Read Boros Dusun KAJADIAN 4 Bible Online

KAJADIAN 4 - Boros Dusun bible

KAJADIAN 4

¹Geus kitu Adam sapatemon jeung geureuhana. Seug geureuhana bobot, tuluy babar, putrana pameget. Anjeunna sasauran, ”Berkah pitulung PANGERAN, aing ayeuna boga anak.” Seug putrana teh dijenenganan Kain.

²Babar deui, pameget, dijenenganan Habil. Habil jadi tukang ngangon, Kain jadi tukang tani.

³Hiji mangsa Kain ka PANGERAN nyanggakeun sabagian tina hasil panenna, dijieun kurban.

⁴Habil ge nyanggakeun kurban, anak domba cikal. Anu dihaturkeun daging anu panghadena. Kurban Habil ku PANGERAN kaanggo,

⁵kurban Kain ditolak. Kain jadi ngentab, murukusunu bakat ku ambek.

⁶Ngandika PANGERAN ka Kain, ”Ku naon murukusunu, kucem beungeut?

⁷Coba lamun tas migawe anu bener mah tangtu beungeut teh marahmay. Tapi ku sabab tas migawe anu goreng, tuh di lawang panto, dosa eukeur ngadodoho, arek kumawasa ka maneh. Ku maneh kudu dielehkeun.”

⁸Geus kitu saur Kain ka Habil rayina, ”Adi, hayu urang ka tegal.” Ari geus araya di tegal, rayina ditarajang, dipergasa nepi ka maot.

⁹Mariksa PANGERAN ka Kain, ”Mana Habil adi maneh?” Ari walonna, ”Duka! Na abdi teh kedah ngangasuh adi?”

¹⁰Dawuhan PANGERAN, ”Na maneh teh jahat-jahat teuing? Getih adi maneh sasambat ka Kami di jero taneuh, semu menta dipangmaleskeun.

¹¹Maneh ayeuna katulah, hamo deui bisa ngolah taneuh. Sabab taneuh geus kaserepan ku getih adi maneh. Barang adi maneh dipaehan, taneuh teh lir nyalawakkeun sungut, geusan narima adi maneh.

¹²Ana maneh nyoba pulak-pelak, taneuh teh moal mere hasil. Maneh baris uprak-apruk, moal boga enggon nyiruruk.”

¹³Piunjuk Kain ka PANGERAN, ”Eta hukuman teh kalintang abotna, abdi hamo kiat nandanganana.

¹⁴Mana diusir ti ieu tanah, mana ditebihkeun ti payuneun Anjeun. Mana kedah uprak-apruk teu gaduh enggon nyiruruk, tangtos abdi dipaehan ku jalma nu pareng manggihan.”

¹⁵Tapi PANGERAN ngawaler, ”Hamo. Saupama maneh aya nu maehan, tujuh nyawa pigantieunana, kaasup anu maehan ka maneh tea oge baris dipaehan.” Ti dinya Kain teh dicirian ku PANGERAN geusan jadi tanda ka sing saha bae yen Kain teh teu meunang dipaehan.

¹⁶Los Kain mungkur ti payuneun PANGERAN, tuluy matuh di hiji tempat anu disebut Nod, anu hartina ngumbara, di wetaneun tanah Eden.

¹⁷Kain jeung garwana puputra, dijenenganan Hanok. Ti dinya Kain ngadamel hiji nagara, seug dingaranan ku jenengan putrana.

¹⁸Hanok puputra Irad, Irad puputra Mehuyael. Mehuyael puputra Metusael. Metusael puputra Lamek.

¹⁹Lamek geureuhana dua, Adah jeung Silah.

²⁰Adah ngababarkeun Yabal, karuhun jelema-jelema tukang maliara ingon-ingon sarta maratuhna di kemah-kemah.

²¹Dulur Yabal ngaranna Yubal, karuhun ahli-ahli tatabeuhan, ahli-ahli ngacapi jeung nyuling.

²²Ari Silah ngababarkeun Tubal-Kain, tukang nyieun sagala rupa paparabotan tina parunggu jeung beusi. Saderek Tubal-Kain anu istri jenenganana Naamah.

²³Ngalahir Lamek ka dua geureuhana, ”Adah, Silah, dengekeun! Akang tas maehan hiji jajaka, bongan neunggeul ka Akang.

²⁴Anu maehan Kain, kudu nebus ku tujuh nyawa, anu maehan Akang mah kudu nebus ku tujuh puluh tujuh nyawa.”

²⁵Adam jeung geureuhana kagungan putra deui. Saur geureuhana, ”Allah maparin deui anak, gaganti Habil anu dipaehan ku Kain.” Seug putrana teh dijenenganan Set.

²⁶Set puputra Enos. Ti harita, jelema-jelema teh mimiti nyarebut jenengan PANGERAN upama nyarembah.