Read Boros Dusun KAJADIAN 35 Bible Online

KAJADIAN 35 - Boros Dusun bible

KAJADIAN 35

¹Allah ngandika ka Yakub, ”Maneh kudu pindah ka Betel, urut maneh nyieun altar keur ka Allah, anu nembongan basa maneh kabur nyingkiran dulur maneh Esau.”

²Ti dinya Yakub marentahkeun kulawargina jeung sakabeh jelema anu caricing di anjeunna, saurna, ”Kumpulkeun sagala patung anu ku maraneh sok dipiallah. Terus maraneh marandi, salin ku nu bersih.

³Urang pindah ti dieu ka Betel, tempat kami bareto ngadegkeun altar paranti ngabakti ka Allah, anu geus nulung kami mangsa keur kabalangsak, jeung teu kendat-kendat nyarengan boh di mana, boh di mendi.”

⁴Tuluy patung-patung sesembahan teh diserenkeun ka Yakub, kitu deui masing-masing papaes ceuli. Ari ku anjeunna terus dikubur di handapeun tangkal kiara anu pernahna deukeut ka Sekem tea.

⁵Yakub sapala putra enggeus leut ngaleugeudeut seja ngalih. Kota-kota sakuriling eta pada ngarasa gimir, nu matak caricing bae teu daek ngudag.

⁶Aleutan Yakub geus cunduk ka nagri Lus, anu ayeuna mah disebutna teh Betel, di tanah Kanaan.

⁷Anjeunna ngadegkeun altar di dinya, sarta tempatna dingaranan El-Betel, hartina Allah anu disembah di kota Betel. Dumeh keur basa anjeunna kabur nyingkahan saderekna tea, Allah nembongan ka anjeunna di dinya.

⁸Geus kitu Debora, emban Rabeka, maot, dikuburkeun di landeuheun tangkal kiara di Betel, sarta tempatna dingaranan ”Kiara Panyeungceurikan”, ayana kiduleun Betel.

⁹Basa Yakub mulang ti Mesopotami tea, Allah nembongan deui ka anjeunna sarta maparin berkah.

¹⁰Pangandika-Na harita ka anjeunna, ”Ngaran maneh Yakub. Tapi ti semet ieu ngaran maneh teh Israil.” Nya ti harita jenenganana teh Israil.

¹¹Kieu deui pangandika-Na ka anjeunna, ”Kami, Allah Nu Maha Kawasa. Maneh sing reuay anak. Maneh baris loba turunan, aya nu baris jaradi raja. Turunan maneh baris mangpirang-pirang lobana, baris jadi bangsa.

¹²Tanah anu ku Kami dibikeun ka Ibrahim jeung Ishak, ka maneh oge, nya kitu deui ka turunan maneh, rek dibikeun.”

¹³Sanggeus ngandika kitu, Allah ngantunkeun Yakub.

¹⁴Ti dinya Yakub nangtungkeun hiji batu keur pangeling-eling, tuluy ditahbiskeun, dikucuran anggur jeung minyak jetun.

¹⁵Nya tempatna ku anjeunna dingaranan Betel.

¹⁶Ti Betel leut deui ngaleut. Sanggeus lalampahanana kira-kira sajongjonan deui ka nagri Eprata, Rahel babar. Babarna hese beleke.

¹⁷Dina keur meumeujeuhna nyeri, parajina ngalilipur kieu, ”Kedah sabar. Murangkalihna pameget deui.”

¹⁸Tapi Rahel geus taya harepan. Memeh cekleuk panungtungan kabujeng keneh maparin ngaran ka murangkalih, Ben Oni. Tapi ku ramana dingaranan Binyamin.

¹⁹Sanggeus Rahel pupus, dikurebkeunana di sisi jalan ka Eprata, anu ayeuna mah disebutna teh Betlehem.

²⁰Kuburanana ku Yakub diberean tutunggul. Eta tutunggul kuburan Rahel aya tepi ka kiwari.

²¹Ti dinya Yakub maju deui, deg ngadegkeun pasanggrahan di hiji tempat anu paeunteung-eunteung jeung munara Eder.

²²Waktu Israil matuh di eta tanah, Rubin jinah jeung salah sahiji parekan ramana nu ngaranna Bilha. Sanggeus kauninga, Yakub pohara benduna. Putra-putra Yakub kabehna dua belas.

²³Anu ti Lea: Rubin, cikalna, terus: Simeon, Lewi, Yuda, Isaskar jeung Sebulun.

²⁴Putra ti Rahel: Yusup jeung Binyamin.

²⁵Putra ti emban Rahel nu ngaranna Bilha: Dan jeung Naptali.

²⁶Putra ti Silpa emban Lea: Gad jeung Aser. Eta putra-putrana nu pameget anu dilahirkeun di Mesopotami.

²⁷Yakub sumping ka Ishak ramana di Mamre, deukeut Hebron, panglinggihan Ibrahim jeung Ishak bareto.

²⁸Ishak pupus dina yuswa 180 taun.

²⁹Anjeunna pupus dina yuswa geus kacida sepuhna. Dikurebkeunana ku Esau jeung Yakub, putrana.