maratuh di dinya. Saurna,

⁴”Dulur-dulur, sim kuring teh kawantu anu ngumbara, padumukan oge teu acan jinek. Ayeuna butuh lahan keur nguburkeun pun bojo. Kumaha upami meser ti dulur-dulur?”

⁵Jawab maranehna,

⁶”Kieu eta mah, Juragan! Juragan teh kapala anu kawasa di dieu. Atuh sumangga tuang geureuha teh kurebkeun di salah sawios makam milik anu utami di dieu. Saurang ge moal aya nu kaabotan makam milikna dianggo keur ngurebkeun tuang geureuha.”

⁷Ibrahim dongko hormat ka maranehanana

⁸sarta ngalahir, ”Upami leres rarido sim kuring nguburkeun pun bojo di dieu, pangmundutkeun ka Epron, putra Sohar,

⁹supados Guha Makpela kagunganana anu di sisi humana tea diical ka sim kuring. Bade dipeser sapangaosna kalayan disaksian ku aranjeun, supados eta pamakaman teh sah kagaduhanana ku sim kuring.”

¹⁰Ari Epron harita keur ngariung jeung urang Het di gapura kota. Pok Epron nyarita ka Ibrahim, kadenge ku sakur anu araya di dinya,

¹¹”Kaom sim kuring jaradi saksi yen eta huma katut guhana, ku sim kuring disanggakeun sangkan Juragan tiasa ngurebkeun tuang bojo.”

¹²Ibrahim dongko ka hareupeun urang dinya,

¹³pok ngawaler ka Epron, kadarenge ku sarerea, saurna, ”Hatur nuhun kana kasaean Saderek. Nanging ku sim kuring tetep bade dipeser, sadayana. Pun bojo bade dikuburkeun di dinya. Mangga ieu pameseranana ditampi.”

¹⁴Walon Epron,

¹⁵”Kitu oge sae. Nanging da tanah mung sacangkewok, sayaktosna kanggo urang naon hartosna. Mangga tuang geureuha teh kurebkeun di dinya. Dupi pangaosna mah 400 uang perak.”

¹⁶Ibrahim rujuk. Bari disaksian ku bani Het anu araya di dinya, perak keur mayarna terus ditimbang ku timbangan anu sah diparake ku para sudagar, jumlahna 400 uang perak sakumaha pamenta Epron.

¹⁷Ti dinya, eta lahan Epron anu di Makpela wetaneun Mamre teh geus sah jadi milik Ibrahim katut guhana, malah katut tatangkalanana, nepi ka tungtung-tungtung wawatesanana.

¹⁸Ku bani Het geus diaraku kalawan sah, yen eta lahan teh geus jadi milik Ibrahim.

¹⁹Ti dinya Ibrahim ngurebkeun Sarah geureuhana di eta guha di tanah Kanaan.

²⁰Jadi eta tanah anu tadina milik urang Het, ayeuna geus sah jadi milik Ibrahim, dianggo tanah makam.